Read Plautdietsch (Low German) – De Bibel Johanes 3 Bible Online

Johanes 3 - Plautdietsch (Low German) – De Bibel bible

Johanes 3

¹Doa wia een Maun, een Farisäa, eena dee em judschen huagen Rot wia, dee heet Nikodemus.

²Dee kjeem de Nacht no Jesus [4] un säd: Liera, [5] wie weeten, daut du een Liera best, dee von Gott jekomen es, wiels de Tieekjens, waut du deist, kaun kjeena doonen, wan Gott nich met am es.

³Jesus säd to am: Ekj saj die de Woarheit: Wäa nich noch eemol jebuaren [6] es, kaun Gott sien Rikj nich seenen.

⁴Nikodemus säd to am: Woo kaun een Mensch noch eemol jebuaren woaren, wan hee aul oolt es? Kaun hee noch eemol em Muttalief nenn gonen un wada jebuaren woaren?

⁵Jesus säd: Ekj saj die de Woarheit: Wäa nich derch Wota un Jeist jebuaren woat, kaun nich en daut Gottesrikj nenn komen.

⁶Waut vom Fleesch jebuaren woat, es Fleesch, un waut vom Jeist [7] jebuaren woat, es Jeist.

⁷Lot die daut nich wundren, daut ekj die saj: Jie motten nie [8] jebuaren woaren.

⁸De Wint blost doa wua hee well, un du kaust am hieren. Oba du kaust nich sajen, wua dee häa kjemt, un weetst uk nich, wua hee blift. Soo es daut met eenem jiedren, dee vom Jeist jebuaren es.

⁹Nikodemus fruach am: Woo kaun soowaut passieren?

¹⁰Jesus säd to am: Du best een Liera en Israel un weetst daut nich?

¹¹Ekj saj junt de Woarheit: Wie weeten von waut wie räden, un zeijen doavon waut wie jeseenen haben; oba waut wie junt sajen, well kjeena jleewen.

¹²Wan jie daut nich jleewen, wan ekj junt von Sachen opp de Ieed vetal, woo woa jie dan jleewen, wan ekj junt von himlische Sachen vetal?

¹³Noch es kjeena nom Himmel jefoaren buta dee, dee vom Himmel rauf kjeem, un daut es de Menschensän. [9]

¹⁴Un soo aus Moses en de Wiltnis eene Schlang huach opphonk, soo mott de Menschensän uk huach oppjehowen woaren,

¹⁵daut aul dee, dee aun am jleewen, daut eewje Läwen haben.

¹⁶Gott siene Leew fa dise Welt es soo groot, daut hee sienen eensjen Sän jeef, daut aul dee, dee aun am jleewen, nich veloaren gonen, oba daut eewje Läwen haben.

¹⁷Wiels Gott schekjt sienen Sän nich en dise Welt, om dee to rechten, oba daut de Welt derch am kunn jerat woaren.

¹⁸Wäa aun am jleeft, woat nich jerecht woaren. Wäa oba nich jleeft, es aul jerecht, wiels hee nich aun dän Nomen von Gott sienen eensjen Sän jleeft.

¹⁹Un daut Rechta Uadeel es dit: Daut Licht kjeem en de Welt nenn, oba de Menschen hauden daut diestre leewa aus daut Licht, wiels äare Woakjen wieren vom diestren.

²⁰Wiels wäa sikj en beese Woakjen eeft, kaun daut Licht nich vedroagen un kjemt uk nich nom Licht, daut siene Woakjen nich sellen verendach komen.

²¹Oba wäa de Woarheit deit, kjemt nom Licht, daut et kloa to seenen es, daut siene Woakjen en Gott jedonen sent.

²²Aus dit äwa wia, kjeemen Jesus un siene Jinja en daut judäische Launt nenn. Doa brocht hee met an Tiet too un deept uk.

²³Johanes deept uk noch bie Änon, dicht bie Salim, wiels doa väl Wota wia, un de Menschen kjeemen un leeten sikj deepen.

²⁴Johanes wia don noch nich en daut Jefenkjnis jestopt.

²⁵Johanes siene Jinja streeden sikj emol met de Juden äwa äare Reinjungs Väaschreften.

²⁶Un see kjeemen no Johanes un säden to am: Liera, dee, dee aun jantsied vom Jordan bie die wia, von däm du zeijen deetst, kjikj emol, dee deept doa, un aule gonen no am.

²⁷Johanes säd to an: Een Mensch kaun sikj nuscht nämen, wan am daut nich vom Himmel jejäft woat.

²⁸Jie selfst bezeijen mie, daut ekj säd, daut ekj nich de Christus sie, oba daut ekj ver am jeschekjt sie.

²⁹Wäa de Brut haft, es de Briegaum. Oba däm Briegaum sien Frint steit un horcht, waut de Briegaum sajcht, un freit sikj, däm Briegaum siene Stemm to hieren. Doawäajen es dise Freid nu voll un gaunz miene.

³⁰Hee mott toonämen, un ekj mott aufnämen.

³¹Dee, dee von bowen kjemt, es äwa aules. Wäa von de Ieed kjemt, es von de Ieed un rät von de Ieed. Dee vom Himmel kjemt, es äwa aules.

³²Un hee rät von daut, waut hee jehieet un jeseenen haft, oba kjeena nemt sien Zeichnis aun.

³³Wäa daut aunnemt, bewiest doamet, daut Gott woarhauftich es.

³⁴Dee, dän Gott jeschekjt haft, rät Gott siene Wieed, wiels Gott deit sienen Jeist nich toomäten.

³⁵De Voda es sienen Sän goot un haft am aules enne Henj jejäft.

³⁶Wäa aun dän Sän jleeft, haft daut eewje Läwen. Un wäa däm Sän nich jehorcht, woat daut Läwen nich seenen, oba blift unja Gott sienen Oaja.