Read Plautdietsch (Low German) – De Bibel Lukas 6 Bible Online

Lukas 6 - Plautdietsch (Low German) – De Bibel bible

Lukas 6

¹Daut neem sikj soo rom, daut Jesus eenen Sabat [9] derch de Jeträajd Flekja jinkj, un siene Jinja plocken sikj Oaren un rubbelden dee met de Henj ut un eeten de Kjieena.

²Eenje Farisäa fruagen: Wuarom doo jie aum Sabat, waut jäajen daut Jesaz es?

³Jesus säd to an: Hab jie nich jeläst, waut David un dee, dee met am wieren, deeden, aus see hungrich wieren?

⁴woo hee em Gotteshus jinkj un daut Broot eet, daut Gott jeweit wia, un uk dee jeef dee met am wieren? Daut wia jäajen daut Jesaz, wiels daut Broot wia bloos fa de Priesta toom äten.

⁵Un hee säd to an: De Menschensän es uk Har äwa dän Sabat.

⁶Aun een aundren Sabat jinkj hee en de Judenschool nenn un lieed. Un doa wia een Maun, däm de rajchte Haunt vedrieecht wia.

⁷Un de Schreftjelieede un Farisäa pausten sea jeneiw opp no am, to seenen auf hee aum Sabat heelen wudd; see sochten no eene Uasoak, am to beschuljen.

⁸Hee oba wist waut see dochten un säd to dän Maun met de vedrieejde Haunt: Sto opp, un Komm häa! Hee stunt opp un kjeem no väaren.

⁹Dan säd Jesus to an: Ekj woa junt eent froagen: Waut doaf eena aum Sabat doonen, goodet ooda schlajchtet? Menschenläwen raden ooda vedoawen?

¹⁰Jesus kjikjt an aula aun un säd to dän Maun: Strakj diene Haunt ut! Hee deed daut; un siene Haunt wia soo jesunt aus de aundre.

¹¹See oba wieren doll jenuach, Rach to eewen, un rotschluagen unjarenaunda, waut see met Jesus doonen wullen.

¹²En dee Tiet jinkj Jesus eenen Dach en de Boaj, to bäden; un hee brocht de Nacht too em Jebäd to Gott.

¹³Zemorjes roopt hee siene Jinja no sikj un wäld sikj ut an 12, dee hee Apostel nand:

¹⁴Simon, dän hee Petrus nand, un sienen Brooda Andreas; Jakobus un Johanes; Filippus un Bartolomäus;

¹⁵Matäus un Tomas; Jakobus, Alfäus sienen Sän, un Simon, de Zelot jenant;

¹⁶Judas, Jakobus sienen Sän, un Judas Iskariot, dee am veroden deed.

¹⁷Hee jinkj met an rauf un stunt wua daut jlikj wia, met een Schoof von siene Jinja un uk een groot deel Menschen von Judäa un Jerusalem un von Tierus un Sidon, dee aum Mäa ligjen, dee jekomen wieren, am to hieren un von äare Krankheiten jeheelt to woaren.

¹⁸Un uk soone dee von orreine Jeista jekjwält worden, kjeemen un worden jesunt.

¹⁹Un de Menschen proowden am aula auntoschieren, wiels von am kjeem eene Krauft dee an aula heeld.

²⁰Hee kjikjt siene Jinja aun un säd: Seelich sent jie oame; wiels daut Gottesrikj es junt.

²¹Seelich sent jie, dee nu hungren; wiels jie sellen saut woaren. Seelich sent jie, dee nu hielen; wiels jie woaren lachen.

²²Seelich sent jie, wan de Menschen junt om dän Menschensän sient haulwen nich lieden kjennen, junt vesteeten, beleidjen un een schlajchten Nomen jäwen.

²³Dan siet froo un sprinjt fa Freid, wiels em Himmel woat jun Loon groot sennen, wiels daut es waut äare Vodasch de Profeeten uk toojesat haben.

²⁴Oba wee junt, dee doa rikj sent! Jie haben junen Troost aul wajch.

²⁵Wee junt, dee nu voll un saut sent, wiels junt woat hungren. Wee junt, dee hia lachen, wiels jie woaren truaren un hielen.

²⁶Wee junt, wan aulemaun goot von junt rät, wiels daut es waut äare Vodasch von de faulsche Profeeten deeden.

