Read Plautdietsch (Low German) – De Bibel 5. Mose 9 Bible Online

5. Mose 9 - Plautdietsch (Low German) – De Bibel bible

5. Mose 9

¹Horcht emol, jie Israeliten. Vondoag sell jie äwa däm Jordan Riefa gonen un daut Launt ennämen von Velkja, dee jrata un stoakja aus jie sent. Dee äare Städa sent groot, un haben Mieren, dee aum Himmel naun rieekjen.

²De Menschen sent groot un stoakj; daut sent riesje Anakita von dee junt daut bekaunt es, daut kjeena saul jäajen dee stonen kjennen.

³Oba lot junt daut kloa sennen, daut deejanja waut junt veropp jeit, soo es aus een rietendet Fia. Hee es de HAR jun Gott. Hee woat dee ver junt venichten un dolschlonen, soo daut jie dee schwind rutjoagen un ombrinjen kjennen. Daut haft de HAR junt vesproaken.

⁴Wan de HAR jun Gott dee ver junt rut jejoacht haft, dan meent nich daut hee junt daut Launt jejäft haft un daut jie daut haben besiedlen kunt, wäajen jie jerajcht wieren. Nä, de HAR woat dee utroden wiels see soo schlajcht sent.

⁵Daut es nich wiels jie goot un jerajcht sent, daut de HAR jun Gott junt en daut Launt lat aunsiedlen. Hee rot dee ut von äa Launt, wiels see soo schlajcht wieren, un wiels hee daut helt waut hee Abraham, Isaak un Jakob opp een Eit vesproaken haft.

⁶Denkjt nienich daut de HAR jun Gott junt daut goode Launt jeft toom doa aunsiedlen wiels jie jerajcht sent. Nä, jie sent een stieekopjet Volkj.

⁷Vejät nich woo de HAR jun Gott enne Wiltnis soo ontofräd met junt wort. Von däm Dach aus jie ut Ägipten rutkjeemen bat vondoag sent jie däm HARN jäajenaun jewast.

⁸Soogoa bie däm Horeb Boajch muak jie däm HARN soo veläajen, daut hee reed wia junt to venichten.

⁹Ekj jinkj opp däm Boajch om de Steentoflen to holen, opp woone de Bedinjungen von dän Bunt jeschräwen wieren, dän de HAR met junt muak, un wia 40 Doag oppem Boajch onen, daut ekj waut to äten ooda drinkjen haud.

¹⁰Un de HAR jeef mie dee twee Steentoflen, opp woone hee met sienen Finja de Wieed haud nopp jeschräwen, woone hee to junt von em Fia jerät haud aus jie aun däm Boajch vesaumelt wieren.

¹¹Un no de 40 Doag un 40 Nacht, jeef de HAR mie de twee Steentoflen opp woone de Bunt jeschräwen wia.

¹²Un dan säd de HAR to mie: Go emol schwind rauf. Daut Volkj woont du ut Ägipten jebrocht hast, haft waut schlajchtet jedonen. Dee haben nu aul jäajen miene Jebooten jehaundelt un haben sikj eenen jegotnen Aufgott jemoakt.

¹³Un de HAR säd uk noch: Ekj kaun seenen daut dit een stieekopjet Volkj es.

¹⁴Lot mie nu emol auleen. Ekj well an venichten un äaren Nomen utroden von oppe Ieed. Dan well ekj von die een Volkj moaken, daut jrata un stoakja es aus dise.

¹⁵Un ekj dreid mie om un jinkj vom Boajch met de twee Toflen met däm Bunt en miene Henj. Dän Tiet kwaulemd de Boajch met Fia.

¹⁶Un aus ekj junt sach, stuzt ekj, wiels jie hauden jäajen däm HARN junen Gott jesindicht. Jie hauden däm HARN sien Jeboot veacht un junt een jegotnet Kaulf jemoakt.

¹⁷Dan neem ekj de twee Steentoflen woone en miene Henj wieren un schmeet dee doa ver junt oppe Ieed, daut dee tweibruaken.

¹⁸Un dan lach ekj noch emol 40 Doag ver däm HARN oppe Ieed met mien Jesecht rauf. De gaunze Tiet eet ekj un drunk ekj nuscht. Dit deed ekj wäajen de Sind dee jie begonen hauden, doaderch daut jie ver däm HARN hauden schlajchtet jedonen un hauden sien Oaja jereizt.

¹⁹Ekj enjst mie fa däm HARN sien Oaja. Hee wia soo doll un vestalt, daut hee reed wia junt omtobrinjen. Doch, noch een mol, horcht de HAR no mie.

²⁰De HAR wia uk soo entwei äwa Aaron, daut hee reed wia am fuaz omtobrinjen. Soo kjeem daut daut ekj fa Aaron uk fuaz bäden deed.

²¹Dan neem ekj daut Dinkj met woont jie jesindicht hauden, daut Kaulf woont jie jemoakt hauden, un vebrend daut un veschluach daut, bat daut soo fien aus Stoff wia. Un dän Stoff schmeet ekj dan em Riefa, dee doa vom Boajch rauf kjeem.

²²Jie muaken däm HARN uk doll bie Tabera, un Massa, un bie de Lost Jräwa.

²³Un aus de HAR junt bie Kadesch Barnea schekjt, daut jie daut Launt woont hee junt jeef sullen ennämen, dan vetrud jie am nich un jehorcht jie am nich.

²⁴Soo lang aus ekj junt jekjant hab, sent jie däm HARN jäajenaun jewast.

²⁵Un ekj lach oppe Ieed ver däm HARN met mien Jesecht rauf, fa 40 Doag, Dach un Nacht, wiels hee jesajcht haud, daut hee junt ombrinjen wudd.

²⁶Un ekj bäd: Gott ons HAR, vedoaw nich dien ieejnet Volkj, un waut du derch an aunjefongen hast. Du hast dee opp diene groosoatje Wäaj jerat, un ut Ägipten jebrocht met diene groote Macht.

²⁷Denkj aun Abraham, Isaak un Jakob, dee die deenden, un recht die nich doano woo stieekoppich un bees un vesindicht dit Volkj es.

²⁸Aundasch woaren de Ägipta noch met eemol sajen, daut du dienen Plon, daut du de Israeliten en äa vesproaknet Launt nenn brinjen wust, nich foadich moaken kust. Dee woaren sajen daut du dien Volkj bloos enne Wiltnis nenn neemst om an to venichten, wäajen du an dol wieescht.

²⁹Dit es doch dien ieejnet Volkj, met wäm du grootet aunjefongen hast, un dee du met diene majchtje Krauft un een Oarm dee nich meed wort rut brochst.