Read Plautdietsch (Low German) – De Bibel Johanes 19 Bible Online

Johanes 19 - Plautdietsch (Low German) – De Bibel bible

Johanes 19

¹Dan neem Pilatus Jesus un leet am vepitschen.

²Un de Soldoten flochten eene Kroon von Stachels un saden am dee opp dän Kopp, un hongen am eenen bleiwrooden Äwarock om.

³Dan säden see: Wie jreessen die, Judenkjennich. Un see schluagen am opp de Baken.

⁴Pilatus jinkj noch eemol rut un säd to an: Kjikjt eemol, ekj brinj junt dän rut, daut jie seenen kjennen, daut ekj kjeene Schult aun am finj.

⁵Jesus kjeem rut met eene Stachelkroon oppem Kopp un eenen bleiwrooden Äwarock om. Un Pilatus säd to an: Kjikjt, waut fa een Mensch!

⁶Aus de Huagepriesta un Deena am sagen, schrieejen see: Aun daut Kjriez met am! Aun daut Kjriez met am! Pilatus säd: Nämt jie am un kjriezicht am, wiels ekj finj kjeene Schult aun am.

⁷De Juden säden: Wie haben een Jesaz, un no daut Jesaz sull hee doot jemoakt woaren, wiels hee sikj selfst toom Sän von Gott jemoakt haft.

⁸Aus Pilatus daut sajen hieed, fercht hee sikj noch mea.

⁹Hee jinkj noch eemol em Rechthus nenn un fruach Jesus, wua hee häa wia. Oba Jesus jeef am kjeene Auntwuat.

¹⁰Dan säd Pilatus to am: Rätst du nich met mie? Weetst du nich, daut ekj de Krauft hab, die frie to loten, un uk die to kjriezjen?

¹¹Jesus säd: Du hast äwahaupt kjeene Krauft äwa mie, wan dee die nich von bowen jejäft worden wia. Doawäajen haft dee, dee mie en diene Henj jejäft haft, de jratre Sind.

¹²Von dan aun tracht Pilatus doano, am loos to loten. Oba de Juden schrieejen trigj: Wan du disen loos latst, best du nich däm Kjeisa sien Frint. Wäa sikj selfst toom Kjennich moakt, es jäajen dän Kjeisa.

¹³Aus Pilatus daut sajen hieed, brocht hee Jesus rut un sad sikj opp dän Rechtastool, aun dän Wajch dee gaunz met Steena belajcht wia, waut see opp äare Sproak Gabata nanden.

¹⁴Daut wia de Dach verem Passafast, aus see reedmuaken toom Fast, ojjefäa Klock twalw oppmeddach. Un hee säd to de Juden: Kjikjt, dit es jun Kjennich!

¹⁵See oba schrieejen: Wajch met am! Wajch met am! Kjriezicht am! Pilatus säd to an: Saul ekj junen Kjennich kjriezjen? De Huagepriesta säden: Wie haben kjeenen Kjennich buta dän Kjeisa!

¹⁶Schlieslich jeef Pilatus am han, daut see am kjriezjen kunnen. See neemen Jesus un leiden am wajch.

¹⁷Un hee druach sien ieejnet Kjriez, un jinkj doamet no eenen Plauz, dän see Schädelplauz nanden, en hebräisch, Golgata.

¹⁸Doa kjriezijden see am, un noch twee aundre, am en de Medd un aun jieda Sied eenen.

¹⁹Pilatus schreef eene Äwaschreft un stald dee opp daut Kjriez. Un dit es waut hee schreef: Jesus von Nazaret, de Judenkjennich.

²⁰Väl Juden lausen dise Äwaschreft, wiels de Plauz, wua Jesus jekjriezicht wort, dicht bie Jerusalem wia, un dee wia en hebräisch, latiensch un griechisch jeschräwen.

²¹Dan säden de judsche Huagepriesta to Pilatus: Schriew nich, de Judenkjennich, oba daut hee säd, hee wia de Judenkjennich.

²²Pilatus säd: Waut ekj jeschräwen hab, hab ekj jeschräwen.

