Read Plautdietsch (Low German) – De Bibel Johanes 20 Bible Online

Johanes 20 - Plautdietsch (Low German) – De Bibel bible

Johanes 20

¹Tiedich aum ieeschten Dach von de Wäakj, aus daut noch diesta wia, kjeem Maria Magdalena nom Grauf. See sach, daut de Steen vom Grauf wajchjenomen wia.

²Dan rand see un kjeem no Simon Petrus un no däm aundren Jinja, dän Jesus goot wia, un säd to an: See haben dän Harn ut däm Grauf rutjenomen, un wie weeten nich, wua see am hanjelajcht haben.

³Dan jinjen Petrus un de aundra Jinja rut un jinjen nom Grauf.

⁴See randen beid. De aundra Jinja kunn dolla ranen aus Petrus un kjeem daut ieeschte nom Grauf.

⁵Hee bekjt sikj un kjikjt doa nenn, un sach de Loakes doa ligjen. Hee jinkj oba nich nenn.

⁶Dan kjeem Simon Petrus am no un jinkj em Grauf nenn, un sach uk de Loakes doa ligjen.

⁷Un daut Schweetduak, daut hee om dän Kopp jehaut haud, lach oba nich bie de Loakes, oba toopjelajcht opp eene aundre Städ.

⁸Dan jinkj de aundra Jinja, dee daut ieeschte nom Grauf jekomen wia, uk nenn, un hee sach un jleewd daut.

⁹See wisten noch nich, daut de Schreft säd, daut hee vom Doot oppstonen must.

¹⁰Dan jinjen de Jinja wada no Hus.

¹¹Oba Maria stunt buten biem Grauf un hield. Biem hielen bekjt see sikj un kjikjt em Grauf nenn.

¹²Un see sach doa twee Enjel en witte Kjleeda, eenen biem Koppenenj un eenen biem Feetenenj, wua Jesus sien Kjarpa jeläajen haud.

¹³Dee säden to ar: Fru, wuarom hielst du? See säd to an: Wiels see mienen Harn wajch jenomen haben, un ekj weet nich, wua see am hanjelajcht haben.

¹⁴Aus see dit jesajcht haud, dreid see sikj rom un sach Jesus doa stonen un wist nich, daut daut Jesus wia.

¹⁵Jesus säd to ar: Fru, wuarom hielst du? No wäm sieekjst du? See docht, daut wia de Goadna, un säd to am: Har, wan du am wajch jedroacht hast, dan saj mie, wua du am jeloten hast. Dan woa ekj am holen.

¹⁶Jesus säd to ar: Maria! See dreid sikj om un säd to am: Rabunie! Daut meent: Liera.

¹⁷Jesus säd to ar: Fot mie nich aun, ekj sie noch nich noppjefoaren no mienen Voda. Oba go no miene Breeda un saj to an: Ekj woa noppfoaren no mienen Voda un junen Voda, un no mienen Gott un junen Gott.

¹⁸Maria Magdalena kjeem un säd de Jinja, daut see dän Harn jeseenen haud, un daut hee dit to ar jesajcht haud.

¹⁹Dan dän ieeschten Dach en de Wäakj zeowes, aus de Jinja toop wieren un ut Forcht fa de Juden de Däaren toojeschloten hauden, kjeem Jesus un stunt mank an un säd: Fräd met junt!

²⁰Aus hee dit jesajcht haud, wees hee an siene Henj un siene Sied. Dan wieren de Jinja froo, daut see dän Harn sagen.

²¹Jesus säd noch een mol: Fräd met junt! Soo aus de Voda mie jeschekjt haft, soo schekj ekj junt.

²²Aus hee daut jesajcht haud, pust hee sienen Odem äwa an un säd: Nämt dän Heiljen Jeist!

²³Wan jie wäm de Sinden vejäwen, däm sent dee vejäft, un wäm jie dee nich vejäwen, däm sent dee nich vejäft.

²⁴Tomas de Zwillinkj, eena von de Twalw, wia nich bie an, aus Jesus kjeem.

²⁵Aus de aundre Jinja am säden, daut see dän Harn jeseenen hauden, säd hee: Ekj woa daut nich jleewen, bat ekj de Näajelstäden en siene Henj see un miene Finjasch doa nenn laj, un miene Haunt en siene Sied laj.

²⁶Om acht Doag wieren de Jinja wada bennen, un Tomas wia uk doa. Dan kjeem Jesus, aus de Däaren toojeschloten wieren, un stunt medden mank an un säd: Fräd met junt!

²⁷Dan säd hee to Tomas: Rieekj emol dienen Finja häa un kjikj no miene Henj, un rieekj diene Haunt häa un laj dee en miene Sied. Un jeff die nich däm Ongloowen han, oba jleew!

²⁸Dan säd Tomas to am: Mien Har, un mien Gott!

²⁹Jesus säd to am: Tomas, du jleefst nu, wiels du mie jeseenen hast. Seelich sent dee, dee nich seenen un doch jleewen!

³⁰Jesus deed noch väl aundre Tieekjens ver siene Jinja, dee nich en disem Buak jeschräwen sent.

³¹Dise oba sent jeschräwen, daut jie jleewen kjennen, daut Jesus de Christus, Gott sien Sän, es, un daut jie derch dän Gloowen en sienem Nomen daut Läwen haben.