Read Plautdietsch (Low German) – De Bibel Johanes 18 Bible Online

Johanes 18 - Plautdietsch (Low German) – De Bibel bible

Johanes 18

¹Aus Jesus dit aula jesajcht haud, jinkj hee met siene Jinja no de aundre Sied vom Kidron Tol. Doa wia een Goaden, en dän hee met siene Jinja nenjinkj.

²Un Judas Iskariot, dee am verod, wist uk wua dee Städ wia, wiels Jesus troff sikj doa foaken met siene Jinja.

³Dan kjeem Judas met eene Grupp Soldoten un Tempelwajchta, dee de Huagepriesta un Farisäa am jestalt hauden, met Latoarns, Laumpen un Jewäaren.

⁴Wiels Jesus aules wist, waut am bejäajnen wudd, jinkj hee rut un säd to an: Wäm sieekj jie?

⁵See säden: Jesus von Nazaret. Jesus säd to an: Ekj sie dee! Un Judas, dee am veroden deed, stunt doa uk bie an.

⁶Aus hee to an säd, daut hee dee wia, trocken see sikj trigj un follen opp de Ieed.

⁷Dan fruach hee an noch eemol: No wäm sieekj jie? See säden: Jesus von Nazaret.

⁸Jesus säd: Ekj hab junt jesajcht, daut ekj dee sie! Wan jie mie sieekjen, dan lot dise gonen!

⁹Daut sull soo romkomen, aus hee jesajcht haud: Von dee, dee du mie jejäft hast, hab ekj kjeent veloaren.

¹⁰Simon Petrus haud een Schwieet. Daut trock hee rut un heiwd no däm Huagenpriesta sien Kjnajcht un schneet am daut rajchte Ua auf. Dee Kjnajcht heet Malchus.

¹¹Dan säd Jesus to Petrus: Stäakj dien Schwieet trigj enne Scheed! Sull ekj nich ut daut Kuffel drinkjen, daut de Voda mie jejäft haft?

¹²De Soldoten met äa Leida un de Juden met äare Tempelwajchta kjeemen dan un neemen Jesus faust un bungen am.

¹³See brochten am ieeschtens no Hanas, Kaifas sienen Schwieevoda. Kaifas wia daut Joa Huagapriesta.

¹⁴Daut wia Kaifas, dee de Juden dän Rot jejäft haud, daut daut goot sennen wudd, daut een Maun fa daut gaunze Volkj stoawen wudd.

¹⁵Simon Petrus un noch een aundra Jinja jinjen Jesus hinjaraun. De aundra Jinja wia däm Huagenpriesta bekaunt, un soo jinkj dee met Jesus en dän Huagenpriesta sien Paulaust nenn.

¹⁶Oba Petrus stunt buten ver de Däa. Dan jinkj de aundra Jinja, dän de Huagapriesta kjand, rut un räd met de Deenarin, dee äwa de Däa woakt, un brocht Petrus nenn.

¹⁷De Däarenwajchtarin säd to Petrus: Best du nich uk eena von disen Maun siene Jinja? Hee säd: Nä, ekj sie nich.

¹⁸Wiels daut kjeel wia, hauden de Deena un Tempelwajchta sikj een Kolenfia jemoakt un stunden doa rom un woamden sikj. Un Petrus stunt bie an un woamd sikj uk.

¹⁹De Huagapriesta fruach Jesus no siene Jinja un uk no siene Lia.

²⁰Jesus säd to am: Ekj hab frie un open en dise Welt jerät. Ekj hab emma en de Schoolen un em Tempel jelieet, wua de Juden toopkomen, un ekj hab nuscht em Jeheemen jedonen.

²¹Wuarom frajchst du mie? Froag dee, dee mie jehieet haben. Dee weeten waut ekj jesajcht hab.

²²Aus Jesus dit säd, schluach eena von de Deenasch, dee doa dicht bie stunden, am em Jesecht un säd: Soo auntwuatst du däm Huagenpriesta?

²³Jesus säd to am: Wan ekj eene ojjeschekjte Auntwuat jejäft hab, dan bewies mie daut, oba wan nich, wuarom schleist du mie dan?

²⁴Dan schekjt Hanas am jebungen no Kaifas, dän Huagenpriesta.

²⁵Un Simon Petrus stunt un woamd sikj. Dan säden see to am: Best du nich uk eena von siene Jinja? Hee oba veluach daut un säd: Ekj sie nich.

²⁶Dan säd eena von däm Huagenpriesta siene Deena, een Frint aun dän, dän Petrus daut Ua aufjeschnäden haud: Sach ekj die nich bie am em Goaden?

²⁷Petrus veluach daut noch eemol, un plazlich doaropp kjreid de Hon.

²⁸Dan leiden see Jesus von Kaifas nom Rechthus. Daut wia aul tiedich zemorjes. See selfst oba jinjen nich em Rechthus nenn, om sikj nich to veorreinjen, daut see daut Passamol äten kunnen.

²⁹Dan jinkj Pilatus rut no an, un fruach: Wuamet beschulj jie disen Maun?

³⁰Äare Auntwuat wia: Wan hee nich een Vebräakja wia, wudd wie am nich no die jebrocht haben.

³¹Pilatus säd to an: Nämt jie am un recht am no jun Jesaz. De Juden säden to am: Wie haben nich daut Rajcht, wäm doot to moaken.

³²Soo sull erfelt woaren waut Jesus jesajcht haud, aus hee aundied, waut fa een Doot hee stoawen wudd.

³³Dan jinkj Pilatus wada em Rechthus nenn un leet Jesus komen un fruach am: Best du de Judenkjennich?

³⁴Jesus säd to am: Frajchst du dit ut die selfst, ooda haben aundre die von mie vetalt?

³⁵Pilatus säd: Sie ekj een Jud? Dien ieejnet Volkj un de Huagepriesta haben die hia no mie jebrocht. Waut hast du jedonen?

³⁶Jesus säd: Mien Kjennichrikj es nich von dise Welt. Wan mien Kjennichrikj von dise Welt wia, wudden miene Deena jekjamft haben, daut ekj von de Juden nich faust jenomen wort. Oba mien Kjennichrikj es nich von dise Welt.

³⁷Dan säd Pilatus to am: Du best dan oba een Kjennich? Jesus säd: Du sajchst rajcht, ekj sie een Kjennich. Ekj sie doatoo jebuaren un en de Welt jekomen, daut ekj fa de Woarheit enstonen saul. Wäa daut met de Woarheit helt, horcht no mie.

³⁸Pilatus säd to am: Waut es Woarheit? Un aus hee dit jesajcht haud, jinkj hee wada rut no de Juden un säd to an: Ekj finj kjeene Schult aun am.

³⁹Oba jie haben je de Mood, daut ekj junt toom Passafast wäm loosjäwen doo. Saul ekj junt dän Judenkjennich loosjäwen?

⁴⁰Dan schrieejen see aula wada: Nich disen Maun, oba Barabas! Barabas oba wia een Reiba.