Read Plautdietsch (Low German) – De Bibel Lukas 16 Bible Online

Lukas 16 - Plautdietsch (Low German) – De Bibel bible

Lukas 16

¹Hee säd uk to siene Jinja: Doa wia emol een jewessa rikja Maun, dee een Vewaulta äwa sien goot haud. Am wort aunjemalt, daut dis Vewaulta sien goot vekwosen deed.

²Dan roopt hee sikj am han un säd: Waut es dit, daut ekj von die hia? Jeff emol Räakjnunk von diene Buakfierunk! Wiels du kaust nich lenja Vewaulta sennen.

³Dan säd de Vewaulta to sikj selfst: Waut saul ekj doonen? Mien Har nemt mie mien Vewaulta Aumt wajch. Growen kaun ekj nich, un ekj schäm mie to prachren.

⁴Ekj weet waut ekj doonen woa, daut see mie dan, wan ekj mien Vewaulta Aumt velia, en äare Hiesa oppnämen.

⁵Un hee roopt sikj aul sienen Harn siene Schildna un säd to dän ieeschten: Wooväl best du mienen Harn schuldich?

⁶Un dee säd: 100 Mot Eelj. Hee säd to am: Nemm dien Schultzadel, sat die schwind dol un schriew 50.

⁷Dan säd hee to een aundren: Un wooväl best du schuldich? Un dee säd: 100 Mot Weit. Un hee säd to am: Nemm dien Schultzadel un schriew 80.

⁸Doaropp lowd de Har dän ojjerajchten Vewaulta, daut hee kluak jehaundelt haud, wiels dise Weltmenschen [35] sent em Omgank met äaresjlikjen kjlieekja aus de Lichtkjinja.

⁹Un ekj saj junt uk, brukt daut ojjerajchte Rikjtum, [36] Frind to moaken, daut wan daut met eemol nich mea doa es, see junt dan en eewje Woninjen oppnämen.

¹⁰Wäa em kjlienen tru es, es uk tru em grooten; un wäa em kjlienen nich tru es, es uk nich tru em grooten.

¹¹Doawäajen, wan jie met daut ojjerajchte Rikjtum [37] nich sent tru jewast, wäa woat junt dän woaren Rikjtum aunvetruen?

¹²Un wan jie met daut waut een aundren sient es, nich sent tru jewast, wäa woat junt dan jäwen waut junt es?

¹³Kjeen Kjnajcht kaun twee Haren deenen: hee woat eenen nich lieden kjennen un von dän aundren väl hoolen, ooda hee woat aun eenen henjen un dän aundren veachten. Jie kjennen nich Gott un daut Rikjtum [38] tojlikj deenen.

¹⁴De jeltjieeje Farisäa hauden dit aula jehieet un dreewen doawäajen äaren Spott äwa am.

¹⁵Un hee säd to an: Jie sent dee, dee sikj ver de Menschen rajchtfoadjen. Gott, oba, kjant june Hoaten, wiels waut von Menschen huach aunjeseenen woat, es en Gott siene Uagen een Aufschu.

¹⁶Daut Jesaz un de Profeeten worden jeprädicht bat Johanes kjeem. Un von dan aun es daut Gottesrikj jeprädicht worden, un aulemaun drenjt doa met Jewault nenn.

¹⁷Daut es oba leichta fa Himmel un Ieed to vegonen, aus daut een Sträakjskje vom Jesaz wajch felt.

¹⁸Wäa sikj von siene Fru scheeden deit un eene aundre friet, brakjt de Ehe; un wäa sikj dee friet, dee derch eene Scheedunk jegonen es, brakjt uk de Ehe.

¹⁹Doa wia een jewessa rikja Maun, dee sikj met Purpur un en feinsten Lienzeich kjleeden deed, un aule Dach en Freiden huachhäa läwd.

²⁰Doa wia uk een oama Pracha Lazarus, voll Schwäaren, dee am ver de Däa jelajcht wort,

²¹un een velangen haud de Kjreemels to äten, dee däm rikjen Maun vom Desch follen; soogoa de Hunj kjeemen un lekjten am de Schwäaren rein.

²²Eenen Dach storf de oama Maun un wort von de Enjel en Abraham siene Schoot jedroacht. De rikja Maun storf uk un wort begroft.

²³Un aus hee en de Hal, en siene Kwol oppkjikjt, sach hee Abraham dort wiet auf, met Lazarus opp de Schoot.

²⁴Dan roopt hee: Voda Abraham, hab Metleet met mie un schekj Lazarus, daut hee sikj de Finjaspetz em Wota dukt un mie de Tung kjeelt, wiels ekj woa en dise Flaumen jekjwält.

²⁵Abraham oba säd: Sän, denkj doaraun, daut du dien goodet en diene Läwestiet jekjräajen hast, un Lazarus em Jäajendeel kjrieech beeset. Nu oba woat hee jetreest, un du hast diene Kwol.

²⁶Un bowenenn es tweschen ons un junt een deepa Aufgrunt, soo daut et ommäajlich es fa dee von hia dort hantokomen un uk fa dee von dort, häa to komen.

²⁷Dan säd hee: Voda, dan pracha ekj die, daut du am no mien Voda sien Hus schekjst,

²⁸wiels ekj hab fief Breeda, daut hee an dit väastalt, daut see nich uk en disen Uat en de Kwol nenn komen.

²⁹Abraham säd to am: Dee haben Moses un de Profeeten. Lot see an hieren.

³⁰Hee oba säd: Nä, Voda Abraham, wan von de Doodes wäa wudd hangonen, wudden dee omkjieren.

³¹Hee oba säd to am: Wan dee nich no Moses un de Profeeten horchen, wudden dee sikj uk nich beräden loten, wan eena von de Doodes oppstunt.