Read Plautdietsch (Low German) – De Bibel Aposteljeschicht 18 Bible Online

Aposteljeschicht 18 - Plautdietsch (Low German) – De Bibel bible

Aposteljeschicht 18

¹No dit veleet Paulus Ateen un kjeem no Korint.

²Doa troff hee Aquilla, een Jud von Pontus, dee korz met siene Fru Priszilla toop von Italien jekomen wia, wiels Klaudius aule Juden von Room wajch jeschekjt haud. Doa kjeem Paulus han;

³un wiels hee, soo aus dee uk, een Zeltmoaka wia, bleef hee doa un oabeid met an toop.

⁴Un aum Sabat jinkj hee emma en äare Judenschoolen un äwazeijd de Juden un de Griechen.

⁵Aus Silas un Timotäus von Mazedonien jekomen wieren, funk Paulus aun sikj gaunz un goa hantojäwen de Juden daut to bewiesen, daut Jesus de Christus wia.

⁶Oba aus see jäajenaun wieren un lastaden, scheddad hee sikj dän Stoff von de Kjleeda un säd: Jun Bloot woat äwa june ieejne Kjap komen. Ekj sie rein un go von nu aun no de Nichjuden!

⁷Dan jinkj Paulus von doa wajch un jinkj bie Titius [7] Justus, een gottesferchtjen Maun, em Hus nenn, daut fuaz daut näakjste aun de School stunt.

⁸Krispus, de Leida von de School, un siene gaunze Famielje jleewden aun dän Harn. Un väl von de Korinta, aus dee hieeden, jleewden un leeten sikj deepen.

⁹Eene Nacht säd de Har to Paulus en eene Vision: Fercht die nich, hool aun to prädjen un lot die nich stelmoaken!

¹⁰Ekj sie met die, un doa saul sikj kjeena woagen, die Schoden auntodoonen; wiels ekj hab väl Menschen en dise Staut.

¹¹Dan bleef hee doa achtieen Moonat un lieed an daut Gotteswuat.

¹²Aus Galio Gowernia äwa Achaja wia, stunden de Juden sikj toop un brochten Paulus ver Jerecht

¹³un säden: Dis Maun berät de Menschen, Gott opp soone Oat auntobäden, dee jäajen daut Jesaz es.

¹⁴Aus Paulus jrod reed wia to räden, säd Galio to de Juden: Leewe Juden, wan sikj daut om een grootet orrajcht ooda vebräakjen haundeld, wudd ekj wellich sennen no junt to horchen;

¹⁵oba wan sikj daut om eene Strietfroag äwa Wieed un Nomes en jun ieejnet Jesaz haundelt, dan weet junt selfst doamet; wiels ekj woa äwa soone Dinja nich Rechta sennen.

¹⁶Un hee juach an utem Rechthus.

¹⁷Dan kjrieejen aul de Griechen Sostenes, dän Leida von de Judenschool, to hoolen un veheiwden am ver däm Rechtastool. Oba Galio muak sikj nuscht doarut.

¹⁸Paulus bleef dan noch eene lenjre Tiet en Korint. Dan oba veleet hee de Breeda, un säajeld met Priszilla an Aquilla toop äwa no Korint. En Kenchreä leet hee sikj de Hoa aufschnieden, wiels hee haud een Vespräakjen jemoakt.

¹⁹Un hee kjeem no Efesus, un leet an doa. Hee oba jinkj en de School nenn un räd met de Juden.

²⁰See prachaden am dan, daut hee noch lenja bie an bliewen sull. Hee oba, jinkj doaropp nich en,

²¹oba neem Aufscheet von an un säd: Ekj mott onbedinjt en Jerusalem opp daut Fast sennen. Oba ekj woa, wan Gott daut soo well, wada trigjkomen. Un hee fua von Efesus wajch.

²²Un hee kjeem no Cäsarea un jinkj no Jerusalem un jreest de Jemeent un reisd auf no Antiochia.

²³Hee bleef doa dan eene Tietlank, un reisd dan wieda un jinkj derch daut galatische Launt von eene Städ no de aundre, un soo uk derch Friegien, un stoakjt aul de Jinja.

²⁴Entweschen wia Apollos, een Jud von Alexandria, no Efesus jekomen. Daut wia een jeleifja Rädna, dee met de Schreft goot bekaunt wia.

²⁵Dis Maun wia äwa dän Harn sien Wajch rechtich belieet worden un räd un lieed met groote Bejeistrunk vom Harn, wan hee uk mau bloos met Johanes sien Deepen bekaunt wia.

²⁶Disa funk gaunz frie aun, en de Schoolen to prädjen. Aus Priszilla un Aquilla am hieeden, neemen see am bie sikj nenn un läden am Gott sien Wajch noch jrintelja ut.

²⁷Aus Apollos no Achaja reisen wull, schreewen de Breeda han un muaken de Jinja Moot, daut see am oppnämen sullen. Un aus hee hankjeem, holp hee dee sea väl, dee derch Jnod toom Gloowen jekomen wieren.

²⁸Un hee muak de Juden daut ver aule Menschen ut de Schreft kloa, daut Jesus de Christus wia.