Read Plautdietsch (Low German) – De Bibel Johanes 10 Bible Online

Johanes 10 - Plautdietsch (Low German) – De Bibel bible

Johanes 10

¹Ekj saj junt de Woarheit: Wäa nich derch daut Puat em Schopstaul nenn jeit, oba irjent wua äwaklautat, es een Stäla un een Merda.

²Wäa derch daut Puat nenn jeit, es de Schophoad.

³Fa däm moakt de Däarenwajchta op, un de Schop hieren siene Stemm. Hee roopt siene ieejne Schop biem Nomen, un dee komen am hinjaraun.

⁴Un wan hee siene Schop ieescht buten haft, jeit hee veropp, un de Schop komen hinjaraun. See kjanen siene Stemm.

⁵Dee wudden oba niemols eenem framden hinjaraun gonen, oba von am wajch ranen, wiels see kjanen däm framden siene Stemm nich.

⁶Jesus brukt dit Jlikjnis, oba see vestunden nich, waut hee an doamet sajen wull.

⁷Dan säd Jesus noch eemol to an: Ekj saj junt gaunz opp iernst: Ekj sie de Däa no de Schop.

⁸Aul dee, dee ver mie jekomen sent, sent Stäla un Reiba, oba de Schop horchten nich no an.

⁹Ekj sie de Däa. Wäa derch mie nenn jeit, woat seelich woaren, un woat rut un nenn gonen un Weid finjen.

¹⁰Een Stäla kjemt bloos, om to stälen, to schlachten un enne Grunt to brinjen. Ekj sie jekomen, daut Läwen to brinjen, un daut see daut vollopp haben sellen.

¹¹Ekj sie de gooda Hoad. De gooda Hoad jeft sien Läwen fa de Schop.

¹²Oba een aunjenomna, dee nich Hoad es, un dee Schop nich ieejent, wan dee dän Wulf komen sitt, dee velat de Schop un flicht doavon. Un de Wulf schermetzelt mank de Häad, daut dee uteneen ranen.

¹³De aunjenomna rant wajch, wiels hee es een aunjenomna, un am es daut nich om de Schop to doonen.

¹⁴Ekj sie de gooda Hoad. Ekj kjan miene Schop, un miene Schop kjanen mie,

¹⁵krakjt soo aus de Voda mie kjant un ekj dän Voda kjan. Un ekj jäw mien Läwen fa de Schop.

¹⁶Ekj hab noch aundre Schop, dee nich von dise Häad sent. Dee mott ekj uk nenn brinjen, un dee woaren miene Stemm hieren. Dan woat doa eene Häad un een Hoad sennen.

¹⁷Mien Voda es mie doawäajen goot, wiels ekj mien Läwen hanlaj, om daut wada to nämen.

¹⁸Daut nemt mie kjeena wajch, daut laj ekj ut mie selfst han. Ekj hab de Krauft, daut hantolajen, un hab uk de Krauft, daut wada to nämen. Dit Jeboot hab ekj von mienem Voda jekjräajen.

¹⁹Wiels Jesus dit säd, wia mank de Juden wada eene Spoolunk.

²⁰Väle von an säden: Hee haft eenen beesen Jeist un es verekjt. Towaut horch jie no am?

²¹Aundre säden: Dit sent nich Wieed von eenem, dee eenen beesen Jeist haft. Kaun een beesa Jeist eenem blinjen de Uagen opmoaken?

²²Daut wia Winta, un en Jerusalem wort daut Tempelfast jefieet.

²³Jesus jinkj em Tempel rom, en Salomo siene Haul.

²⁴Dan saumelden de Juden sikj om am un säden: Woo lang helst du ons em Twiewel? Wan du de Christus best, dan saj ons daut frie rut.

²⁵Jesus auntwuad an: Ekj säd junt daut aul, un jie jleewen nich. Dee Woakjen, dee ekj en mienem Voda sienen Nomen doo, räden fa mie.

²⁶Oba jie jleewen nich, wiels jie nich miene Schop sent. Daut es soo aus ekj to junt säd:

²⁷Miene Schop hieren miene Stemm, un ekj kjan an, un dee komen mie hinjaraun.

²⁸Un ekj jäw an eewjet Läwen, un see woaren niemols omkomen, un kjeena kaun dee ut miene Henj rieten.

²⁹Mien Voda, dee mie dee jejäft haft, [22] es jrata aus aules, un kjeena kaun mienem Voda dee ut de Henj rieten.

³⁰Ekj un de Voda sent eent.

³¹Dan hoowen de Juden Steena opp, am to steenjen.

³²Jesus säd to an: Ekj hab junt von mienem Voda väl goode Woakjen jewäsen. Wäajen woont von de Woakjen well jie mie steenjen?

³³De Juden säden to am: Wäajen een goodet Woakj steenj wie die nich, oba wäajen daut lastren, un wiels du een Mensch best un die selfst to Gott moakst.

³⁴Jesus säd to an: Steit en jun Jesaz nich jeschräwen: “Ekj hab jesajcht: Jie sent Jetta”?

³⁵Wan hee dee Jetta nand, no dän daut Gotteswuat kjeem (un de Schreft jeit nich to bräakjen),

³⁶saj jie dan von däm, dän de Voda jeheilicht un enne Welt nenn jeschekjt haft, daut ekj lastren doo, wiels ekj saj, daut ekj Gott sien Sän sie?

³⁷Wan ekj nich mienem Voda siene Woakjen doo, dan jleeft mie nich.

³⁸Oba wan ekj dee doo, un jie uk nich aun mie selfst jleewen, jleeft doch aun dee Woakjen, doamet jie daut seenen un jleewen, daut de Voda en mie es un ekj en am.

³⁹Dan proowden see wada, am faust to nämen. Oba hee kjeem an ut de Henj.

⁴⁰Hee jinkj dan wada äwa no de aundre Sied vom Jordan, wua Johanes ieescht jedeept haud, un bleef doa.

⁴¹Väle kjeemen no am un säden: Johanes haft kjeen Wundatieekjen jedonen. Oba aules, waut hee von disem Maun jesajcht haft, es soo.

⁴²Un doa jleewden väle aun am.