Read Plautdietsch (Low German) – De Bibel Lukas 21 Bible Online

Lukas 21 - Plautdietsch (Low German) – De Bibel bible

Lukas 21

¹Aus Jesus oppkjikjt, sach hee de rikje äare Gowen en de Tempelkaus nenn lajen.

²Hee sach uk woo eene oame Wätfru twee Koppasch nenn läd.

³Hee säd: Ekj saj junt de Woarheit: Dise oame Wätfru haft mea nenn jelajcht aus de aundre aula toop,

⁴wiels dee haben aula ut äaren Äwafluss em Gotteskausten jelajcht. Dise oba haft en äare Oamoot aules jejäft, waut see toom Läwen haud.

⁵Wiels, aus eenje am doaropp oppmoakjsom muaken, woo de Tempel met feine Steena un gottjeweide Gowen jezieet wia, säd hee:

⁶Waut daut aunbelangt, waut jie hia seenen, doa woat eene Tiet komen, daut hia nich een Steen opp däm aundren bliewen woat. Dee woaren aula doljebroaken woaren.

⁷See fruagen am: Liera, saj ons, wanea daut passieren saul, un waut woat doa fa een Tieekjen sennen, wuaraun wie seenen kjennen, daut de Tiet hia es?

⁸Un hee säd: Paust opp, daut jie nich veleit woaren. Doa woaren väl en mienen Nomen komen un sajen: Ekj sie daut. Dan es de Tiet dicht bie, oba lot junt nich metrieten.

⁹Un wan jie von Kjrich un Opprua hieren, fercht junt nich. Dit mott aula ieescht passieren; oba daut Enj kjemt noch nich fuaz.

¹⁰Een Volkj woat jäajen daut aundre oppstonen, un een Rikj jäajen daut aundre.

¹¹Un doa woat opp veschiedne Städen grootet Ieedbäben un Hungaschnoot un Pestilenz sennen; un aum Himmel woat schrakjeljet un groote Tieekjens to seenen sennen.

¹²Oba ea dit aula passieren woat, woaren see sikj aun junt vejriepen un junt nostonen, junt ver daut Schoolenjerecht brinjen un faustnämen, un woaren junt om mienen Nomen sient haulwen ver Kjennichs un aunjestalde stalen.

¹³Oba daut woat fa junt eene Jeläajenheit sennen, jun Zeichnis to jäwen.

¹⁴Sorcht nich em verut doaräwa, woo jie junt veauntwuaten woaren,

¹⁵wiels ekj woa junt met Wieed un Weisheit vesorjen, wuajäajen june Jäajna nich woaren räden ooda stonen kjennen.

¹⁶Jie woaren von june Elren, Breeda, Frind un Frintschoft verot woaren, un dee woaren uk eenje von junt doot moaken.

¹⁷Un jie woaren om mienen Nomen sient haulwen von aule Menschen vestat woaren.

¹⁸Oba junt saul nich een Hoa vom Kopp faulen.

¹⁹Wan jie staunthauft bliewen, woa jie june Seelen jewennen.

²⁰Wan jie Jerusalem woaren von Armeeen beloagat seenen, dan sell jie weeten, daut daut boolt woat en de Grunt jebrocht woaren.

²¹Dan lot dee, dee en Judäa sent, en de Boaj nenn flichten; un lot dee, dee medden en de Staut sent, rut gonen; un lot dee, dee opp daut Launt sent, nich en de Staut nenn komen.

²²Wiels en dise Doag woat Rach jeeeft, daut aules soo romkjemt aus jeschräwen steit.

²³Oba wee fa dee, dee en dee Tiet schwanga sent; un fa dee, dee een Kjint aun de Brost haben! Wiels doa woat en dee Tiet groote Noot oppe Ieed sennen, un een Strofjerecht äwa daut Volkj komen,

²⁴un dee woaren derch däm Schwieet faulen, un von aule Velkja faustjenomen un wajch jefieet woaren; un de Velkja woaren Jerusalem unja de Feet haben, bat äare Tiet woat aufjerant sennen.

²⁵Un aun de Sonn, Mon un Stierns woaren Tieekjens sennen. Un oppe Ieed woaren de Menschen ut Angst fa daut ruzhende Mäa un de toobende Walen zoagen.

²⁶Un wan de Himmelskjraften sikj schedren woaren, woat de Menschen en äare Angst daut Hoat vesajen, wan see doaraun denkjen, waut äwa dise Welt komen saul.

²⁷Un dan woaren see dän Menschensän opp eene Wolkj, en groote Krauft un Harlichkjeit, komen seenen.

²⁸Wan dit aula aunfangt to passieren, dan häft de Kjap opp un kjikjt, wiels sikj june Radunk nodat.

²⁹Un hee vetald an een Jlikjnis: Kjikjt nom Fiejenboom un no aule aundre Beem;

³⁰sooboolt aus dee Bläda kjrieen, weet jie fa junt selfst, daut dan de Somma dicht bie es.

³¹Un jrod soo uk, wan jie dit aula passieren seenen, räakjent doamet, daut daut Gottesrikj dicht bie es.

³²Ekj saj junt de Woarheit: Dise Jennerazion woat nich utstoawen, bat dit aula jeworden es.

³³Himmel un Ieed woaren vegonen, oba miene Wieed woaren nich vegonen.

³⁴Siet väasechtich, daut jie junt nich derch fräten un supen un sorjen äwa dit Läwen, daut Hoat beloden, un daut dee Dach dan onverhofs äwa junt kjemt;

³⁵wiels dee woat soo aus eene Schlenj äwa aulem komen, dee oppe Ieed wonen.

³⁶Oba siet waka un bät, daut jie aul daut utem Wäaj komen muchten, waut doa passieren saul, un ver dän Menschensän stonen kjennen.

³⁷Äwadach lieed hee em Tempel, oba zeowes jinkj hee opp däm Oliewen Boajch un brocht doa de Nacht too.

³⁸Un aulemaun wudd tiedich zemorjes oppstonen un nom Tempel gonen, om doa no am to horchen.