Read Plautdietsch (Low German) – De Bibel Johanes 17 Bible Online

Johanes 17 - Plautdietsch (Low German) – De Bibel bible

Johanes 17

¹Aus Jesus dit jesajcht haud, kjikjt hee nom Himmel un säd: Voda, de Tiet es jekomen. Moak dienen Sän harlich, daut dien Sän die uk veharlicht.

²Du hast am de Volmacht äwa de gaunze Menschheit jejäft, aul dee daut eewje Läwen to jäwen, dee du am jejäft hast.

³Daut eewje Läwen es dit: daut see die, dän eensich woaren Gott, un Jesus Christus, dän du jeschekjt hast, kjanen lieren.

⁴Ekj hab die opp de Ieed doaderch veharlicht, daut ekj daut Woakj verecht hab, daut du mie jejäft hast to doonen.

⁵Un Voda, nu veharlich mie bie die met dee Harlichkjeit, dee ekj bie die haud, ea de Welt jeschaufen wort.

⁶Ekj hab de Menschen, dee du mie ut dise Welt jejäft hast, met dienem Nomen bekaunt jemoakt. Daut wieren diene, un du jeefst mie dee, un dee haben dien Wuat jehoolen.

⁷Nu weeten see, daut aules von die kjemt, waut du mie jejäft hast.

⁸Dee Wieed, dee du mie jejäft hast, hab ekj an jejäft. See haben dee aunjenomen, un weeten woarhauftich, daut ekj von die jekomen sie, un jleewen, daut du mie jeschekjt hast.

⁹Ekj froag fa an. Ekj froag nich fa de Welt, oba fa dee, dee du mie jejäft hast, wiels daut sent diene.

¹⁰Aules waut ekj hab, es dient, un aules waut du hast es mient, un ekj sie en an veharlicht.

¹¹Ekj sie nich mea en dise Welt. Oba dise sent en de Welt. Un ekj kom no die. Heilja Voda, hool dee secha, en dienen Nomen, dän du mie jejäft hast, daut see eent sent, soo aus wie eent sent.

¹²Soolang aus ekj bie an wia, hilt ekj an en dienen Nomen, dän du mie jejäft hast, un ekj hab no an oppjepaust. Kjeena von an es veloaren jegonen, buta dee eena, dee veloaren gonen must, daut daut soo wort, aus jeschräwen steit.

¹³Oba nu kom ekj no die, un dit räd ekj en dise Welt, daut see miene Freid voll un gaunz en sikj haben kjennen.

¹⁴Ekj hab an dien Wuat jejäft, un de Welt es an fientlich, wiels see nich von dise Welt sent, jrod soo aus ekj uk nich von dise Welt sie.

¹⁵Ekj froag nich doafäa, daut du an ut dise Welt nämen saust, oba daut du an verem beesen bewoaren saust.

¹⁶See sent nich von dise Welt, jrod soo aus ekj uk nich von dise Welt sie.

¹⁷Heilj an en de Woarheit, dien Wuat es de Woarheit.

¹⁸Soo aus du mie en de Welt nenn jeschekjt hast, hab ekj an en de Welt nenn jeschekjt.

¹⁹Ekj heilj mie selfst fa an, daut see uk derch de Woarheit jeheilicht woaren.

²⁰Ekj froag nich bloos fa dise, oba uk fa dee, dee derch äa Wuat aun mie jleewen woaren.

²¹See sellen aula eent sennen, soo aus du, Voda, en mie un ekj en die, daut see uk en ons eent sent, soo daut de Welt daut jleeft, daut du mie jeschekjt hast.

²²De Harlichkjeit, dee du mie jejäft hast, hab ekj an jejäft, daut see eent sennen muchten, soo aus wie eent sent.

²³Ekj en an un du en mie, daut see gaunz eent sent, daut de Welt doaraun seenen kaun, daut du mie jeschekjt hast un an soo goot best aus du mie goot best.

²⁴Voda, ekj well, daut dee, dee du mie jejäft hast, uk doa sent wua ekj sie, un daut see miene Harlichkjeit seenen, dee du mie jejäft hast. Du wieescht mie goot, ea de Welt äaren Grunt haud.

²⁵Jerajchta Voda! De Welt haft die nich jekjant, oba ekj kjan die, un dise weeten, daut du mie jeschekjt hast.

²⁶Ekj hab an met dienen Nomen bekaunt jemoakt, un woa daut wieda doonen, daut dee Leew, met dee du mie goot wieescht, en an sennen mucht, un ekj en an.