Read Plautdietsch (Low German) – De Bibel 5. Mose 22 Bible Online

5. Mose 22 - Plautdietsch (Low German) – De Bibel bible

5. Mose 22

¹Wan jie eenen Noba sienen Oss ooda Schop loos seenen, sell jie daut nich loos loten un doa von wajchgonen. Jie sellen am daut Tia trigjstalen.

²Wan de Noba nich dicht bie wont, ooda jie nich weeten woonen Noba daut jehieet, sell jie daut no Hus nämen bat hee doano kjemt. Dan sell jie am daut trigjäwen.

³Krakjt soo sell jie daut met sien Äsel doonen; soo sell jie daut met een Stekj von siene Kjleeda doonen; un soo sell jie daut met irjent waut doonen, waut däm Noba jehieet un hee daut velist. Du doascht daut nich bloos aunseenen un nuscht doamet doonen.

⁴Jie sellen nich onen to halpen wieda gonen, wan een Brooda sien Äsel ooda Oss hinjawäajes tofaul kjemt. Jie sellen däm trajcht halpen.

⁵Eene Fru saul sikj nich en Mauns Kjleeda kjleeden, un een Maun saul sikj nich en Frues Kjleeda kjleeden. Soon Mensch es waut oppscheiseljet fa däm HARN junen Gott.

⁶Wan wäa toofalich een Voagelnast finjt en een Boom ooda oppe Ieed, un doa een Voagel opp äa Broodsel sett, dan sell jie nich beides daut Broodsel un daut Voagel nämen.

⁷Lot daut Voagel friegonen un nemm bloos daut Broodsel, soo daut et goot met junt gonen kaun un jie lang läwen kjennen.

⁸Wan wäa een nieet Hus but, saul hee eenen Tun aun de Kaunt von een plautet Dak moaken. Dan woa jie nich schuldich sennen wan doa wäa von daut Dak felt un sikj doabie dootschleit.

⁹Jie sellen nich noch eene tweede Sort von Sot en junen Wiengoaden seien, wiels dan wudd aules waut doa waust, beides de Wiendruwen un waut doa sest noch jeplaunt es, nich fa junt un uk nich fa daut Heilichtum to brucken sennen.

¹⁰Jie sellen nich met een Oss un een Äsel toop en een Jespaun plieejen.

¹¹Jie sellen nich Kjleeda auntrakjen, wua daut Zeich von beides Woll un Lienzeich jewowen es.

¹²De Mauntel, däm du brukst toom die bedakjen, saul aun jieda eent von de vea Akjen een zeichnet Zippelkje haben.

¹³Wan een Maun sikj met eene Mejal befriet, un hee ar oba veacht no däm daut see toop jekomen sent,

¹⁴un hee ar dan eenen schlajchten Nomen jeft un sajcht: Ekj neem dise Fru, un aus ekj met ar toopkjeem, funk ekj daut see ea met wäm jeläajen haud,

¹⁵dan sellen de Fru äare Elren dän Bewies brinjen, daut see eene Mejal wia, un dän Bewies bie daut Stautspuat ver de Leidasch von de Staut hanlajen.

¹⁶Un de Voda von de Mejal saul to de Leidasch vonne Staut sajen: Ekj hab disen Maun miene Dochta aus Fru jejäft, un nu well hee ar nich mea.

¹⁷Hee haft ar eenen schlajchten Nomen jejäft, un haft jesajcht daut miene Dochta nich eene Mejal wia. Hia hab ekj dän Bewies daut see daut wia. Un de Elren sellen daut Loaken vom Kjastinjsdach ver de Leidasch von de Staut opspreeden.

¹⁸Un de Leidasch von de Staut sellen däm Maun vedakjen,

¹⁹un dan noch sellen see 100 Selwastekja von am velangen un dee de Fru äaren Voda jäwen. De Mensch haft eenen schlajchten Nomen opp eene israelitische Mejal jebrocht. Un de Fru saul däm Mensch siene Fru bliewen. Hee doaf dee nich tosied saten soo lang aus hee läft.

²⁰Wan de Maun oba rajcht es un doa kjeen Bewies es daut see eene reine Mejal wia aus hee ar neem,

²¹dan sellen see de junge Fru bat vere Däa von äa Voda sien Hus brinjen, un de Leidasch von de Staut sellen dee steenjen bat see stoaft. See haft eene Schaund opp Israel jebrocht, doaderch daut see en äa Voda sien Hus haft Huararie jedräwen. Soo sell jie soon beeset von mank junt utroden.

²²Wan jie finjen daut een Maun met eenen aundren Maun siene Fru licht dan sellen beid de Maun un de Fru dootjemoakt. Soo sell jie soon beeset von mank jun Volkj utroden.

²³Un wan daut väakjemt, daut eene Mejal dee vesproaken haft sikj met eenem to befrieen, met eenen Maun enne Staut tooplicht,

²⁴dan sellen dee aulebeid no daut Stautspuat jebrocht woaren un doa jesteenicht daut see stoawen. De Mejal es schuldich daut see nich jeroopt haft wan see doch enne Staut wia, un de Maun wiels hee sienen Noba siene Mejal Jewault aunjedonen haft. Soo sell jie soon beeset von mank junt utroden.

²⁵Wan oba een Maun met eene Mejal buten oppem Launt licht, un de Mejal es wäm to Fru vesproaken, dan saul bloos de Maun dee met ar jeläajen haft stoawen.

²⁶Dise Mejal sell jie nuscht aundoonen. See haft nuscht jedonen fa waut see met däm Doot bestroft saul. De Faul von dise Mejal es soo aus een Maun, dee von sienen Noba äwafollen woat un dootjeschloagen woat.

²⁷Dit wort oppe opne Stap un aus de Mejal schrieech, wia doa kjeena waut komen kunn om ar to halpen.

²⁸Un wan een Maun eene Mejal, dee kjeenem vesproaken es, Jewault aun deit un met ar licht un de Sach bekaunt woat,

²⁹dan saul de Maun dee met ar lach äaren Voda 50 Selwastekja jäwen, un see saul siene Fru sennen, wiels hee ar met Jewault jedwungen haud. Hee doaf dee nienich tosied saten, soo lang aus hee läft.