Read Plautdietsch (Low German) – De Bibel 5. Mose 29 Bible Online

5. Mose 29 - Plautdietsch (Low German) – De Bibel bible

5. Mose 29

¹Un Moses roopt daut gaunze israelitische Volkj toop un säd to an: Jie haben selfst jeseenen waut de HAR to dän ägiptischen Kjennich un siene aunjestalde en daut gaunze Launt deed.

²Jie sagen de schlemme Ploagen, un de Tieekjens un Wunda dee de HAR äwa an brocht.

³Doch bat vondoag haft de HAR junt nich soorajcht een Vestentnis jejäft, äwa daut waut jie jeseenen un jehieet haben.

⁴Vieetich Joa leid ekj junt derch de Wiltnis, un june Kjleeda aun jun Kjarpa sent nich vefollen un daut Footich es nich derchjeschieet.

⁵Dee gaunze Tiet hab jie nich Broot jejäten un nich Wien ooda stoakjet to drinkjen jehaut. Aul dit wia doatoo daut jie kloa seenen sullen, daut ekj de HAR jun Gott sie.

⁶Un aus wie bat dise Städ kjeemen, kjeemen de Kjennich Sihon, von Heschbon, un de Kjennich Og, von Baschan, ons entjäajen. Oba wie schluagen dee,

⁷un neemen äa Launt en, un deelden de Stam Ruben, Gad, un dän haulwen Manasse Staum daut too.

⁸Nu siet väasechtich un hoolt junt aun de Väaschreften von disen Bunt, soo daut jie junt nopp buaren kjennen en aules waut jie doonen.

⁹Vondoag sto jie aula ver däm HARN junen Gott, jie Leidasch enne Stam, de aunjeseene Mana, de aunjestalde em Volkj, un aule Mana,

¹⁰jie Kjinja, un Frues, un uk de framde dee mank junt wonen un jun Holt haken ooda jun Wota droagen.

¹¹Jie aula sent hia om eenen Bunt met däm HARN junen Gott to moaken, eenen Bunt met de Vespräakjungen un Bedinjungen, dee hee vondoag opp junt lajcht.

¹²Met disen Bunt woat de HAR jun Gott daut foadich moaken, daut jie sien Volkj sent, un daut hee jun Gott es, soo aus hee Abraham, Isaak un Jakob daut vesproaken haft.

¹³Jie, dee jie hia stonen, sent nich de eensje, waut disen Bunt met de Vespräakjungen un Bedinjungen met däm HARN moaken.

¹⁴De Bunt es met junt, dee jie hia ver däm HARN junen Gott stonen, un krakjt soo goot met june Nokomen, dee hia noch nich sent.

¹⁵Jie weeten noch woo ons daut en Ägipten jinkj, ooda uk aus wie derch de veschiedne Velkja äare Jäajenden reisden.

¹⁶Jie sagen, waut fa oppscheiselje Dinja dee hauden, äare Jetta von Holt un Steen, un von Selwa un Golt.

¹⁷Paust opp daut kjeen Maun ooda Fru, kjeene Famielje ooda Staum dee hia vondoag es, woat von däm HARN onsen Gott wajchdreien, un dan aundre Jetta deenen. Daut wudd soo sennen aus wan doa eene Wartel wia, dee eene betre ooda jeftje Stud äwadäl brocht.

¹⁸Mucht doa kjeena hia vondoag sennen, dee dit Vespräakjen opp sikj nemt un doch meent daut aules woat goot gonen, wan hee uk sienen ieejnen stieekopjen Wajch jeit. Daut wudd Schoden brinjen opp daut jewessade un uk opp daut drieeje Launt.

¹⁹De HAR woat soonen Mensch nienich vejäwen; hee vedrajcht soont nich un woat sienen hetsjen Oaja loten opp däm komen, un aules waut en dit Buak jedreift es woat sikj opp am bewiesen. De HAR woat däm Mensch ombrinjen.

²⁰De HAR woat krakjt opp däm, von aule Menschen en Israel, grooten Schoden brinjen, soo aus daut en dit Buak vom Jesaz jeschräwen steit.

²¹Un en lotre Jennerazionen woaren june Kjinja un uk de framde von aundre Lenda seenen woo de HAR ons enne Grunt jebrocht haft un waut von lieden hee opp daut Launt jebrocht haft.

²²De Ieed oppe Flekja woat met Schwäwelblitt un Solt vedorwen sennen. Kjeena woat doa waut saten un doa woat nuscht waussen, nich emol Krut. Daut woat sennen aus Sodom un Gomorra, ooda Adma un Zebojim aus dee vestieet worden derch däm HARN sienen rietenda Oaja.

²³Dee waut daut seenen, woaren froagen: Wuarom haft de HAR soont jedonen, un wuarom haft hee soonen grooten Oaja opp an jebrocht.

²⁴Un de Auntwuat woat sennen: Daut es wiels see dän Bunt met däm HARN, äare Vodasch äaren Gott, tosied saden, dän Bunt dän hee met an muak aus hee an ut Ägipten rutbrocht.

²⁵See kjieeden sikj dan no aundre Jetta un deenden dee. See bäden Jetta aun, dee see nich verhäa kjanden, un von woone de HAR an nich jelieet haud.

²⁶Un doa derch brochten see däm HARN sien Oaja opp äa Launt, un jieda Schoden dee en dit Buak steit.

²⁷De HAR wia sea doll un gaunz root hinjare Uaren, un en sienen hetsjen Oaja, reet hee an ut äa Launt rut un schmeet an en een framdet nenn wua see uk noch vondoag sent.

²⁸Doa es soont waut de HAR ons Gott nich openboa jemoakt haft, un daut aula jehieet am auleen, oba daut Jesaz waut hee ons openboa jemoakt haft, daut jehieet ons un onse Kjinja opp aule Tieden, un doatoo jehieet daut wie daut hoolen.