Read Plautdietsch (Low German) – De Bibel Aposteljeschicht 21 Bible Online

Aposteljeschicht 21 - Plautdietsch (Low German) – De Bibel bible

Aposteljeschicht 21

¹Aus wie ons von an loosjeräten hauden un opp däm Schepp wieren, fua wie jlikj äwa no Kos un dän näakjsten Dach no Rodos un von doa no Patara. [14]

²Un wiels wie doa een Schepp fungen, daut no Feenizien fua, stieej wie nenn un fuaren han.

³Aus wie Ziepern jeseenen hauden, fua wie daut aun dee siedne Kaunt vebie un fuaren no Sierien un kjeemen no Tierus, wiels doa sull daut Schepp de Woa aufloden.

⁴Un aus wie doa Jinja fungen, bleew wie doa säwen Doag. Dee säden Paulus derch dän Jeist, daut hee nich no Jerusalem gonen sull.

⁵Aus onse Tiet doa äwa wia, veleet wie un jinjen onsen Wajch, un dee kjeemen ons aula met Frues un Kjinja toop hinjaraun, bat wie ut de Staut wieren. Un doa kjneed wie ons aun de Kaunt vom Mäa dol un bäden.

⁶Aus wie von eenaunda Aufscheet jenomen hauden, stieej wie opp daut Schepp, un see jinjen trigj no Hus.

⁷Wie reisden von Tierus wieda un kjeemen no Ptolemäus, bejreesten de Breeda un bleewen eenen Dach bie an.

⁸Dän näakjsten Dach veleet wie, dee wie met Paulus wieren, un kjeemen no Cäsarea un jinjen doa bie dän Evangelist Filippus em Hus nenn, dee eena von de Säwen wia.

⁹Dee haud vea onbefriede Dajchta, dee de Gow hauden to profezeien.

¹⁰Un aus wie doa ieescht miere Doag wieren, kjeem Agabus, een Profeet von Judäa, doahan.

¹¹Dee neem Paulus sienen Gort vom Kjarpa un bunk sikj doamet de Henj un de Feet un säd: De Heilja Jeist sajcht: Dän Maun, däm disen Gort jehieet, woaren de Juden en Jerusalem jrod soo binjen un de Nichjuden en de Henj jäwen.

¹²Aus wie daut hieeden, prachaden wie, uk de aundre dee doa wieren, daut hee nich sull no Jerusalem gonen.

¹³Dan säd Paulus: Wuarom hiel jie hia un bräakjen mie daut Hoat? Ekj sie reed, mie nich mau en Jerusalem binjen to loten, oba uk fa däm Harn Jesus sienen Nomen to stoawen.

¹⁴Aus Paulus sikj nich äwaräden leet, leet wie am tofräd un säden: Doo soo aus de Har daut well!

¹⁵Un om een poa Doag pakt wie toop un reisden no Jerusalem.

¹⁶Doa kjeemen eenje Jinja von Cäsarea met, dee brochten ons no Mnason sien Hus, wua wie bliewen sullen. Dee Maun wia von Ziepern un wia doa eena von de ieeschte Jinja.

¹⁷Un aus wie no Jerusalem kjeemen, neemen de Breeda ons met Freiden opp.

¹⁸Dän näakjsten Dach jinkj Paulus met ons aulatoop no Jakobus, wua aul de Eltestasch uk hankjeemen.

¹⁹Un aus Paulus an bejreest haud, vetald hee an omstendich waut de Har derch sien Aumt mank de Nichjuden jedonen haud.

²⁰Aus see daut hieeden, lowden see dän Harn. See säden oba to am: Kjikj emol, Brooda, wooväl dusende Juden toom Gloowen jekomen sent, dee oba iewrich fa daut Jesaz enstonen.

²¹Dee es daut jesajcht worden daut du de Juden, dee mank de Nichjuden wonen, lieescht von Moses auftofaulen un an sajchst, daut see äare Kjinja nich sellen beschnieden, un sikj uk nich mea no äare Väaschreften rechten.

