Read Plautdietsch (Low German) – De Bibel Johanes 15 Bible Online

Johanes 15 - Plautdietsch (Low German) – De Bibel bible

Johanes 15

¹Ekj sie de rajchte Wienstud, un mien Voda es de Wiengoadna.

²Aule Ranken aun mie, dee nich Frucht droagen, schnitt hee auf. Oba aule Ranken, dee doa Frucht droagen, reinicht hee, daut dee mea Frucht brinjen kjennen.

³Jie sent aul derch daut Wuat jereinicht, daut ekj to junt jerät hab.

⁴Blieft en mie, un ekj woa en junt bliewen. Soo aus eene Rank nich Frucht brinjen kaun, wan dee nich aune Wienstud blift, soo kjenn jie uk nich Frucht brinjen, wan jie nich en mie bliewen.

⁵Ekj sie de Wienstud, un jie sent de Ranken. Wäa en mie blift un ekj en am, dee brinjt väl Frucht. Onen mie kjenn jie nuscht doonen.

⁶Wäa nich en mie blift, dee woat soo aus eene Rank wajch jeschmäten. De wajch jeschmätne Rank vedrieecht. Dan woat dee oppjesaumelt un em Fia jeschmäten un vebrent.

⁷Wan jie en mie bliewen un miene Wieed en junt bliewen, dan froacht no waut jie wellen, un junt woat daut jejäft woaren.

⁸Mien Voda woat doaderch jeieet, wan jie väl Frucht brinjen un miene Jinja woaren.

⁹Soo aus Gott mie goot es, soo sie ekj junt uk goot. Lot junt von mie goot sennen un läft doano!

¹⁰Wan jie miene Jebooten hoolen, woa jie junt von mie goot sennen loten, jrod soo aus ekj mienen Voda siene Jebooten hool un mie von am goot sennen lot.

¹¹Ekj hab junt dit jesajcht, daut miene Freid en junt bliewen mucht, un daut jie junt gaunz freien kjennen.

¹²Dit es mien Jeboot, daut jie junt unjarenaunda soo goot sent, aus ekj junt goot sie.

¹³Kjeena jeft mea rom om dän näakjsten aus dit, daut hee sien Läwen fa siene Frind jeft.

¹⁴Jie sent miene Frind, wan jie doonen, waut ekj junt saj.

¹⁵Ekj nan junt nich mea Deena, wiels een Deena weet nich, waut sien Har deit. Ekj hab junt Frind jenant, wiels ekj junt aules jesajcht hab, waut ekj von mienem Voda jehieet hab.

¹⁶Jie haben mie nich jewält, oba ekj hab junt jewält un aunjestalt, daut jie gonen un Frucht droagen, Frucht, dee doa bliewen woat. Dan woat de Voda junt jäwen, om waut jie en mienem Nomen bäden.

¹⁷Dit Jeboot jäw ekj junt: Siet eena dän aundren goot.

¹⁸Wan de Welt junt nich lieden deit, dan denkjt doaraun, daut see ieescht mie nich jeläden haft.

¹⁹Wan jie noch von dise Welt wieren, wudd de Welt daut äaje goot sennen. Nu sent jie oba nich von dise Welt, wiels ekj junt doa rut jewält hab, un doawäajen kaun de Welt junt nich lieden.

²⁰Denkjt doaraun, waut ekj junt jesajcht hab: Een Kjnajcht es nich jrata aus sien Har. Wan see mie nojestonen haben, woaren see junt uk nostonen. Un wan see mien Wuat jehoolen haben, woaren see junt uk hoolen.

²¹Dit woaren see junt aula wäajen mienen Nomen aundoonen, wiels see dän nich kjanen, dee mie jeschekjt haft.

²²Wan ekj nich jekomen wia un an daut jesajcht haud, dan hauden see kjeene Sind. Nu oba kjennen see nuscht väajäwen, äare Sind to entschuljen.

²³Wäa jäajen mie es, dee es uk jäajen mienen Voda.

²⁴Wan ekj mank an nich de Woakjen jedonen haud, dee kjeen aundra jedonen haft, dan hauden see kjeene Sind. Nu oba haben see dee jeseenen un kjennen mie doch nich lieden, nich mie un uk nich mienen Voda.

²⁵Oba daut mott soo romkomen aus de Spruch en äa Jesaz sajcht: “See sent jäajen mie onen Uasoak”.

²⁶Wan de Treesta komen woat, dän ekj junt vom Voda schekjen woa, de Jeist, dee Woarheit es un vom Voda utjeit, dee woat von mie zeijen.

²⁷Un wiels jie von Aunfank aun bie mie jewast sent, sent jie uk miene Zeijen.