²⁷Oba ekj saj to junt, dee mie hieren: Wiest Leew to june Fiend; un doot dee goodet, dee junt nich lieden kjennen;

²⁸säajent dee, dee junt flieekjen; un bät fa dee, dee junt beleidjen.

²⁹Un wäa die opp eene Bak schleit, däm hool de aundre uk han; un wan die wäa dän Wanikj wajchnemt, dan jeff am uk dien Hamd.

³⁰Wäa die om waut prachat, däm jeff daut; un wan die wäa daut dienje wajchnemt, dan fodda daut nich trigj.

³¹Doot jrod daut fa aundre, waut jie an wudden wenschen fa junt to doonen.

³²Waut hab jie fa een Dank doafäa, wan jie Leew fa dee haben, dee junt goot sent? Wiels de Sinda sent uk dee goot, waut an goot sent.

³³Un waut hab jie fa een Dank doafäa, wan jie dee goodet doonen, dee junt goodet doonen? Wiels daut doonen de Sinda uk.

³⁴Un wan jie dee lieen, von dee jie daut räakjnen trigjtokjrieen, waut hab jie fa een Dank doafäa? Wiels de Sinda lieen aundre Sinda uk, von dee see räakjnen krakjt sooväl trigjtokjrieen.

³⁵Oba wiest daut jie Leew haben fa june Fiend; doot goodet un liet, doa wua jie nuscht räakjnen trigjtokjrieen. [10] Dan woat jun Loon groot sennen, un jie woaren dän Aulahechsten siene Kjinja sennen, wiels hee haft uk een Jaumahoat fa de ondankboare un dee waut orrajcht doonen.

³⁶Doawäajen habt erboarmen, jrod soo aus jun Voda erboarmen haft.

³⁷Doot nich rechten, dan woa jie uk nich jerecht woaren. Vedaumt aundre nich, dan woa jie uk nich vedaumt woaren. Vejäft, un junt woat vejäft woaren.

³⁸Jäft, un junt woat eene goode Mot, doljedrekjt, toopjescheddat un äwavoll en de Schoot jejäft woaren; wiels met dee Mot dee jie fa aundre brucken, woat junt uk toojemäten woaren.

³⁹Un hee räd to an derch een Jlikjnis: Kaun een blinja een blinjen leiden? Wudden dee nich beid em Growen nenn faulen?

⁴⁰Een Lieelinkj steit nich äwa sienen Liera; oba wäa utjelieet es, woat soo sennen aus sien Liera.

⁴¹Wuarom sitst du dän Spletta en dien Brooda sien Uag, un sitst dän Baulkjen nich en dien ieejnet Uag?

⁴²Ooda woo kaust du to dienen Brooda sajen: Brooda, lot mie die dän Spletta utem Uag nämen, wan du dän Baulkjen en dien ieejnet Uag nich sitst? Heichla! Trakj die ieescht dän Baulkjen ut dien ieejnet Uag rut. Dan woascht du bäta seenen kjennen dienen Brooda dän Spletta utem Uag to trakjen.

⁴³Wiels een gooda Boom drajcht nich schlajchte Frucht, un een schlajchta Boom drajcht uk nich goode Frucht.

⁴⁴Jieda Boom es aun siene Frucht to kjanen. Eena plekjt nich Fiejen von Distlen, ooda Wiendruwen von een Brombäa Bosch.

⁴⁵Een gooda Mensch woat ut daut goode en sien Hoat, goodet verendach brinjen; un een schlajchta Mensch brinjt von daut schlajchte en sien Hoat, schlajchtet verendach. Wiels wuavon daut Hoat voll es, rät daut Mul.

⁴⁶Wuarom nan jie mie Har, Har, un doonen doch nich, waut ekj junt saj?

⁴⁷Ekj woa junt wiesen met wäm dee to vejlikjen es, dee no mie kjemt un hieet waut ekj saj un daut dan uk deit.

⁴⁸Dee es met een Mensch to vejlikjen, dee een Hus bud un bat opp däm Steen groof, om dän Grunt doa nopptolajen. Aus dan een Huachwota kjeem, reet de Stroom nom Hus opptoo, un kunn daut oba nich bewäajen, wiels daut stunt opp däm Steengrunt. [11]

⁴⁹Wäa oba hieet un daut nich deit, dee es met een Mensch to vejlikjen, dee sien Hus onen eenen Grunt, opp de Ieed bud; un de Stroom reet sikj doahan, un daut Hus foll boolt toop, un de Schoden wia groot.