²²Waut dan nu? Daut Volkj mott sikj onbedinjt vesaumlen, wiels dee woaren daut secha hieren, daut du häajekomen best.

²³Dan doo nu waut wie die sajen.

²⁴Wie haben hia vea Mana, dee een Vespräakjen opp sikj jenomen haben. Nemm dee un go met an toop derch äare Reinjungs Zeremonieen un betol de Onkosten, daut see sikj kjennen de Hoa aufschnieden loten. Dan woaren aule Menschen seenen daut et nich de Woarheit es, waut see von die vetalen, oba daut du selfst soo läfst aus daut Jesaz velangt.

²⁵Oba de Nichjuden, dee toom Gloowen jekomen sent, hab wie jeschräwen daut see sikj aun nuscht soowaut hoolen brucken, oba daut see nich Aufjettaopfa, nich Bloot un nich Fleesch von een aufjewarjdet Beest [15] äten, un sikj nich met Huararie aufjäwen.

²⁶Dän näakjsten Dach neem Paulus de Mana un reinjd sikj met an toop. Dan jinkj hee em Tempel nenn un säd an, wanea äare Reinjungs Doag wudden äwa sennen, un daut dan fa jieda eenem wudd een Opfa jebrocht woaren.

²⁷Un aus dee säwen Doag meist äwa wieren, sagen de Juden von Asien am em Tempel. See hizten daut Volkj en, un kjrieejen am to hoolen, un schrieejen:

²⁸Jie israelitische Mana, halpt! Dit es dee Maun dee aule Menschen aulawäajen lieet jäajen daut Jesaz un dise heilje Städ to sennen. Un noch mea, hee haft Griechen em Tempel nenn jebrocht un doamet dise heilje Städ veorreinicht.

²⁹See hauden am verhäa met Trofimus dän Efeesa toop en de Staut jeseenen, un dochten sikj daut soo, daut Paulus dän wudd em Tempel nenn jenomen haben.

³⁰De gaunze Staut wia em Wirwoa, un randen toop, kjrieejen Paulus to hoolen un schlapten am utem Tempel rut, un muaken fuaz de Däaren too.

³¹Aus see am vesochten doottomoaken, kjrieech de Soldoten Offizia to hieren, daut gaunz Jerusalem em Opprua wia.

³²Hee neem fekjs Soldoten un Offizieren un rand doa mank. Aus see de Offizieren un de Soldoten sagen, hieeden see opp, Paulus to schlonen.

³³Aus de Offizia hankjeem, neem hee Paulus un leet am binjen met twee Kjäden un fruach am, wäa hee wia un waut hee jedonen haud.

³⁴Un von em Volkj schrieech eena soo, un eena soo. Un aus see en aul dän Opprua nich kunnen utfinjen waut doa werkjlich wia, befool hee Paulus en de Baraken nenn to brinjen.

³⁵Aus Paulus bat opp de Stoopen kjeem, wia daut Volkj soo tieraunisch, daut de Soldoten am droagen musten.

³⁶Doa kjeem väl Volkj hinjaraun un schrieejen: Brinjt am äwatsied!

³⁷Aus see Paulus en de Baraken nenn leiden wullen, fruach hee dän Offizia, auf hee to am räden kunn. Dee oba fruach am: Kaust du Griechisch räden?

³⁸Best du nich dee Ägipta, dee een stootje trigj een Opprua aunstald un 4.000 Merda holpst en de Wiltnis nenn to komen?

³⁹Paulus säd: Ekj sie een Jud von Tarsus en Zilizien, een Birja von nich mau eene eefache Staut. Doarom bedd ekj die, lot mie to de Menschen räden.

⁴⁰Un aus hee de Frieheit haud, stieech hee opp de Stoopen un jeef daut Volkj met de Haunt eene Aundiedunk, daut see sullen stell sennen. Un aus daut ieescht gaunz stell wia, funk hee aun opp hebräisch to an to räden un säd: