Read Plautdietsch (Low German) – De Bibel Lukas 23 Bible Online

Lukas 23 - Plautdietsch (Low German) – De Bibel bible

Lukas 23

¹Dan stunden see aula opp un brochten am no Pilatus.

²Doa fungen see aun am to beschuljen un säden: Wie troffen disem doabie, daut hee daut Volkj veleit un vebitt, dän Kjeisa dän Taks to tolen, un sajcht daut hee selfst Christus, een Kjennich es.

³Dan fruach Pilatus am direkjt: Best du de Juden äa Kjennich? Hee auntwuad am un säd: Daut es soo aus du sajchst.

⁴Dan säd Pilatus toom Huagenpriesta un toom Volkj: Ekj finj kjeene Schult aun disen Maun.

⁵Oba see worden bloos sooväl oaja un säden: Hee räacht daut Volkj opp un jeit met siene Lia derch gaunz Judäa, von Galiläa bat hia.

⁶Aus Pilatus von Galiläa hieed, fruach hee auf dis Maun von Galiläa wia.

⁷Un sooboolt aus hee wist, daut Jesus unja Herodes siene Harschoft jehieed, schekjt hee am no Herodes, dee dan uk jrod en Jerusalem wia.

⁸Aus Herodes Jesus sach, wia hee sea froo, wiels hee haud aul lang een velangen jehaut am to seenen, wiels hee haud aul väl von am jehieet, un hee hopt to seenen, daut hee Wunda doonen wudd.

⁹Dan fruach hee am välet, oba Jesus jeef am kjeene Auntwuat.

¹⁰Un de Huagepriestasch un Schreftjelieede stunden un vekloagden am sea hoat.

¹¹Oba Herodes un siene Soldoten veachten un vespotten am, trocken am een wittet Kjleet äwa un schekjten am trigj no Pilatus.

¹²Krakjt aun dän Dach worden Pilatus un Herodes Frind met eenaunda, wiels soowiet wieren see sikj fientlich jäajenäwa.

¹³Dan roopt Pilatus de Huagapriesta un väaschte un uk daut Volkj toop un säd to an:

¹⁴Jie haben disen Maun no mie jebrocht aus eena, dee daut Volkj veleiden deit; un ekj hab am en june Jäajenwuat, jrintlich em Vehia jenomen, un ekj hab am aun nuscht schuldich jefungen, wuafäa jie am aunkloagen;

¹⁵un Herodes uk nich, wiels hee schekjt am trigj no ons. Seet doch, hee haft werkjlich nuscht jedonen, daut dän Doot vedeent haft.

¹⁶Doawäajen woa ekj am strofen un loosloten.

¹⁷(Wiels hee must an opp däm Fast eenen faustjenomnen rut jäwen.) [48]

¹⁸Un see schrieejen aula tojlikj: Wajch met disen Maun un jeff ons Barabas loos!

¹⁹Dee wia doawäajen enjestopt, wiels hee een Opprua en de Staut aunjestalt un een Mort begonen haud.

²⁰Un Pilatus, wiels hee Jesus jieren frieloten wull, räd noch eemol to an.

²¹See oba schrieejen: Kjriezicht am! Kjriezicht am!

²²Hee säd to an toom dredden mol: Wuarom? Waut haft hee fa een vebräakjen begonen? Ekj finj aun am kjeene Uasoak toom Doot. Ekj woa am strofen un dan gonen loten.

²³Oba see hilden aun lud to schrieen, daut see velangden am to kjriezjen. Un äa Jeschrech neem äwahaunt.

²⁴Dan spruak Pilatus daut Uadeel, soo aus see sikj daut wenschten,

²⁵un hee jeef an dän loos, dän see velangden, dee wäajen een Opprua un een Mort wia enjestopt worden; un jeef an Jesus, met am to doonen waut see wullen.

²⁶Un aus see am wajch leiden, kjrieejen see Simon, een Maun von Kiereen to hoolen, dee von Launt kjeem. Opp dän läden see daut Kjriez, daut hee Jesus daut hinjaraun droagen sull.

²⁷Un am kjeemen een grootet Schoof Menschen hinjaraun un uk Frues, dee am bejaumaden un hielden.

²⁸Oba Jesus dreid sikj om un säd to an: Jie Dajchta von Jerusalem, hielt nich äwa mie, oba hielt äwa junt selfst un äwa june Kjinja.

