Read Plautdietsch (Low German) – De Bibel 5. Mose 27 Bible Online

5. Mose 27 - Plautdietsch (Low German) – De Bibel bible

5. Mose 27

¹Un Moses un de Leidasch von Israel säden to daut Volkj: Hoolt aul de Jebooten dee ekj junt vondoag jäw.

²Dän Dach wan jie derch däm Jordan en daut Launt nengonen, woont de HAR jun Gott junt jeft, sell jie groote Steena oppstalen un dee von buten veschmäaren.

³Schrieft dise Jebooten opp dee Steena. Dan, wan jie aunjesiedelt sent en daut Launt, woont de HAR jun Gott junt vesproaken haft, wua Malkj un Honnich ranen,

⁴aun jant Sied vom Jordan, dan stalt doa oppem Ebal Boajch dise veschmäade Steena opp, dee de Jesazen doabowen haben.

⁵Un but doa uk eenen steenanen Aultoa fa däm HARN junen Gott. Jie sellen kjeen iesanet Jereetschoft aun dee Steena brucken.

⁶De Aultoa fa däm HARN junen Gott saul von onbehakte Steena jebut sennen. Opp däm Aultoa sell jie daut Brauntopfa fa däm HARN junen Gott moaken,

⁷un doa sell jie jun Jemeenschofts Opfa brinjen un junt doa ver däm HARN junen Gott freien.

⁸Un wan jie aul de Wieed von daut Jesaz opp de Steena schriewen, sell jie dee sea kloa un dietlich schriewen.

⁹Un Moses un de levitische Priesta säden to daut gaunze Israel: Volkj Israel, horcht emol häa. Vondoag sent jie däm HARN junen Gott sien Volkj jeworden.

¹⁰Jehorcht däm HARN junen Gott un hoolt siene Jebooten un Jesazen, dee ekj junt vondoag jäw.

¹¹Un Moses bestald aun daut Volkj un säd:

¹²Wan jie ieescht derch däm Jordan jegonen sent, dan sellen de Stam von Simeon, Levi, Juda, Isachar, Josef, un Benjamin opp däm Garizim Boajch stonen, wan de Säajen äwa daut Volkj jesproaken woat.

¹³Un de Stam Ruben, Gad, Asser, Sebulon, Dan un Naftali sellen oppem Ebal Boajch stonen, wan de Woarnunk met dän Fluch jesproaken woat.

¹⁴Un de Leviten sellen to aul de Israeliten met eene lude Stemm sajen:

¹⁵Doa es een Fluch opp däm Maun dee sikj eenen Aufgott moakt, auf von Steen, Holt ooda Metol, un bät däm em Jeheemen aun. Un daut gaunze Volkj saul “Amen” sajen.

¹⁶Doa es een Fluch opp däm Maun dee sienen Voda ooda Mutta eene Schaund moakt. Un daut gaunze Volkj saul “Amen” sajen.

¹⁷Doa es een Fluch opp däm Maun dee sienen Noba sien Jrens Tieekjen wieda sat. Un daut gaunze Volkj saul “Amen” sajen.

¹⁸Doa es een Fluch opp däm Maun, dee däm blinjen dän orrajchten Wajch wiest. Un daut gaunze Volkj saul “Amen” sajen.

¹⁹Doa es een Fluch opp däm Maun, dee de framde, de Weisen, un de Wätfrues nich äa rajcht jeft ver daut Jesaz. Un daut gaunze Volkj saul “Amen” sajen.

²⁰Doa es een Fluch opp däm, dee met sienen Voda siene Fru Jeschlajchtsvekjia haft, un äare Dakj aufdakjt. Un daut gaunze Volkj saul “Amen” sajen.

²¹Doa es een Fluch opp däm, dee met een Stekj Vee licht. Un daut gaunze Volkj saul “Amen” sajen.

²²Doa es een Fluch opp däm, dee met siene Sesta ooda Haulfsesta licht, eendoont auf dee de Dochta von siene Mutta ooda von sienen Voda es. Un daut gaunze Volkj saul “Amen” sajen.

²³Doa es een Fluch opp däm, dee met siene Schwieemutta licht. Un daut gaunze Volkj saul “Amen” sajen.

²⁴Doa es een Fluch opp däm, dee eenen Mensch em Jeheemen ombrinjt. Un daut gaunze Volkj saul “Amen” sajen.

²⁵Doa es een Fluch opp däm, dee sikj bekjeepen lat daut hee eenen oschuldjen Mensch doot moakt. Un daut gaunze Volkj saul “Amen” sajen.

²⁶Doa es een Fluch opp däm, dee nich daut gaunze Jesaz helt. Un daut gaunze Volkj saul “Amen” sajen.