Read Plautdietsch (Low German) – De Bibel Johanes 21 Bible Online

Johanes 21 - Plautdietsch (Low German) – De Bibel bible

Johanes 21

¹Nohäa leet Jesus sikj noch eemol von siene Jinja seenen aum See Tiberias. Un dit es woo hee daut deed:

²Doa wieren Simon Petrus, Tomas de Zwillinkj, Natanael von Kana en Galiläa, Zebedäus siene Säns un noch twee aundre Jinja.

³Simon Petrus säd to an: Ekj go feschen. See säden to am: Dan kom wie uk met. See jinjen fuaz rut, stieejen en de Lomm un fuaren loos. Oba dee Nacht kjrieejen see nuscht.

⁴Tiedich zemorjes stunt Jesus aun de Wotakaunt, oba de Jinja wisten nich, daut daut Jesus wia.

⁵Jesus säd to an: Kjinja, hab jie nuscht to äten? See säden: Nä.

⁶Hee säd to an: Schmiet jun Nat aun de rajchte Sied von de Lomm rut, dan woa jie waut kjrieen. See schmeeten daut rut, un dan hauden see soo väl Fesch, daut see daut nich rut kjrieejen.

⁷Dan säd de Jinja, dän Jesus goot wia, to Petrus: Daut es de Har! Aus Simon Petrus hieed, daut daut de Har wia, trock hee sikj de Kjleeda äwa, wiels hee wia noaktich, un schmeet sikj em Wota nenn.

⁸De aundre Jinja kjeemen met de Lomm hinjaraun un schlapten daut Nat voll Fesch. See wieren soo bie 100 Meeta [31] vom Launt.

⁹Aus see aun Launt stieejen, sagen see Fesch opp eenem Kolenfia, un uk Broot.

¹⁰Jesus säd to an: Brinjt uk noch von dee Fesch, dee jie jrod jefescht haben!

¹¹Simon Petrus stieech nenn un schlapt daut Nat met 153 groote Fesch aun Launt. Un met aul dee Fesch doabennen reet daut Nat nich twei.

¹²Jesus säd to an: Nu komt Freestikj äten! Kjeena von de Jinja woagd sikj, am to froagen, wäa hee wia. See wisten, daut daut de Har wia.

¹³Jesus kjeem, neem daut Broot un jeef an daut, un jrod soo uk de Fesch.

¹⁴Dit wia nu daut dredde mol, daut Jesus sikj siene Jinja openboad, no däm daut hee vom Doot oppjestonen wia.

¹⁵Aus see ieescht jejäten hauden, säd Jesus to Simon Petrus: Simon Jona, es diene Leew to mie jrata, aus de aundre äare? Hee säd: Jo, Har, du weetst, daut ekj die goot sie. Jesus säd: Dan weid miene Lama!

¹⁶Hee säd noch eemol to am: Simon Jona, best du mie goot? Hee säd to am: Jo, Har, du weetst, daut ekj die goot sie. Jesus säd to am: Weid miene Schop!

¹⁷Dan säd Jesus daut dredde mol to am: Simon Jona, best du mie goot? Petrus wort gaunz truarich, daut Jesus am toom dredden mol fruach, auf hee am goot wia. Hee säd to am: Har, du weetst om aules om, un du weetst, daut ekj die goot sie. Jesus säd to am: Weid miene Schop!

¹⁸Ekj saj die de Woarheit: Aus du jinja wieescht, bungst du die selfst diene Kjleeda om, un jinjst han wua du han wust. Oba wan du ella woascht, woascht du de Henj utstrakjen, un die woat een aundra daut Gort aunholen un die wua hannämen, wua du nich han west.

¹⁹Dit säd hee, om auntodieden, derch waut fa eenen Doot hee Gott veharlichen wudd. Aus Jesus dit jesajcht haud, säd hee to am: Komm un folj mie no!

²⁰Dan dreid Petrus sikj om un sach dän Jinja metkomen, dän Jesus goot wia, un dee sikj biem Owentkost äten aun Jesus siene Brost jelänt haud un jesajcht haud: Har, wäa es daut, dee die veroden woat?

²¹Aus Petrus dän sach, säd hee to Jesus: Har, waut saul met disem woaren?

²²Jesus säd to am: Wan ekj daut soo well, daut hee bliewen saul bat ekj kom, waut jeit die daut aun? Komm du met mie met!

²³Dan jinkj een Jeräd manke Breeda, daut dis Jinja nich stoawen wudd. Oba Jesus haud nich jesajcht, daut dee nich stoawen wudd, oba: Wan ekj daut soo well, daut dee bliewen saul bat ekj kom, waut jeit die daut aun.

²⁴Dit es de Jinja, dee dit bezeijen deit un dee dit jeschräwen haft, un wie weeten, daut sien Zeichnis woa es.

²⁵Doa sent noch väl aundre Sachen, dee Jesus jedonen haft. Ekj näm aun, wan dee aula eent nom aundren wudden oppjeschräwen woaren, de Welt wudd nich Rum fa aul dee Bieekja haben.