Read Plautdietsch (Low German) – De Bibel Johanes 16 Bible Online

Johanes 16 - Plautdietsch (Low German) – De Bibel bible

Johanes 16

¹Ekj hab junt dit aula jesajcht, daut jie nich vom Gloowen erren sellen.

²See woaren ut june Judenschoolen utjeschloten woaren. Un doa woat eene Tiet komen, daut see meenen, see doonen Gott eenen Deenst, wan see junt doot moaken.

³Un daut woaren see doonen, wiels see nich mienen Voda kjanen un uk nich mie.

⁴Oba ekj hab junt dit jesajcht, daut wan dee Tiet kjemt, daut jie dan doaraun denkjen, daut ekj junt daut jesajcht hab. Aum Aunfank säd ekj junt dit noch nich, wiels ekj don noch bie junt wia.

⁵Nu oba go ekj trigj no däm, dee mie jeschekjt haft. Un kjeena von junt frajcht mie: Wua jeist du han?

⁶Wiels ekj junt dit jesajcht hab, es jun Hoat truarich jeworden.

⁷Oba ekj saj junt de Woarheit: Fa junt es daut goot, daut ekj wajchgo. Wiels wan ekj nich wajchgo, kjemt de Treesta nich no junt. Wan ekj oba go, woa ekj junt dän schekjen.

⁸Un wan dee komen woat, woat hee de Welt de Uagen opmoaken [30] äwa waut Sind es un äwa waut Jerajchtichkjeit es un äwa waut Jerecht es.

⁹Äwa waut Sind es: Daut see nich aun mie jleewen.

¹⁰Äwa waut Jerajchtichkjeit es: Daut ekj nom Voda go un jie mie nich mea seenen woaren.

¹¹Äwa waut Jerecht es: Daut dee, dee äwa dise Welt Jewault eewen deit, jerecht worden es.

¹²Ekj hab junt noch väl to sajen, oba jie kjennen daut nu nich vedroagen.

¹³Oba wan de Jeist, dee Woarheit es, komen woat, dee woat junt de volle Woarheit lieren. Hee woat nich von sikj selfst räden. Hee woat bloos daut räden, waut hee jehieet haft, un woat junt sajen, waut noch komen saul.

¹⁴Hee woat mie veharlichen. Hee woat vom mienjen nämen, un junt daut sajen un dietlich moaken.

¹⁵Aules waut de Voda haft, es uk mient. Doawäajen säd ekj: Hee woat daut vom mienjen nämen un junt daut sajen.

¹⁶Om eene korte Tiet woa jie mie nich seenen, un wada om eene korte Tiet woa jie mie seenen, wiels ekj nom Voda go.

¹⁷Dan säden eenje von siene Jinja bie sikj: Waut meent hee doamet, wan hee sajcht: Jie woaren mie om eene korte Tiet nich seenen, un wada om eene korte Tiet woa jie mie seenen, un uk: Wiels ekj nom Voda go?

¹⁸Doawäajen säden see: Waut meent hee met eene korte Tiet? Wie weeten nich, waut hee ons sajen well.

¹⁹Jesus wist, daut see am jieren froagen wullen, un dan säd hee to an: Froag jie junt unjarenaunda, waut ekj doamet meend, wan ekj säd: Jie woaren mie om eene korte Tiet nich seenen, un wada om eene korte Tiet woa jie mie seenen?

²⁰Ekj saj junt de Woarheit: Jie woaren hielen un jaumarieren wäarent de Welt sikj freien woat. Jie woaren truaren, oba jun truarich sennen saul sikj omendren toom sikj freien.

²¹Wan eene Fru een Kjint to Welt brinjt, es see bekjemmat, wiels äare Tiet es jekomen. Oba wan daut Kjint ieescht jebuaren es, es de Freid, daut see een Kjint to Welt jebrocht haft soo groot, daut see von aul äaren Trua vejat.

²²Doawäajen sent jie nu uk truarich. Oba ekj woa junt wada seenen, un dan woa jie junt von Hoaten freien, un dee Freid saul junt kjeena wajchnämen.

²³Wan dee Dach kjemt, woa jie mie no nuscht mea froagen. Ekj saj junt de Woarheit: Mien Voda woat junt aules jäwen om waut jie en mienen Nomen froagen.

²⁴Bat nu hab jie om nuscht en mienen Nomen jefroacht. Froacht, un jie woaren kjrieen, daut junt daut aun kjeene Freid fält.

²⁵Ekj hab Bildasproak jebrukt, junt dit to sajen. Oba de Tiet kjemt, daut ekj nich mea en Bildasproak to junt räden woa, oba junt daut direkjt un kloa von mienem Voda vetalen woa.

²⁶Wan dee Dach kjemt, woa jie en mienen Nomen froagen. Un ekj saj nich, daut ekj dän Voda en june Städ froagen woa.

²⁷De Voda selfst es junt goot. Hee es junt goot, wiels jie mie goot sent un jleewen, daut ekj von Gott jekomen sie.

²⁸Ekj kjeem vom Voda un sie en dise Welt nenjekomen, un woa dise Welt wada veloten un trigj nom Voda gonen.

²⁹Siene Jinja säden to am: Nu see wie, daut du frie rut to ons rätst un nich mea Bildasproak brukst.

³⁰Nu see wie, daut du aules weetst, un nich needich hast, daut die wäa waut frajcht. Doawäajen jleew wie, daut du von Gott jekomen best.

³¹Jesus fruach an: Jleew jie dan nu?

³²De Tiet kjemt, un es aul hia, daut jie woaren vestreit woaren, een jiedra fa sikj, un woaren mie auleen loten. Oba ekj sie nich auleen, de Voda es bie mie.

³³Dit hab ekj junt aula doawäajen jesajcht, daut jie en mie Fräd haben. En dise Welt hab jie Angst, oba siet jetroost, ekj hab jäajen dise Welt jewonnen.