Read Plautdietsch (Low German) – De Bibel Lukas 3 Bible Online

Lukas 3 - Plautdietsch (Low German) – De Bibel bible

Lukas 3

¹Em 15. Joa daut Tiberius aus Kjeisa rejieed, aus Pontius Pilatus de Harschoft en Judäa haud, Herodes en Galiläa un sien Brooda Filippus äwa de Lenda Ituräa un Trachonitis, Liesanias äwa Abileen,

²un aus Hanas un Kaifas Huagepriestasch wieren, kjeem Gott sien Befäl aun Johanes, Zacharias sien Sän, en de Wiltnis.

³Un hee jinkj en aule Jäajenden aum Jordan un prädijd: Kjieet om un lot junt deepen. Dan woat Gott junt de Sinden vejäwen.

⁴Soo aus em Profeeten Jesaja sien Buak jeschräwen steit: “Doa roopt wäa en de Wiltnis: Moakt dän Wajch reed fa onsen Harn. Moakt fa am een jlikjen Stich!

⁵De Läachten sellen aula jefelt, un de groote un kjliene Boaj utjejlikjt woaren; de kromme Wäaj motten jlikj jemoakt woaren, un de ruche Wäaj glaut jemoakt.

⁶Un aule Menschen woaren Gott siene Radunk seenen.”

⁷De Menschen kjeemen bie Schoowa sikj von Johanes deepen to loten. Hee säd to de Menschen dee doa kjeemen: Jie Schlangenbroodsel, wäa haft junt jewoarnt Gott sien Jerecht ut däm Wäaj to komen?

⁸Brinjt Frucht, dee doa wiest, daut jie junt oppjemoakt haben. Un fangt nich aun to junt selfst to sajen: Wie haben Abraham aus Voda. Wiels ekj saj junt: Gott kaun Abraham ut dise Steena Kjinja schaufen.

⁹De Akjs licht bie de Beem aun de Wartlen reed; un doawäajen woat jieda Boom, dee nich goode Frucht drajcht, aufjehakt un em Fia jeschmäten.

¹⁰De Menschen fruagen am: Waut sell wie dan doonen?

¹¹Johanes säd to an: Wäa twee Sauts Kjleeda haft, saul däm eent jäwen dee kjeene haft; un wäa to äten haft, saul daut krakjt soo moaken.

¹²Dan kjeemen de Takskollakjta, om sikj deepen to loten, un fruagen: Liera, waut sell wie doonen?

¹³Hee säd to an: Kollakjt nich mea, aus daut Jesaz velangt!

¹⁴Dan fruagen am de Soldoten: Un waut sell wie doonen? Hee säd to an: Nämt kjeenem met Jewault Jelt auf un doot kjeenem faulsch beschuljen un siet tofräd met jun Loon!

¹⁵Wiels de Menschen doamet räakjenden daut Christus komen wudd, wundaden see aul, auf Johanes dee opplenjd wia.

¹⁶Johanes säd to an aula: Ekj deep junt met Wota, oba doa woat eena komen dee stoakja es aus ekj, jäajen däm ekj daut nich wieet sie, daut ekj am de Schoo oplees. Dee woat junt met dän Heiljen Jeist un met Fia deepen.

¹⁷Hee haft siene Schmietscheffel en de Henj, un woat siene Draschflua jrintlich reinjen. Dän Weit woat hee em Spikja brinjen, un daut Sprie em Fia schmieten, daut niemols utjeit.

¹⁸Hee ermond de Menschen noch derch veschiedne aundre Woarnungen un prädijd an daut Evangelium.

¹⁹Aus Johanes Herodes, dän Gowernia, daut väahilt, daut hee sien Brooda Filippus siene Fru jefriet haud, un wäajen aul daut orrajchte daut hee jedonen haud,

²⁰leet hee bowa aul daut noch Johanes enstoppen.

²¹Aus daut Volkj sikj aula deepen leet, wort Jesus uk jedeept. Un aus hee bäd, muak de Himmel sikj op.

²²Un de Heilja Jeist kjeem en kjarpaliche Jestault rauf un sad sikj opp am soo aus eene Duw. Un eene Stemm vom Himmel säd: Du best mien leewa Sän, met däm ekj sea tofräd sie. [5]

²³Jesus selfst wia ojjefäa 30 Joa oolt aus hee sienen Deenst aunfunk. See hilden am aula fa Josef sienen Sän,

²⁴een Sän von Eli, een Sän von Matat, een Sän von Levi, een Sän von Melchi, een Sän von Jana, een Sän von Josef,

²⁵een Sän von Matitja, een Sän von Amos, een Sän von Nahum, een Sän von Hesli, een Sän von Nagai,

²⁶een Sän von Mahat, een Sän von Matitja, een Sän von Schimi, een Sän von Josech, een Sän von Joda,

²⁷een Sän von Johanan, een Sän von Resa, een Sän von Serubabel, een Sän von Schealtiel, [6] een Sän von Neri,

²⁸een Sän von Melchi, een Sän von Addi, een Sän von Kosam, een Sän von Elmadam, een Sän von Er,

²⁹een Sän von Jesus, een Sän von Elieser, een Sän von Jorem, een Sän von Matat, een Sän von Levi,

³⁰een Sän von Simeon, een Sän von Juda, een Sän von Josef, een Sän von Jonam, een Sän von Eljakim,

³¹een Sän von Melea, een Sän von Menna, een Sän von Matata, een Sän von Natan, een Sän von David,

³²een Sän von Isai, een Sän von Obed, een Sän von Boa, een Sän von Salmon, een Sän von Nachschon,

³³een Sän von Aminadab, een Sän von Admin, een Sän von Arni, een Sän von Hezron, een Sän von Perez, een Sän von Juda,

³⁴een Sän von Jakob, een Sän von Isaak, een Sän von Abraham, een Sän von Terach, een Sän von Nahor,

³⁵een Sän von Serug, een Sän von Regu, een Sän von Peleg, een Sän von Eber, een Sän von Schelach,

³⁶een Sän von Kenan, een Sän von Arpachschad, een Sän von Sem, een Sän von Noah, een Sän von Lamech,

³⁷een Sän von Metuschelach, een Sän von Henoch, een Sän von Jired, een Sän von Mahalalel, een Sän von Kenan,

³⁸een Sän von Enosch, een Sän von Sett, een Sän von Adam, dee von Gott kjeem.