Read Plautdietsch (Low German) – De Bibel Lukas 15 Bible Online

Lukas 15 - Plautdietsch (Low German) – De Bibel bible

Lukas 15

¹Dan brochten aule Takskollakjta un Sinda sikj noda no Jesus, am to hieren.

²Oba de Schreftjelieede un Farisäa grumsaujden doaräwa un säden: Dis Maun nemt de Sinda aun un at met an toop.

³Doaropp säd hee to an dit Jlikjnis:

⁴Wäa von junt, wan hee 100 Schop haud, un eent von dee velua, wudd dan nich de 99 opp de Stap loten un no daut veloarne sieekjen, bat hee daut funk?

⁵Un wan hee daut finjt, lajcht hee sikj daut met Freiden opp de Schulren.

⁶Un wan hee doamet no Hus kjemt, roopt hee sikj siene Frind un Nobasch toop un sajcht to an: Freit junt met mie, wiels ekj hab mien veloarnet Schop jefungen!

⁷Ekj saj junt: Jrod soo woaren sikj uk de Enjel em Himmel mea äwa een Sinda freien, dee omkjieet, aus äwa 99 jerajchte dee nich omkjieren brucken.

⁸Ooda, wan eene Fru tieen Selwastekja [33] haft un eent velieren wudd, wudd dee nich eene Laump aunstekjen, un daut Hus utfäajen un flietich sieekjen, bat see daut finjen wudd?

⁹Un wan see daut finjt, roopt see äare Frind un Nobasch toop un sajcht: Freit junt met mie, wiels ekj hab daut Selwastekj jefungen, daut ekj veloaren haud!

¹⁰Jrod soo, saj ekj junt, woaren Gott siene Enjel sikj doatoo freien wan een Sinda omkjieren deit.

¹¹Dan säd hee uk: Een jewessa Maun haud twee Säns.

¹²Un de jinjsta säd to sien Voda: Voda, jeff mie mien poat vom Oafgoot, daut mie traft. Un hee deeld an sien Goot en.

¹³Un daut dieed uk nich lang, dan pakt de jinjsta sikj aules toop, un reisd wiet von Hus en een framdet Launt, un doa vemacheld hee sien Goot derch sien willet Läwen.

¹⁴Un aus hee ieescht nuscht mea haud, kjeem eene groote Hungaschnoot en daut Launt, un am fäld daut aun aules.

¹⁵Dan jinkj hee un vemeed sikj bie een Laundesbirja, un dee schekjt am no Stap de Schwien to heeden.

¹⁶Hee wudd sikj aul jieren de Moag met Oaftenschluwen jefelt haben, dee de Schwien freeten, oba kjeena jeef am dee.

¹⁷Oba aus hee to Besennunk kjeem, säd hee to sikj selfst: Wooväl jemeede Oabeida haft mien Voda, dee jenuach Broot un toom äwajen haben, un ekj mott von Hunga omkomen!

¹⁸Ekj woa mie oppmoaken un no mienen Voda gonen un to am sajen: Voda, ekj hab jäajen dän Himmel uk jäajen die jesindicht,

¹⁹un sie daut nich mea wieet dien Sän to heeten; lot mie eena von diene aunjenomne Oabeida sennen!

²⁰Un hee jinkj doaropp loos un kjeem no sienen Voda. Un sien Voda sach am aul von wiet auf komen. Am jaumad daut äwa sienen Sän un rand am entjäajen, foot am om un jeef am een Kuss.

²¹Dan säd de Sän to am: Voda, ekj hab jäajen die uk jäajen dän Himmel jesindicht, un sie daut nich mea wieet, dien Sän to heeten. [34]

²²Oba de Voda säd to siene Kjnajchts: Brinjt emol daut baste Kjleet häa, un trakj am daut aun; nämt siene Haunt un streept am een Rinkj opp däm Finja, un brinjt am Schoo auntotrakjen.

²³Un brinjt een jemastet Kaulf häa un schlacht daut; un dan well wie äten un froo sennen!

²⁴Wiels disa mien Sän wia doot, un es toom Läwen jekomen; hee wia veloaren, un es jefungen worden. Un see fungen aun froo to läwen.

²⁵De elsta Sän oba, wia opp de Stap. Un aus hee noda nom Hus kjeem un de Musikj hieed un sach, woo see daunzten,

²⁶roopt hee sikj een Kjnajcht han, un fruach waut doa väajinkj.

²⁷Dee säd to am: Dien Brooda es jekomen, un dien Voda haft daut Mastkaulf jeschlacht, wiels hee am jesunt wada haft.

²⁸Dan wia de elsta Sän doll un wull nich nenn gonen. Dan jinkj de Voda rut un prachad am, nenn to komen.

²⁹De Sän oba säd to sienen Voda: Kjikj emol, aul dise Joaren hab ekj die jedeent un sie die niemols jäajenaun jewast, un du hast mie niemols een Bock jejäft, daut ekj met miene Frind kunn een huagen Dach läwen.

³⁰Oba nu daut disa dien Sän kjeem, dee dien Goot met Huaren vemachelt haft, hast du fa am daut Mastkaulf jeschlacht.

³¹Hee oba säd to am: Mien Sän, du best emma bie mie, un aules, waut ekj hab, es uk dient.

³²Daut es doch gaunz aum Plauz, daut wie een frooen Dach fieren; wiels dien Brooda wia doot un es toom Läwen jekomen, hee wia veloaren un es jefungen.