Read Plautdietsch (Low German) – De Bibel Johanes 1 Bible Online

Johanes 1 - Plautdietsch (Low German) – De Bibel bible

Johanes 1

¹Aus aules aunfunk, wia daut Wuat, un daut Wuat wia bie Gott, un waut Gott wia, wia daut Wuat.

²Hee wia em Aunfank bie Gott.

³Derch am es aules jemoakt, un onen am es nuscht jemoakt waut jemoakt es.

⁴En am wia Läwen, un daut Läwen wia daut Licht fa de Menschen.

⁵Daut Licht schient em diestren, oba daut diestre haft daut nich vestonen.

⁶Doa kjeem een Maun, von Gott jeschekjt, dee heet Johanes.

⁷Disa kjeem, om von däm Licht to räden un to zeijen, daut see doaderch aula sullen toom Gloowen komen.

⁸Hee wia nich daut Licht, hee wia jeschekjt, no daut Licht hantowiesen.

⁹Daut wia daut woarhauftje Licht, daut fa aule Menschen schient, dee en dise Welt nenkomen.

¹⁰Hee wia en dise Welt, un de Welt wia derch am jemoakt, un de Welt kjand am nich.

¹¹Hee kjeem no daut sienje; oba de sienje neemen am nich opp.

¹²Oba aul dee, dee am oppneemen, un aun sienen Nomen jleewen, jeef hee de Macht, Gott siene Kjinja to woaren.

¹³Dee sent nich derch Bloot, uk nich derch fleescheljet velangen, uk nich derch irjent eenem Maun sienen Wellen jebuaren, nä, dee sent von Gott jebuaren.

¹⁴Un daut Wuat wort Mensch, un wond mank ons. Un wie sagen, woo harlich hee wia, eene Harlichkjeit soo aus een Voda sienem eensjen Sän dee jeft, voll von Jnod un Woarheit.

¹⁵Johanes zeijd von am un säd gaunz lud: Dit es dee, von däm ekj säd: No mie woat komen, dee aul ver mie wia, wiels hee wia ea aus ekj.

¹⁶Von ut siene Volmot hab wie aula jenomen Jnod un mea Jnod.

¹⁷Daut Jesaz wia derch Moses jejäft, oba Jnod un Woarheit kjeemen derch Jesus Christus.

¹⁸Kjeena haft Gott jeemols jeseenen. Oba sien eensja Sän, dee Gott es, un gaunz dicht biem Voda es, dee haft ons aules von am vetalt.

¹⁹Dit es waut Johanes von sikj sajen deed, aus de Juden von Jerusalem Priesta un Leviten no am schekjten, am to froagen: Wäa best du?

²⁰Hee bekjand, hee vestreet daut nich, oba bekjand: Ekj sie nich Christus.

²¹Un see fruagen am: Waut dan? Best du Elia? Hee säd: Nä, ekj sie daut nich. See fruagen am: Best du dee Profeet? Un hee säd: Nä.

²²Dan säden see to am: Wäa best du?, daut wie dee eene Auntwuat jäwen kjennen, dee ons jeschekjt haben. Waut sajchst du von die selfst?

²³Hee säd: “Ekj sie eenem siene Stemm, dee en de Wiltnis schricht: Moakt däm Harn sien Wajch jlikj!”, soo aus de Profeet Jesaja jesajcht haft.

²⁴Dee doa jeschekjt wieren, wieren von de Farisäa.

²⁵Un see fruagen am: Wuarom deepst du dan, wan du nich Christus, uk nich Elia, uk nich de Profeet best?

²⁶Johanes säd to an: Ekj deep junt met Wota. Oba mank junt steit eena, dän jie nich kjanen.

²⁷Daut es dee, dee no mie komen woat. Un dee es soo väl jrata aus ekj, ekj sie nich emol goot jenuach, daut ekj am de Schoo oplees.

²⁸Dit passieed aula en Betanien aun jantsied vom Jordan, wua Johanes deepen deed.

²⁹Aum näakjsten Dach sach Johanes Jesus no sikj opptoo komen un säd: Kjikjt, daut es Gott sien Laum, daut de Welt äare Sinden wajchnemt!

³⁰Dit es dee, von däm ekj säd: No mie kjemt een Maun, dee ver mie wia, wiels hee wia aul doa ea ekj jebuaren wia.

³¹Ekj kjand am selfst nich. Oba ekj kjeem un deept met Wota doawäajen, daut hee en Israel sull bekaunt woaren.

³²Dan zeijd Johanes un säd: Ekj sach dän Jeist soo aus eene Duw vom Himmel raufkomen un opp am bliewen.

³³Ekj kjand am nich. Oba dee, dee mie schekjt, met Wota to deepen, säd to mie: Opp dän du dän Jeist sitst raufkomen, un opp am bliewen, daut es dee, dee met däm Heiljen Jeist deepen deit.

³⁴Un ekj sach daut, un doawäajen kaun ekj sajen, daut dit Gott sien Sän es.

³⁵Aum näakjsten Dach wia Johanes met twee von siene Jinja wada doa.

³⁶Aus hee Jesus sach vebiegonen, säd hee: Kjikjt, daut es Gott sien Laum!

³⁷Aus dee twee Jinja am daut sajen hieeden, jinjen see met Jesus met.

³⁸Jesus dreid sikj om un sach, daut see metkjeemen, un fruach an: Waut sieekj jie? See säden to am: Liera, [1] wua wonst du?

³⁹Hee säd to an: Komt kjikjt! See kjeemen un sagen wua hee bleef, un bleewen dän dachäwa bie am. Daut wia Klock vea nomeddach.

⁴⁰Eena von dee beid, dee Johanes räden hieed un met Jesus metjinkj, wia Andreas, Simon Petrus sien Brooda.

⁴¹Andreas funk daut ieeschte sienen Brooda Simon un säd to am: Wie haben dän Messias jefungen, daut meent: dän Christus!

⁴²Un hee brocht am no Jesus. Aus Jesus am aunkjikjt, säd hee: Du best Simon, Jona sien Sän. Du saust Petrus [2] heeten.

⁴³Dän näakjsten Dach wull Jesus no Galiläa gonen un hee funk Filippus un säd to am: Komm met mie met!

⁴⁴Filippus wia von Betsaida, de Staut wua uk Andreas un Petrus häa kjeemen.

⁴⁵Filippus funk Natanael un säd to am: Wie haben dän jefungen, von däm Moses em Jesaz un uk de Profeeten jeschräwen haben, Jesus von Nazaret, Josef sien Sän.

⁴⁶Un Natanael säd to am: Kaun von Nazaret waut goodet komen? Filippus säd to am: Komm kjikj!

⁴⁷Aus Jesus Natanael komen sach, säd hee to am: Werkjlich een Israelit, en däm nuscht faulschet es.

⁴⁸Natanael säd to am: Woo kjanst du mie? Jesus säd to am: Ea Filippus die roopt, aus du unja däm Fiejenboom wieescht, sach ekj die.

⁴⁹Natanael säd to am: Har, [3] du best de Sän von Gott, du best Kjennich von Israel!

⁵⁰Jesus säd to am: Du jleefst, wäajen ekj säd, daut ekj die unja däm Fiejenboom sach. Du saust noch jratret aus daut seenen.

⁵¹Un hee säd to am: Ekj saj junt de Woarheit: von nu aun sell jie dän Himmel op seenen, un Gott siene Enjel rauf un nopp vom Himmel opp dän Menschensän foaren.