²³Aus de Soldoten Jesus jekjriezicht hauden, neemen see Jesus siene Kjleeda un deelden dee en vea Deelen, fa jiedrem een Deel, un soo uk dän Äwarock. De Äwarock oba wia een gaunz en eent jewownet Stekj, onen Not.

²⁴Dan säden de Soldoten eena toom aundren: Well wie dän nich tweirieten, oba leewa Lessa trakjen, to seenen, wäa dän haben saul. De Schreft sull erfelt woaren, soo aus jeschräwen steit: “See deelden sikj miene Kjleeda en un losten äwa mienen Äwarock.” Un daut es, wuarom de Soldoten daut deeden.

²⁵Biem Kjriez stunden Jesus siene Mutta, un siene Mutta äare Sesta Maria, Klopas siene Fru, un Maria Magdalena.

²⁶Aus Jesus siene Mutta sach un uk dän Jinja, dän hee goot wia, bie ar stonen, säd hee to siene Mutta: Fru, kjikj emol, daut es dien Sän!

²⁷Un dan säd hee to däm Jinja: Kjikj emol, daut es diene Mutta! Un von de Stund aun neem hee däa no sien Hus.

²⁸Nohäa, un aus Jesus wist, daut nu aules jeworden wia, un doamet de Schreft erfelt wort soo aus jeschräwen stunt, säd hee: Mie darscht!

²⁹Doa stunt een Jefäs met Wienädikj. Dan neemen see eenen Schwom un leeten dän voll dän Wienädikj trakjen, spekjten dän opp eenen Stock un hilden am dän nom Mul.

³⁰Un aus Jesus dän Wienädikj jekjräajen haud, säd hee: Nu es aules foadich jebrocht! Dan buach hee dän Kopp rauf un jeef sienen Jeist opp.

³¹Daut wia dee Dach, aun däm see sikj reedmuaken fa dän grooten Sabat. Un see wullen nich haben, daut de Doodes aum Sabat aum Kjriez henjen sullen. Doawäajen fruagen see Pilatus, auf hee de Doodes nich wudd loten de Been bräakjen, daut dee kunnen vom Kjriez jenomen woaren.

³²Dan kjeemen de Soldoten un bruaken däm ieeschten de Been un uk däm aundren, dee met am jekjriezicht wia.

³³Oba aus see no Jesus kjeemen un sagen, daut hee aul jestorwen wia, bruaken see am nich de Been.

³⁴Oba eena von de Soldoten stuak am met däm Spies en de Sied, un doa rand Bloot un Wota rut.

³⁵Un dee daut jeseenen haft, es Zeij doafäa, un weet, daut daut soo es. Un hee weet, daut hee de Woarheit rät, soo daut jie uk jleewen kjennen.

³⁶Dit wort soo jedonen, daut aules soo passieed aus jeschräwen steit: “Jie sellen am kjeen Been bräakjen.”

³⁷Un opp eene aundre Städ sajcht de Schreft: “See woaren dän seenen, dän see derchjestoaken haben.”

³⁸No disem kjeem Josef von Arimatäa un fruach Pilatus, auf hee Jesus vom Kjriez rauf nämen durf. Josef wia eena von Jesus siene Jinja, oba hee hilt daut stell ut Angst fa de Juden. Un Pilatus jeef am de Frieheit. Soo kjeem hee un neem dän Dooden Jesus rauf.

³⁹Uk Nikodemus, dee verhäa bie Nacht no Jesus jekomen wia, kjeem un brocht hundat Punt Mirren un Aloen toopjemenjt.

⁴⁰Dan neemen see dän Dooden un wekjelden dän met de Jewirtssaulw toop en Loakes en, soo aus de Juden äare Doodes begrowden.

⁴¹Doa wua Jesus jekjriezicht wort, wia een Goaden, un en däm Goaden een nieet Grauf, wua noch kjeena bennen jeläajen haud.

⁴²Wiels daut de Dach ver däm Sabat wia, un daut Grauf dicht bie wia, läden see Jesus doa nenn.