Read Plautdietsch (Low German) – De Bibel Aposteljeschicht 4 Bible Online

Aposteljeschicht 4 - Plautdietsch (Low German) – De Bibel bible

Aposteljeschicht 4

¹Aus Petrus un Johanes toom Volkj räden deeden, kjeemen de Priesta un de väaschta em Tempel un de Saduzäa no an.

²Dee wieren sea vedrislich doaräwa daut de Apostel daut Volkj lieeden, un daut see prädijden daut de Doodes derch Jesus oppstonen woaren.

³See neemen Petrus un Johanes faust, un wiels daut aul Owent wia, stopten see an en, bat zemorjes.

⁴Oba väle von dee, dee daut Wuat hieeden, jleewden. Un de Zol von de Mana woss, bat daut ojjefäa 5.000 wieren.

⁵Näakjsten Dach vesaumelden äare Leidasch un Eltestasch un Schreftjelieede sikj met

⁶Hanas dän Huagenpriesta, un Kaifas, un Johanes, un Alexanda, un wäa en Jerusalem sest noch von de Huagapriesta Famielje staumd.

⁷Dan leeten see sikj Petrus un Johanes hanbrinjen un fruagen an: Derch waut fa eene Krauft ooda en waut fa eenen Nomen doo jie dit?

⁸Dan säd Petrus, voll vom Heiljen Jeist, to an: Jie Volkjsleidasch un Eltestasch en Israel!

⁹Wan wie vondoag von daut goode Woakj sellen Räakjenschoft jäwen, wuaderch dis Maun es jesunt jeworden,

¹⁰dan sell jie aula un uk aulemaun en Israel weeten, daut derch Jesus Christus von Nazaret sienen Nomen, dän jie kjriezichten, un dän Gott vom Doot oppwuak steit dis Maun hia ver junt jesunt!

¹¹Dit es dee Steen dän jie Bulied veschmeeten, dee toom Akjsteen jeworden es.

¹²Un doa es uk en sest kjeenem Radunk, wiels ons Menschen es unja däm Himmel sest kjeen Nomen jejäft, derch dän wie kjennen seelich woaren.

¹³Aus see sagen woo mootich Petrus un Johanes wieren, un daut see ojjeschoolde, jeweenelje Menschen wieren, wundaden see sikj äwa an. Dan worden see en, daut dee wieren met Jesus toopjewast.

¹⁴Aus see dän Mensch sagen bie an stonen, dee doa wia jeheelt worden, kunnen see nuscht jäajen an sajen.

¹⁵Dan schekjten see dee ut äare Vesaumlunk rut, un hauden unja sikj eene Berodunk,

¹⁶un säden: Waut sell wie met dise Mana doonen? Daut derch an een oppfaulendet Wunda passieet es, weet jieda eena en Jerusalem, un wie kjennen daut nich velieejen.

¹⁷Oba daut sikj daut nich wieda mank de Menschen vespreet, well wie an iernstlich dreiwen, daut see von nu aun to kjeenem mea von disen Nomen räden sellen.

¹⁸Un see roopten an un vebooden an, jeemols en Jesus sien Nomen to räden ooda to lieren.

¹⁹Oba Petrus un Johanes säden: Recht fa junt selfst, auf daut en Gott siene Uagen rajcht es, daut wie mea no junt horchen aus no Gott.

²⁰Wiels wie kjennen nich aundasch, aus doavon räden, waut wie jehieet un jeseenen haben.

²¹Aus see an noch wieda jedreift hauden, leeten see an gonen. See fungen om daut Volkj äat haulwen kjeen Wajch, an to strofen, wiels dee lowden aula Gott fa daut, waut doa wia jedonen worden.

²²Dee Maun wia äwa 40 Joa oolt aun dän daut Heelungswunda wia jedonen worden.

²³Un aus see an hauden gonen loten, kjeemen Petrus un Johanes no äare Lied un vetalden an aules, waut de Huagepriestasch un Eltestasch to an jesajcht hauden.

²⁴Aus see daut hieeden, fungen see aula tojlikj aun to bäden un säden to Gott: Har, du best de Gott, dee Himmel un Ieed un daut Mäa, un aules waut doabennen es, jemoakt haft;

²⁵dee du derch dienen Kjnajcht, David, derch dän Heiljen Jeist jesajcht hast: “Wuarom räajen de Velkja sikj opp, un de Menschen plonen, wua nuscht doarhinja es.

²⁶De Kjennichs oppe Ieed stonen sikj toop, un de aunjestalde saumlen sikj toop jäajen dän Harn un sienen Christus:”

²⁷Bestemt stunden Herodes un Pontius Pilatus sikj met de Velkja un met Israel toop jäajen Jesus, dienen heiljen Kjnajcht, dän du toom Messias jemoakt hast,

²⁸to doonen, wautemma diene Haunt un dien Rotschluss verhäa beschloten haud.

²⁹Un nu, kjikj emol, Har, woo see dreiwen, un jeff diene Kjnajchts, daut see brow dien Wuat prädjen.

³⁰Un strakj diene Haunt ut, to heelen, un jeff, daut derch dienen heiljen Kjnajcht Jesus sienen Nomen, Tieekjens un Wunda passieren muchten.

³¹Un aus see jebät hauden, scheddad de Plauz, wua see toopjekomen wieren; un see wieren aula voll vom Heiljen Jeist, un prädijden brow Gott sien Wuat.

³²Un aul de jleewende wieren een Hoat un eene Seel. Doa säd uk kjeena daut hee daut ieejend, waut hee besetten deed, oba hauden aules aulatoop.

³³Un de Apostel jeewen met groote Krauft Zeichnis, daut Jesus Christus vom Doot oppjestonen wia, un de Jnod wia bie an aula sea groot.

³⁴Doa wia uk kjeena, däm daut aun irjentwaut fäld; wiels, wäa Launt ooda Hiesa haud, vekoft daut un brocht daut Jelt, waut hee doafäa jekjräajen haud,

³⁵un äwajeef de Apostel daut. Dee deelden daut doano ut aus een jiedrem daut fäld.

³⁶Un Josef, dee von de Apostel uk Barnabas jenant wort (daut meent: eena dee doa treesten deit), een Levit, dee von Ziepern staumd,

³⁷haud Launt, un vekoft daut un kjeem un äwajeef de Apostel daut Jelt.