²⁹Wiels dee Tiet woat bestemt komen, en dee see sajen woaren: Jesäajent sent de onfruchtboare, dee kjeen Kjint to Welt jebrocht haben; un de Brosten, dee nie sent jesoagen worden.

³⁰Dan woaren see aunfangen to de groote Boaj to sajen: Fault opp ons nopp! un to de kjliene Boaj: Bedakjt ons!

³¹Wiels wan see dit aum jreenen Holt doonen, waut woat dan passieren, wan daut ieescht drieech es?

³²Doa wieren uk noch twee Vebräakja, dee met am tojlikj jekjriezicht worden.

³³Un aus see bat de Schädelplauz kjeemen, kjriezijden see am doa, un uk de twee Vebräakja, eenem aun de rajchte un eenem aun de linkje Sied.

³⁴Dan säd Jesus: Voda, vejeff an, wiels see weeten nich waut see doonen! [49] Un see trocken Lessa, om sikj siene Kjleeda entodeelen.

³⁵Un de Menschen stunden un kjikjten too. Un soogoa de Volkjsleida, met de aundre toop, dreewen äaren Spott äwa am un säden: Hee haft aundre jeholpen; un wan hee Christus, Gott sien Utjewälda es, dan lot am sikj nu selfst halpen.

³⁶De Soldoten dreewen uk äaren Spott met am un kjeemen un booden am suaren Wien aun

³⁷un säden: Wan du de Judenkjennich best, dan halp die selfst!

³⁸Un äwa am wia en griechisch, latiensch, un hebräisch [50] jeschräwen: Dit es de Kjennich von de Juden.

³⁹Dan lastad eena von de Merda aum Kjriez äwa am un säd: Wan du de Christus best, dan halp die selfst, un uk ons!

⁴⁰Oba de aundra beschwicht am un säd: ferchst du nich emol Gott? Wiels du best unja de selwje Vedaumnis.

⁴¹Un wie kjrieen met rajcht dän Loon dän wie vedeent haben; oba dis Maun haft nuscht ojjeschekjtet jedonen.

⁴²Dan säd hee to Jesus: Har, denkj aun mie, wan du en dien Rikj nenn kjemst!

⁴³Jesus säd to am: Ekj saj die de Woarheit: Du woascht vondoag met mie em Paradies sennen.

⁴⁴Daut wia nu Klock 12 opp Meddach. Dan wort daut bat Klock dree no Meddach äwa de gaunze Welt diesta,

⁴⁵un de Sonn vedunkeld, un de Gardien em Tempel reet en de Medd uteneen.

⁴⁶Un Jesus schrieech lud: Voda, ekj befäl mienen Jeist en diene Henj! Un aus hee dit jesajcht haud, storf hee.

⁴⁷Aus de Offizia sach, waut doa passieed, lowd hee Gott un säd: Dit es woarhauftich een fromma Maun jewast!

⁴⁸Un aus daut Volkj, daut doa romstunt un tookjikjt, sach waut doa passieed, schluagen dee sikj opp de Brost un jinjen wada trigj.

⁴⁹Oba aul siene bekaunde, un de Frues dee von Galiläa metjekomen wieren, stunden wieda auf un kjikjten too.

⁵⁰Nu wia Josef, een Rotshar, een gooda, opprechtja Maun jrod doa,

⁵¹un haud en äaren Rot un Haundlen nich met enjewellicht. Hee wia von de judsche Staut Arimatäa, un luad uk no daut Gottesrikj.

⁵²Dis Maun jinkj no Pilatus un fruach no Jesus sienen Kjarpa.

⁵³Un hee neem dän rauf un wekjeld dän en Lienzeich un läd dän en een nieet Grauf, daut ut een Steen utjehakt wia, un noch niemols wäa bennen jeläajen haud.

⁵⁴Daut wia aun dän Dach aus see toom Sabat reedmuaken, un de Sabat funk aun. [51]

⁵⁵Un de Frues, dee von Galiläa metjekomen wieren, kjeemen hinjaraun un besagen sikj daut Grauf, un wua sien Kjarpa hanjelajcht wort.

⁵⁶Dan jinjen see trigj un muaken Kjriedarie un scheenrikjende Eelj reed. Oba aum Sabat ruden see, soo aus daut Jesaz velangd.