Read Plautdietsch (Low German) – De Bibel 5. Mose 7 Bible Online

5. Mose 7 - Plautdietsch (Low German) – De Bibel bible

5. Mose 7

¹De HAR jun Gott woat junt en daut Launt nenn brinjen wua jie wonen woaren, un woat ver junt veschiedne Velkja utroden. Hee woat ver junt säwen Velkja utroden, dee jrata un stoakja sent aus jie: de Hetita, de Girgasita, de Amorita, de Kanaanita, de Perisita, de Hiwita un de Jebusita.

²Un wan de HAR jun Gott dise Velkja junt enne Macht jeft, un jie äwa dee jewennen, sell jie dee aula ombrinjen un kjeen Metlieden fa dee haben. Moakt kjeen Bunt met an.

³Jie sellen junt nich met dee befrieen. Lot june Dajchta sikj nich met äare Säns befrieen, un lot june Säns sikj nich met äare Dajchta befrieen,

⁴wiels daut wudd june Kjinja veleiden daut see aundre Jetta aunbäden wudden enne Städ däm HARN. Wan jie daut deeden, dan wudd däm HARN sien Oaja oppflaumen un hee wudd junt aula opp eemol ombrinjen.

⁵Hia es waut jie doonen sellen. Jie sellen dee äare Aultoaren dolrieten, äare steenane Denkjmol tweischlonen, äare Ascherapols dolhacken, un äare jemoakte Aufjetta vebrennen.

⁶Denkjt doaraun, jie sent aus Volkj däm HARN junen Gott jeweit, jie sent von am jewält, daut jie sien ieejnet Volkj sellen sennen.

⁷Wan de HAR junt goot jewast es un junt jewält haft, es daut nich wiels jie een jratret Volkj wieren aus aundre Velkja. Nä, jie wieren daut kjlanste von aule Velkja.

⁸De HAR wia junt bloos goot, un hilt daut, waut hee june Vodasch opp een Eit vesproaken haud. Dit es wuarom hee junt met siene groosoatje Macht von de Sklowarie unja däm ägiptischen Kjennich jerat haft.

⁹Denkjt doaraun daut de HAR jun Gott, de eensja Gott es. Hee es een Gott opp wäm eena sien vetruen saten kaun, un dee sien Bunt un siene truhoatje Leew bat oppe 1.000. Jennerazion biehelt met deejanje dee am goot sent un dee siene Jesazen hoolen.

¹⁰Un hee es uk de Gott dee openboa Strof brinjt opp dee, waut jäajen am schaufen.

¹¹Doawäajen saj ekj, Hoolt de Jebooten un Väaschreften dee ekj junt vondoag jäw.

¹²Wan jie dise Jesazen jehorchen un hoolen, dan woat de HAR jun Gott sienen Bunt met junt hoolen un woat junt truhoatje Leew wiesen, soo aus hee june Vodasch daut met een Eit vesproaken haft.

¹³Hee woat junt dan goot sennen un junt säajnen, soo daut jie väl Nokomen haben woaren. Hee woat june Flekja säajnen, soo daut jie Jeträajd un Wien un Olieweneelj haben woaren. Hee woat junt väl Vee un Schop jäwen. Aul dit woat hee junt en daut Launt jäwen, woont hee june Vodasch opp een Eit vesproaken haft.

¹⁴Doa woat kjeen Volkj oppe Ieed sennen daut uk soone Säajnungen kjrieen woat. Mank de Menschen, un uk mank daut Vee, woat aulem daut jegonnen sennen, daut see junge haben kjennen.

¹⁵Un de HAR woat aule Krankheiten von junt wajchnämen. De beese Krankheiten, dee jie en Ägipten hauden woat hee nich loten opp junt komen, oba opp june Fiend woaren dee komen.

¹⁶Jie sellen aule Velkja, dee de HAR jun Gott junt enne Macht jeft, ombrinjen, onen daut jie irjent Metlieden fa dee haben. Bät äare Jetta nich aun; wiels dan wudd jie junt faust ranen.

¹⁷Sajcht nich unja junt, daut dise Velkja too groot fa junt sent, un daut jie dee nich ennämen kjennen.

¹⁸Lot junt nich von an enjsten. Denkjt doaraun, waut de HAR jun Gott to däm ägiptischen Kjennich un siene Lied deed.

¹⁹Denkjt aun de groote Ploagen dee jie selfst jeseenen haben, de Tieekjens un Wunda, un uk de stoakje Haunt un de Oarm dee nich meed wort, met woone de HAR jun Gott junt rut brocht. De HAR jun Gott woat krakjt soone Krauft, aus hee jäajen de Ägipta brukt, nu jäajen dise Velkja eewen, von woone jie junt enjsten.

²⁰De HAR jun Gott woat an sea Angst moaken, daut soogoa dee waut wajch ranen un sikj vestäakjen, woaren omkomen.

²¹Habt nich Angst fa dise Menschen. De HAR jun Gott, es een groota un furchtboara Gott, un hee es medden mank junt.

²²De HAR jun Gott woat de Velkja, emma een beskje opp eemol, von ver junt utroden. Jie woaren dee nich aula opp eemol utroden, wiels dan kunnen de wille Tieren sikj soo sea vemieren un junt en Jefoa saten.

²³De HAR jun Gott woat june Fiend en june Macht jäwen un an vewerren, bat see gaunz enne Grunt komen.

²⁴Hee woat uk de Kjennichs en june Macht jäwen, daut jie dee ombrinjen. Kjeena woat dee äare Nomes behoolen. Kjeena woat junt kjennen opphoolen bat jie aulem venicht haben.

²⁵Jie sellen dee äare jemoakte Bilda von äare Jetta vebrennen. Jie sellen junt nich daut Selwa ooda Golt aun de Jetta jankren loten ooda daut fa junt selfst nämen. Wan jie daut wudden, wudd jie junt doamet em Enj ranen, wiels daut es waut oppscheiseljet ver däm HARN.

²⁶Jie sellen dee oppscheiselje Dinja nich en june Hiesa brinjen, sest woat de selwje Fluch, dee opp dee licht, uk opp junt komen. Jie sellen rajcht nuscht met dee to doonen haben, wiels daut es waut vefluchtet.