Read Plautdietsch (Low German) – De Bibel 5. Mose 4 Bible Online

5. Mose 4 - Plautdietsch (Low German) – De Bibel bible

5. Mose 4

¹Un Moses unjarecht daut Volkj un säd: Israel, horcht no dise Väaschreften un Jesazen, dee ekj junt unjarecht. Hoolt dee, soo daut jie en daut Launt, woont de HAR, june Vodasch äa Gott, junt jeft, läwen kjennen un daut junt moaken.

²Jie sellen nuscht bie dit Jesaz biedoonen, waut ekj junt väasaj, un nuscht doavon wajchnämen. Jie sellen däm HARN junen Gott siene Jebooten, dee ekj junt jäw, hoolen.

³Jie haben met june ieejne Uagen jeseenen, waut de HAR en Baal Peor deed, wua hee mank junt aul dee ombrocht, dee dän Baal von Peor nojinjen.

⁴Un dee, dee jie junt aun däm HARN junen Gott faust hilden, sent vondoag noch aula aum Läwen.

⁵Ekj hab junt de Jesazen un Väaschreften unjarecht, soo aus de HAR mien Gott mie väasäd. Dee sell jie en daut Launt hoolen, wua jie nu nengonen doa to wonen.

⁶Seet doano, daut jie dee hoolen. Daut woaren aundre Velkja to seenen kjrieen, daut jie een weiset Volkj un een Volkj met Vestentnis sent. Wan see hieren waut june Jesazen sent woaren see sajen, daut dit groote Volkj secha een weiset un vestenteljet Volkj es.

⁷Doa es kjeen aundret Launt, krakjt eendoont woo groot, waut eenen Gott haft dee soo dicht bie an es, aus de HAR ons Gott no aun ons es, un ons jiedatsmol hieet, wan wie am aunroopen.

⁸Un doa es uk kjeen Launt, krakjt eendoont woo groot daut es, dän äare Jesazen un Väaschreften soo jerajcht sent aus dise, dee ekj junt vondoag unjarecht hab.

⁹Oba paust sea opp, un siet sea jewessenhauft, daut soo lang aus jie läwen, jie nich vejäten waut jie jeseenen haben. Sajcht june Kjinja un Grootkjinja,

¹⁰woo jie, aus Volkj, eenen Dach ver däm HARN junen Gott biem Horeb Boajch stunden. Doa säd de HAR to mie: Vesaumel daut Volkj hia, daut ekj an kaun miene Wieed hieren loten, soo daut see woaren lieren mie jehuarsom sennen fa äa gaunzet Läwen, un daut see daut uk äare Kjinja biebrinjen.

¹¹Un sajcht june Kjinja, daut jie bat unjen aum Boajch jinjen, un doa stunden un Fia oppem Boajch sagen, daut huach em Himmel nenn rieekjt un dunkle Wolkjen runtom dän Boajch.

¹²Un de HAR räd to junt von en daut Fia. Jie hieeden am räden, oba sagen kjeene Form.

¹³Un doa jeef hee junt sienen Bunt, dän hee velangd daut jie dän hoolen sullen. Dit sent de tieen Jebooten dee hee junt opp twee Steentoflen schreef un junt jeef.

¹⁴Un de HAR jeboot mie dan, daut ekj junt de Jesazen un Väaschreften unjarechten sull, soo daut jie dee hoolen wudden en daut Launt, wua jie nengonen un wonen wudden.

¹⁵Aus de HAR to junt opp däm Horeb Boajch räd utem Fia, sag jie kjeene Form. Nu siet väasechtich

¹⁶daut jie junt nienich doa met vesindjen, daut jie eenen Aufgott moaken, eendoont en waut vonne Form, eendoont auf soo aus een Maun ooda aus eene Fru,

¹⁷aus een Tia waut oppe Ieed jeit, ooda Voagel waut enne Loft flicht,

¹⁸ooda koltblootjet Tia waut oppe Ieed kjript, ooda Fesch waut em Wota läft.

¹⁹Un häft uk nich june Jedanken enne Hecht no de Sonn, de Mon, ooda aundre dee em Himmel Macht eewen, daut jie aufjelenkjt woaren, un dee aunbäden un deenen. Dee sent doa fa aule Velkja unjarem Himmel.

²⁰Jie, oba sent daut Volkj, woont de HAR ut Ägipten, ut dän jlieejenden Owen rut rad. Junt brocht hee rut, daut jie sien Volkj wudden sennen, soo aus daut vondoag es.

²¹Un wäajen junt wia de HAR soo foadich met mie, daut hee met een Eit vespruak, daut ekj nich wudd äwa däm Jordan Riefa gonen, un nich wudd en daut goode Launt nengonen, woont hee junt jeft, daut et junt es.

²²Ekj woa en dit Launt stoawen un nienich äwarem Jordan gonen. Jie, oba, woaren doahan gonen, un woaren junt doa daut goode Launt tooieejnen.

²³Un paust doano opp, daut jie nich dän Bunt met däm HARN junen Gott vejäten woaren, dän hee met junt muak. Hoolt daut Jeboot, soo daut jie junt nich eenen Aufgott moaken von Holt ooda irjent sest waut, waut de HAR junt veboden haft.

²⁴De HAR jun Gott es aus een rietendet Fia. Hee kaun kjeene aundre Jetta vedroagen.

²⁵Un wan jie ieescht een langet stoot en daut Launt jewast sent, un jie Kjinja un Grootkjinja jehaut haben, sindicht nich en däm, daut jie von irjent waut eene Form moaken, daut et jun Aufgott woat. Doot nuscht beeset jäajen däm HARN junen Gott, wuamet jie sien Oaja hoaken wudden.

