Read Plautdietsch (Low German) – De Bibel Markus 8 Bible Online

Markus 8 - Plautdietsch (Low German) – De Bibel bible

Markus 8

¹Aus doa dan wada väl Volkj vesaumelt wia, un wiels dee nuscht to äten hauden, roopt Jesus siene Jinja no sikj un säd:

²Mie jaumat daut äwa dise Menschen. Dee sent nu aul dree Doag bie mie jewast un haben nuscht to äten.

³Un wan ekj dee hungrich wajch schekjen wudd, wudden dee hinjawäajes omkomen; wiels eenje sent von wiet auf jekomen.

⁴Siene Jinja säden to am: Wua kjrie wie hia en de Wiltnis jenuach Broot häa, dee saut to kjrieen?

⁵Jesus fruach an wooväl Bulkjes see hauden. See säden: Säwen.

⁶Hee säd de Menschen, see sullen sikj oppe Ieed dolsaten, un hee neem de Bulkjes, dankt doafäa, bruak dee, un jeef de Jinja dee, daut Volkj väatolajen; un dee deeden daut.

⁷Dee hauden uk een poa kjliene Fesch. Hee dankt uk doafäa un jeef de Jinja, dee uk daut Volkj väatolajen.

⁸De Menschen eeten aula un worden saut. Nohäa lausen de Jinja säwen Kjarw voll Brocken toop, dee noch äwajebläwen wieren.

⁹Doa wieren bie 4.000 dee jejäten hauden; un dan leet hee dee gonen.

¹⁰Hee stieech wada en eene Lomm nenn met siene Jinja un see fuaren no de Dalmanuta [21] Jäajent.

¹¹De Farisäa kjeemen un fungen aun, am Froagen to stalen. Om am to vesieekjen, fruagen see am no een Tieekjen vom Himmel.

¹²Un deep bewäacht, säd hee: Wuarom sieekjt dise Jennerazion no een Wundatieekjen? Ekj saj junt de Woarheit: Dee woat kjeen Tieekjen jejäft woaren.

¹³Dan veleet hee an, stieech trigj en de Lomm un fua äwa no de aundre Sied.

¹⁴De Jinja hauden vejäten, Broot mettobrinjen, buta een Broot daut see en de Lomm hauden.

¹⁵Jesus woarnd an väasechtich to sennen, un säd see sullen sikj fa de Farisäa un Herodes [22] äare Häw heeden.

¹⁶See räden doavon unjarenaunda un säden: Daut es, wiels wie nich Broot metjenomen haben.

¹⁷Jesus wist von waut see sikj unjahilden un säd: Wuarom räd jie doavon, daut jie nich Broot haben? Kjenn jie noch nich seenen ooda vestonen? Sent june Hoaten noch soo veschloten?

¹⁸Jie haben Uagen, un seenen nich; jie haben Uaren, un hieren nich. Un denkj jie nich doaraun,

¹⁹aus ekj fa 5.000 Maun fief Bulkjes bruak, wooväl Kjarw voll Brocken jie doa opphoowen? See säden: 12.

²⁰Un aus ekj de säwen Bulkjes fa de 4.000 bruak, wooväl Kjarw voll Brocken laus jie toop? See säden: Säwen.

²¹Hee säd to an: Woo kjemt daut, daut jie nuscht vestonen?

²²See kjeemen no Betsaida. Eenje Menschen brochten eenen blinjen Maun no am un bedden am dän auntoschieren.

²³Un hee foot dän blinjen aun de Haunt un leid am ut de Staut rut. Un aus hee am ieescht en de Uagen jespäajen un de Henj oppjelajcht haud, fruach hee am auf hee irjentwaut seenen kunn.

²⁴Un hee kjikjt opp un säd: Ekj see Menschen, oba dee sitt daut soo, aus wan Beem romgonen.

²⁵Jesus läd am noch eemol de Henj opp de Uagen. Dan jinjen am de Uagen op un hee kunn wada aules kloa seenen.

²⁶Dan schekjt Jesus am no Hus un säd, hee sull nich en de Staut nenn gonen un sull daut uk kjeenem sajen.

²⁷Dan jinkj Jesus met siene Jinja no de Darpa, runt om Cäsarea Filippi. Un hinjawäajes fruach hee siene Jinja: Wäa sajen de Menschen, daut ekj sie?

²⁸See säden: Johanes de Deepa; oba eenje sajen, Elia; un aundre sajen, eena von de Profeeten.

²⁹Hee säd to an: Oba wäa saj jie, daut ekj sie? Petrus auntwuad un säd to am: Du best de Christus!

³⁰Jesus befool an strenj, daut kjeenem to sajen.

³¹Dan funk hee aun an daut kloa to moaken, daut de Menschensän väl wudd lieden motten, un wudd von de Eltestasch un Huagepriestasch un Schreftjelieede veschmäten un dootjemoakt woaren un daut hee om dree Doag wada oppstonen wudd.

³²Hee säd dit gaunz frie un openboa. Dan neem Petrus am tosied un funk aun, am to beschwichten.

³³Oba aus Jesus sikj omdreid un siene Jinja aunkjikjt, beschwicht hee Petrus un säd: See du, Soton, daut du hinja mie kjemst! Wiels die es daut nich om Gott siene Sach to doonen, oba om Menschen äare.

³⁴Un aus hee daut Volkj met siene Jinja toop no sikj jeroopt haud, säd hee to an: Wäa mie nofoljen well, mott von sikj selfst vejäten, sien Kjriez opp sikj nämen un mie nofoljen.

³⁵Wiels wäa sien ieejnet Läwen raden well, woat daut velieren; oba wäa sien Läwen wäajen mie un daut Evangelium velieren woat, woat sikj daut raden.

³⁶Wiels waut wudd een Mensch daut halpen, wan hee de gaunze Welt jewennen wudd, wan am daut siene Seel kosten wudd?

³⁷Ooda waut kaun een Mensch jäwen, siene Seel trigjtokjrieen?

³⁸Wiels wäaemma sikj met mie un miene Wieed mank dise sintelje, ehebräakjarische Jennerazion schämen woat, met däm woat de Menschensän sikj uk schämen, wan hee en sienem Voda siene Harlichkjeit met siene heilje Enjel komen woat.