Read Plautdietsch (Low German) – De Bibel Aposteljeschicht 16 Bible Online

Aposteljeschicht 16 - Plautdietsch (Low German) – De Bibel bible

Aposteljeschicht 16

¹Hee kjeem no Derbe un dan no Liestra. Doa wond een Jinja, dee heet Timotäus; siene Mutta wia eene jleewende judsche Fru oba sien Voda wia een Griech.

²De Breeda en Liestra un Ikonion hauden goodet von am to räden.

³Paulus wull am opp siene Reis metnämen. Hee beschneet am om de Juden äat haulwen; wiels en dee Jäajent wisten see aula, daut sien Voda een Griech wia.

⁴Un aus see derch de Städa reisden, säden see an doa, waut de Apostel un Eltestasch en Jerusalem beschloten hauden.

⁵Doaderch worden de Jemeenten em Gloowen jestoakjt, un äare Zol neem aule Dach too.

⁶See reisden dan derch Friegien un Galatien, wiels de Heilja Jeist daut nich tooleet daut Wuat en Asien to prädjen.

⁷Aus see bat Miesien kjeemen, vesochten see derch Bitienien to reisen; oba Jesus sien Jeist leet daut nich too.

⁸Un soo reisden see bie Miesien vebie un kjeemen no Troas.

⁹Dan dee Nacht haud Paulus eene Vision daut een Maun von Mazedonien beddent ver am stunt un säd: Komm äwa no Mazedonien un halp ons!

¹⁰Aus hee dise Vision nu jeseenen haud, vesocht wie fuaz no Mazedonien to komen, wiels wie neemen aun daut de Har ons doahan jeroopt haud, daut Evangelium to prädjen.

¹¹Dan fua wie von Troas loos, un fuaren jlikj äwa no Samotrake, un kjeemen näakjsten Dach no Neapolis,

¹²un von doa no Filippi, eene reemische Kolonie, [6] en dee Jäajent eent von de väaschte Städa en Mazedonien. Un doa bleew wie miere Doag.

¹³Aum Sabat jinkj wie batem Stautspuat aum Wota, wua doa jeweenlich jebät wort. Doa sad wie ons dol un räden met de Frues, dee sikj doa vesaumelt hauden.

¹⁴Eene Fru, dee doa horchen deed, wia Liedia, een gottesferchtjet Frumensch von Tiatira, dee met bleiwroodet Zeich haundeld; däa muak de Har daut Hoat op, daut see doaropp achten deed, waut Paulus säd.

¹⁵Aus see un äare Famielje wieren jedeept worden, loot see ons en em Hus to komen un säd: Wan jie mie doafäa hoolen, daut ekj toom Gloowen aum Harn jekomen sie, dan komt un blieft en mien Hus. Un see beräd ons.

¹⁶Eenen Dach aus wie no dän Plauz jinjen to bäden, troff wie een Sklowenfrumensch, dee een Woasajajeist haud, un äare Haren derch äa Woasajen väl enbrocht.

¹⁷Dit Frumensch kjeem Paulus un ons hinjaraun un schrieech: Dise Mana sent dän aulahechsten Gott siene Deena, dee ons sajen woo wie kjennen seelich woaren.

¹⁸Dit deed see eenen Dach nom aundren, bat Paulus doaräwa soo vedrislich wort, daut hee sikj omdreid un to dän Jeist säd: Ekj jebeed die en Jesus Christus sienen Nomen ut ar rut to komen! Un fuaz veleet de Jeist ar.

¹⁹Oba aus äare Haren sagen, daut äare Hopninj opp Jewenst wajch wia, neemen see Paulus un Silas, un schlapten dee opp däm Moakjtplauz ver Jerecht.

²⁰Dee brochten dee ver äare Rechta un säden: Dit sent judsche Mana un brinjen onse Staut em Opprua.

²¹Un waut see lieren, kjenn wie nich aunnämen uk nich metmoaken, wiels wie Reema sent.

²²Daut Volkj räajd sikj opp jäajen an to gonen, un de Rechta befoolen an de Kjleeda vom Kjarpa to rieten un an to veheiwen.

²³Un aus see an goot veklopt hauden, schmeeten see an en daut Jefenkjnis, un befoolen dän Jefenkjniswajchta an doa secha to hoolen.

²⁴Un dee, wiels daut von am velangt wort, stopt an em bennaschten Jefenkjnis un schloot an de Feet en een Klotz nenn.

²⁵Oba medden en de Nacht bäden Paulus un Silas, un sungen Leeda Gott to lowen, un de aundre faustjenomne hieeden daut.

²⁶Un plazlich kjeem doa een grootet Ieedbäben, daut daut Jefenkjnis bat opp däm Gruntfoot scheddad. Fuaz oppestäd jinjen aule Däaren op, un an follen aula de Kjäden auf.

²⁷De Jefenkjniswajchta wuak opp. Un aus hee sach daut aule Jefenkjnisdäaren op wieren, jreep hee nom Schwieet un wull sikj doot moaken; wiels hee docht de faustjenomne wudden aula utjeräten sennen.

²⁸Paulus oba roopt met lude Stemm: Doo die kjeenen Schoden; wie sent aula hia!

²⁹Dan leet hee sikj een Licht brinjen un rand nenn un foll zetrent ver Paulus un Silas han.

³⁰Hee brocht an rut un säd: Leewe Haren, waut mott ekj doonen, daut ekj seelich woa?

³¹See säden to am: Jleew aun dän Harn Jesus Christus, dan woascht du un diene Famielje seelich!

³²Dan prädijden see dän Harn sien Wuat to am, un to aul de sienje en sien Hus.

³³Un krakjt dan de Nacht wosch hee an de Blootstriepen auf. Un fuaz doa leet hee sikj un siene Famielje deepen.

³⁴Un hee neem an bie sikj em Hus nenn un sad an Äten väa. Un hee freid sikj daut hee met siene gaunze Famielje wia toom Gloowen aun Gott jekomen.

³⁵Un aus daut ieescht dach wia schekjten de Stautsrechta äare Deena no däm Wajchta, daut hee de Mana sull gonen loten.

³⁶Dan säd de Jefenkjniswajchta to Paulus: De Stautsrechta haben Wuat jeschekjt, daut du un Silas friejeloten sent. Got en Fräd!

³⁷Paulus oba säd to an: See haben ons oschuldje Reema effentlich veheift un enjestopt, un räakjnen ons nu em Jeheemen loostowoaren? Nä! Nu lot an selfst komen un ons hia rut leiden.

³⁸Un de Deena säden de Stautsrechta daut. Un aus dee hieeden, daut Paulus un Silas Reema wieren, wort an angst.

³⁹Dan kjeemen see un beräden an un brochten an rut un prachaden an äare Staut to veloten.

⁴⁰Dan jinjen see utem Jefenkjnis rut un jinjen bie Liedia em Hus nenn. Un aus see de Breeda jeseenen un Moot toojesproaken hauden, veleeten see.