²⁶Ekj roop vondoag opp däm Himmel un de Ieed daut see Zeijen jäajen junt sent, daut wan jie daut doonen wudden, jie gaunz utstoawen wudden en daut Launt aun jantsied vom Jordan woont jie ennämen woaren. Dan woa jie doa nich lang läwen. Jie woaren dan gaunz utjerot woaren.

²⁷De HAR woat junt dan mank aundre Velkja vestreien un jie woaren mau weinich mank an äwabliewen.

²⁸Un mank de Velkja woa jie Jetta von Holt un Steen deenen, dee von Menschen Henj jemoakt sent. Jetta waut nich seenen, ooda hieren ooda waut äten, un waut nuscht rikjen kjennen.

²⁹Doa woa jie dan no däm HARN junen Gott sieekjen, un wan jie am woaren opp iernst vom Hoaten sieekjen, dan woa jie am finjen.

³⁰Wan jie dan lieden woaren, un jie en dise veschiedne Dinja nenn jeroden, dan woa jie junt met de Tiet nom HARN junen Gott dreien, un jie woaren am jehuarsom sennen.

³¹De HAR jun Gott es een jenstja Gott. Hee woat junt nich gaunz em Stäakj loten; hee woat junt nich gaunz ombrinjen. Hee woat sienen Bunt, dän hee june Vodasch met een Eit vespruak, nienich vejäten.

³²Sieekjt no, en de Doag un en de Tiet waut aul jewast es, gaunz trigj bat de Tiet aus Gott de Menschen oppe Ieed muak. Froacht no, von een Enj vom Himmel bat daut aundre, auf doa irjent wua soon groosoatjet Dinkj passieet es, ooda auf irjent wäa von soont uk mau jehieet haft.

³³Haft jeemols een Volkj de Stemm von eenen Gott jehieet, soo ut een Fia räden aus jie haben, un dee dan noch jeläft haben.

³⁴Ooda haft jeemols een Gott prooft sikj een Volkj ut een aundret Volkj rut to läsen un daut sien ieejnet to moaken, soo aus de HAR jun Gott junt en Ägipten deed? Jie haben selfst jeseenen woo hee Ploagen un Tieekjens un Kjrich un Wunda brukt, un woo hee met eene stoakje Haunt un een Oarm, dee nich meed wort, junt rad. Daut wia toom staunen un wundren.

³⁵Junt haft de HAR daut jewäsen, soo daut jie weeten kunnen daut de HAR, Gott es, un daut doa kjeen aundra es.

³⁶Hee leet junt siene Stemm vom Himmel hieren om junt to unjarechten, un oppe Ieed leet hee junt daut groote Fia oppem Boajch seenen un de Stemm von em Fia hieren.

³⁷Wäajen hee june Vodasch goot wia, wäld hee junt, dee jie äare Nokomen sent, un hee selfst brocht junt ut Ägipten derch siene groote Macht.

³⁸Un aus jie delenjd jinjen, juach hee Velkja rut ver junt, dee jrata un stoakja wieren aus jie, soo daut hee junt kunn doa nenn brinjen un junt daut Launt jäwen, daut vondoag noch junt jehieet.

³⁹Lot daut vondoag jesajcht sennen, un vejät daut nich: De HAR es Gott em Himmel un oppe Ieed un doa es sest kjeena.

⁴⁰Hoolt aul de Väaschreften un Jesazen, dee ekj junt vondoag jäw, un dan woat junt un june Nokomen daut goot gonen. Dan woa jie kjennen lang en daut Launt wonen, woont de HAR jun Gott junt opp emma jeft.

⁴¹Dan sad Moses dree Städa oppoat, oosten vom Jordan Riefa,

⁴²wua een Mensch kunn han ranen un vesechat sennen, daut see am nich fuaz aufschaufen wudden, wan hee wäm, dee nich sien Fient wia, derch een Fäla haud omjebrocht. Deejanja kunn no eent von dise Städa ranen, un wudd dan nich omjebrocht woaren.

⁴³Em Staum Ruben wia daut de Staut Bezer, opp daut Huachlaunt; un en däm Staum Gad wia daut Ramot enne Jäajent von Gilead; un fa dän Staum Manasse wia daut Golan en de Jäajent von Baschan.

⁴⁴Dit es daut Jesaz woont Moses de Israeliten jeef.

⁴⁵Dit sent de Aundenkjen, de Väaschreften un Jebooten, woone Moses de Israeliten jeef no däm daut see ut Ägipten jekomen wieren,

⁴⁶un oosten vom Jordan Riefa, jäajenäwa von Bet Peor loagaden. Dit wia en daut Launt, woont Moses un de Israeliten derch Kjrich von däm amoritischen Kjennich Sihon, dee en Heschbon wond, enjenomen hauden, no däm daut see von Ägipten kjeemen.

⁴⁷See hauden dan däm sien Launt, un uk daut Launt von däm Kjennich Og von Baschan enjenomen. Daut wieren de twee amoritische Kjennichs, dee oosten vom Jordan wonden.

⁴⁸Daut Launt, daut see enjenomen hauden rieekjt von Aroer, aum Arnon Riefa gaunz bat däm Boajch Sion, dee uk Hermon, heet.

⁴⁹Dit wia daut gaunze groote Tol oosten vom Jordan, bat soo wiet sieden aus daut Solt Mäa, un soo wiet oosten aus bat aum Pisga Boajch.