Read Plautdietsch (Low German) – De Bibel Johanes 14 Bible Online

Johanes 14 - Plautdietsch (Low German) – De Bibel bible

Johanes 14

¹Lot junt nich daut Hoat beorrujen! Jleeft aun Gott un jleeft aun mie! [27]

²En mienem Voda sien Hus sent väl Woninjen. Wan daut nich soo wia, wudd ekj junt daut jesajcht haben. Ekj go aulsoo han, junt de Städ reedtomoaken.

³Un wan ekj hango, de Städ fa junt reedtomoaken, woa ekj trigj komen un junt uk doahan nämen, daut jie doa sent wua ekj sie.

⁴Un jie weeten, wua ekj hango, un jie weeten uk dän Wajch doahan. [28]

⁵Tomas säd to am: Har, wie weeten nich, wua du hanjeist, un woo kjenn wie dän Wajch weeten?

⁶Jesus säd to am: Ekj sie de Wajch, de Woarheit un daut Läwen, kjeena kjemt nom Voda buta derch mie.

⁷Wan jie mie jekjant hauden, wudd jie mienen Voda uk jekjant haben. Von nu aun kjan jie am un haben am jeseenen.

⁸Filippus säd to am: Har, wies ons dän Voda, dan sent wie tofräd.

⁹Jesus säd to am: Ekj sie nu aul soo lang bie junt, un du kjanst mie nich, Filippus? Wäa mie jeseenen haft, haft uk dän Voda jeseenen! Woo kaust du dan noch sajen: Wies ons dän Voda?

¹⁰Jleefst du nich, daut ekj em Voda sie, un daut de Voda en mie es? De Wieed, dee ekj räd, räd ekj nich ut mie selfst. De Voda oba, dee en mie wont, dee wirkjt derch mie.

¹¹Jleeft mie daut, wan ekj saj, daut ekj em Voda sie, un daut de Voda en mie es. Un wan sest nich, dan jleeft doch, wiels jie de Woakjen seenen.

¹²Ekj saj junt de Woarheit: Wäa aun mie jleeft, woat uk daut wirkjen, waut ekj doo, un woat noch jratret aus dit doonen, wiels ekj go no mienen Voda.

¹³Un waut jie en mienen Nomen bäden woaren, daut woa ekj doonen, daut de Voda derch dän Sän jeieet woat.

¹⁴Waut jie [29] en mienen Nomen bäden woaren, woa ekj doonen.

¹⁵Wäa mie goot es, woat miene Jebooten hoolen.

¹⁶Un ekj woa dän Voda froagen, un dee woat junt eenen aundren Treesta jäwen, dee eewich bie junt bliewen woat.

¹⁷Daut es de Jeist, dee Woarheit es, dän de Welt nich kjrieen kaun, wiels dee dän nich sitt un uk nich kjant. Jie oba kjanen dän, wiels dee wont en junt, un woat met junt sennen.

¹⁸Ekj woa junt nich aus Weisenkjinja loten; ekj woa trigj no junt komen.

¹⁹Daut es aul nich mea lang bat de Welt mie nich mea seenen woat. Oba jie woaren mie seenen. Wiels ekj läw, woa jie uk läwen.

²⁰Wan dee Dach kjemt, woat junt daut kloa sennen, daut ekj en mienem Voda sie, un daut jie en mie sent, un ekj en junt.

²¹Wäa miene Jebooten haft un helt, bewiest doamet, daut hee mie goot es. Un wäa mie goot es, dän woat mien Voda goot sennen, un ekj woa am goot sennen un mie am openboaren.

²²Dan säd Judas (nich Iskariot): Har, wuarom west du die bloos ons openboaren, un nich de Welt?

²³Jesus säd to am: Wäa mie goot es, woat mien Wuat hoolen, un däm woat mien Voda goot sennen. Un bie däm woa wie ons komen tus moaken.

²⁴Wäa oba mie nich goot es, helt mien Wuat nich. Un waut jie mie sajen hieren, es nich mien Wuat, oba däm Voda sient, dee mie jeschekjt haft.

²⁵Dit hab ekj to junt jerät, aus ekj noch bie junt wia.

²⁶Oba de Treesta, de Heilja Jeist, dän de Voda en mienen Nomen schekjen woat, dee woat junt aules lieren, un junt aun aul daut denkjen halpen, waut ekj to junt jesajcht hab.

²⁷Fräd lot ekj junt, mienen Fräd jäw ekj junt. Ekj jäw junt nich soo aus de Welt jeft. Lot junt nich daut Hoat beorrujen, un fercht junt nich.

²⁸Jie haben mie sajen jehieet, daut ekj wajchgo, uk daut ekj wada trigj no junt komen woa. Wan jie mie goot sent, wudd jie junt doatoo freien, daut ekj nom Voda go, wiels de Voda es jrata aus ekj.

²⁹Ekj hab junt daut nu jesajcht, ea daut passieet, daut jie dan jleewen woaren, wan daut passieet.

³⁰Ekj woa nich lenja met junt räden, wiels dee, dee äwa dise Welt rejieet, es aul aum komen. Hee haft äwa mie kjeene Macht.

³¹Oba de Welt mott weeten, daut ekj dän Voda goot sie, un daut ekj doawäajen aules doo, waut hee mie oppjedroacht haft. Komt, well wie wieda gonen.