Read Plautdietsch (Low German) – De Bibel Johanes 13 Bible Online

Johanes 13 - Plautdietsch (Low German) – De Bibel bible

Johanes 13

¹Daut wia jrod ver däm Passafast. Jesus wist, daut siene Tiet jekomen wia, dise Welt to veloten un trigj nom Voda to gonen. Hee wia de sienje en dise Welt emma goot jewast. Un soo goot wia hee an uk bat aun sienem Enj.

²Daut wia biem Owentkost äten. De beesa Fient haud däm Judas Iskariot, Simon sien Sän, daut aul en daut Hoat jejäft, Jesus to veroden.

³Un Jesus wist, daut de Voda am aules en de Henj jejäft haud, un daut hee von Gott jekomen wia un wada no Gott jinkj.

⁴Dan stunt hee vom äten opp, läd siene Kjleeda tosied un bunk sikj een Haunduak om.

⁵Hee goot Wota en eene Komm, un funk aun, de Jinja de Feet to wauschen, un drieejd dee met däm Haunduak, daut hee sikj omjebungen haud.

⁶Aus hee bat Simon Petrus kjeem, säd dee to am: Har, wauschst du mie de Feet?

⁷Jesus säd to am: Waut ekj nu doo, vesteist du nu noch nich. Du woascht daut oba nohäa vestonen.

⁸Petrus säd to am: Du saust mie niemols de Feet wauschen! Jesus säd to am: Wan ekj die nich wausch, hast du kjeen Poat aun mie.

⁹Dan säd Simon Petrus to am: Har, nich bloos de Feet, oba uk de Henj un dän Kopp!

¹⁰Jesus säd to am: Wäa jewoschen es, däm brukt sest nuscht aus de Feet [26] jewoschen woaren, wiels hee es gaunz rein. Un jie sent rein, oba nich aula.

¹¹Hee wist, wäa am veroden wudd. Doawäajen säd hee, see wieren nich aula rein.

¹²Aus hee an ieescht de Feet jewoschen haud, neem hee sikj wada siene Kjleeda om un sad sikj dol un säd noch eemol to an: Weet jie, waut ekj junt jedonen hab?

¹³Jie nanen mie Har un Liera, un daut saj jie rajcht, wiels daut es, waut ekj sie.

¹⁴Un wan ekj, jun Har un Liera, junt de Feet jewoschen hab, dan sell jie junt uk unjarenaunda de Feet wauschen.

¹⁵Ekj hab junt een Biespel jejäft, daut jie uk soo doonen, aus ekj junt jedonen hab.

¹⁶Ekj saj junt gaunz opp iernst: Een Kjnajcht es nich jrata aus sien Har, un dee doa jeschekjt es, es nich jrata aus dee, dee am jeschekjt haft.

¹⁷Wan jie dit nu weeten, dan sent jie seelich, wan jie daut uk doonen.

¹⁸Ekj räd nich von junt aula. Ekj weet, wäm ekj utjewält hab. Oba daut mott soo romkomen aus de Schreft sajcht: “Soogoa mien gooda Frint, en däm ekj vetruen haud, dee mien Broot eet, klunjt opp mie met de Feet.”

¹⁹Ekj saj junt daut nu, ea daut passieet, daut jie, wan daut ieescht passieet, jleewen daut ekj dit sie.

²⁰Ekj saj junt de Woarheit: Dee wäa dän oppnemt, dän ekj schekj, dee nemt mie opp. Un wäa mie oppnemt, nemt dän opp, dee mie jeschekjt haft.

²¹Aus Jesus dit jesajcht haud, wia hee em Jeist bedrekjt un säd: Ekj saj junt de Woarheit: Eena von junt woat mie veroden.

²²Dan kjikjten de Jinja sikj unjarenaunda aun un wundaden, von wäm hee räd.

²³Eena von an, dee Jinja, dän Jesus goot wia, wia daut dichste bie Jesus.

²⁴Däm plinkjt Simon Petrus too, hee sull am froagen, wäm hee meend.

²⁵Hee länd sikj trigj aun Jesus naun un fruach am: Har, wäa es daut?

²⁶Jesus säd: Daut es dee, däm ekj daut enjedukte Biet Broot jäw. Un hee dukt een Biet en, un jeef daut Judas, däm Simon Iskariot sienen Sän.

²⁷Un aus Judas daut Biet Broot neem, fua de Soton en am nenn. Dan säd Jesus to am: Waut du doonen west, daut doo boolt!

²⁸Oba doa aum Desch wist kjeena, wuarom Jesus daut to am säd.

²⁹Wiels Judas de Jelttausch haud, dochten eenje, daut Jesus to am säd, hee sull gonen un kjeepen, waut see toom Fast brukten, ooda daut hee waut fa de oame jäwen sull.

³⁰Sooboolt aus Judas daut Broot jenomen haud, jinkj hee rut. Un daut wia Nacht.

³¹Aus Judas ieescht wajch wia, säd Jesus: Nu es de Menschensän veharlicht, un Gott es derch am veharlicht.

³²Wan Gott derch am veharlicht worden es, dan woat Gott am uk en sikj veharlichen, un woat am fuaz veharlichen.

³³Leewe Kjinja, ekj sie aul mau een kortet stootje bie junt. Jie woaren no mie sieekjen. Un soo aus ekj to de Juden säd, saj ekj uk to junt: Wua ekj hango, kjenn jie nich hankomen.

³⁴Ekj jäw junt een nieet Jeboot, jie sellen junt unjarenaunda goot sennen, krakjt soo aus ekj junt goot jewast sie. June Leew fa eenaunda saul jrod soo groot sennen, aus miene Leew fa junt.

³⁵Wan jie Leew unjarenaunda haben, woat aulemaun seenen, daut jie miene Jinja sent.

³⁶Dan fruach Simon Petrus am: Har, wua jeist du han? Jesus säd to am: Wua ekj hango, kjenn jie mie nu nich hinjaraun komen. Oba nohäa woa jie doa uk hankomen.

³⁷Petrus säd to am: Har, wuarom kaun ekj nu nich met die metkomen? Ekj sie reed, mien Läwen fa die to loten.

³⁸Jesus säd to am: Wurscht du dien Läwen fa mie jäwen? Ekj saj die de Woarheit: Ea de Hon kjreien woat, woascht du daut dree mol vesträden haben, daut du mie kjanst.