Read Plautdietsch (Low German) – De Bibel Reema 1 Bible Online

Reema 1 - Plautdietsch (Low German) – De Bibel bible

Reema 1

¹Dis Breef schrift Paulus, Christus Jesus sien Deena, dee oppoat von Gott beroopen wort een Apostel to sennen, daut Evangelium to prädjen,

²daut Gott verhäa en de heilje Schreft derch siene Profeeten vesproaken haud.

³Dit Evangelium wia von sienem Sän, dee nom Fleesch no von David staumd.

⁴Un doaderch, daut hee vom Doot oppstonen deed, haft hee daut derch dän Heiljen Jeist en Krauft bewäsen, daut hee Gott sien Sän un ons Har Jesus Christus es.

⁵Derch dän hab wie Jnod un daut Apostel Aumt jekjräajen, wuaderch wie en sienen Nomen aule Velkja lieren sellen, daut see jehuarsom woaren un toom Gloowen komen.

⁶Un jie sent uk mank dee, dee doa beroopen sent, Jesus Christus auntojehieren.

⁷Dis Breef es fa aul junt en Room, dee Gott goot es, un dee doa beroopen sent, heilje to sennen. Mucht jie de Jnod un dän Fräd von Gott onsem Voda un von däm Harn Jesus Christus haben!

⁸Ieeschtens dank ekj Gott derch Jesus Christus fa junt aula, wiels en de gaunze Welt von junem Gloowen jerät woat.

⁹Gott, dän ekj en mienem Jeist doarenn deen, daut ekj daut Evangelium von sienen Sän prädjen doo, weet, woo ekj emma en miene Jebäda aun junt denkj.

¹⁰Ekj bäd doarom, daut ekj derch Gott sienen Wellen, nu tolatst noch een Wajch finjen mucht, no junt to komen.

¹¹Ekj hab een velangen, junt to seenen, un junt waut jeistliche Gowen mettodeelen, daut jie kjennen staunthauft woaren.

¹²Doamet well ekj sajen, daut ekj met junt toop mucht mootja woaren, wan ekj mank junt sie, beides, ekj derch junen Gloowen un jie derch mienen.

¹³Un dit sell jie weeten Breeda, daut ekj aul foaken jeplont hab no junt to komen, daut ekj bie junt uk Frucht schaufen kunn, soo aus bie de aundre Velkja. Doa es bat nu oba noch emma waut mank jekomen.

¹⁴Ekj sie een Schildna aun Griechen uk aun Nichgriechen, aun jelieede uk ojjelieede.

¹⁵Doawäajen sie ekj von mie ut uk drinjent, uk junt en Room daut Evangelium to prädjen.

¹⁶Ekj schäm mie nich met daut Evangelium von Christus. Daut es Gott siene Krauft, aul dee seelich to moaken, dee doaraun jleewen, ieeschtens de Juden, dan oba uk de Griechen.

¹⁷Daut wiest ons, woo Gott ons derch dän Gloowen jerajcht moakt, un woo de Gloowen emma toonemt, soo aus jeschräwen steit: “De jerajchta woat derch sienen Gloowen läwen.”

¹⁸Daut es äwaraul to seenen woo Gott sien Oaja vom Himmel rauf kjemt äwa de Gottloosichkjeit un Ojjerajchtichkjeit von de Menschen, dee en Ojjerajchtichkjeit de Woarheit unjadrekjen.

¹⁹Waut eena von Gott weeten kaun, weeten see, wiels Gott haft an daut weeten loten.

²⁰Von don aus Gott de Welt jemoakt haft, es siene eewje Krauft un Gottheit, dee verhäa nich to seenen wia, verendach jekomen un to vestonen, derch daut waut hee jeschaufen haft, soo daut see kjeene Entschuldjunk haben.

²¹Un wan see Gott uk kjanden, see jeewen am nich de Iea aus Gott, un haben am nich jedankt. See jeewen sikj en äa denkjen met vekjieede Jedanken auf, soo daut daut diestre en äa onvestendjet Hoat, äwahaunt neem.

²²See jeewen väa, weis to sennen, oba muaken sikj selfst to Noaren.

²³See vetuschten dän onvejenkjlichen Gott siene Harlichkjeit fa Bilda von Aufjetta, soone aus von Menschenjestault, Väajel, un de veabeensche un krupende Tieren.

²⁴Doawäajen haft Gott an hanjejäft en de Orreinichkjeit, wuano see em Hoaten jelesten deeden, soo daut see met äaren ieejnen Kjarpa unjarenaunda Schaund driewen,

²⁵wiels see Gott siene Woarheit fa Läajes vetuscht haben. See doonen daut, waut jemoakt es, leewa aunbäden un deenen, aus dän, dee daut jemoakt haft, dee en Eewichkjeit jeloft es. Amen.

²⁶Doawäajen jeef Gott an en äare schentelje Lost han. Äare Frulied haben dän natieedeljen Omgank met Mana vetuscht fa daut waut nich natieedlich es, un haben Omgank met enaunda.

²⁷Un jrod soo haben uk de Maunslied dän natieedeljen Omgank met Frulied veloten un haben en äare Hett unjarenaunda Maun met Maun Schaund jedräwen, un haben aun sikj selfst de Strof fa äaren Errsenn jekjräajen.

²⁸Un jrod soo aus see Gott oppjeewen un nich mea aunerkjanen wullen, soo jeef Gott an uk han en äa jemeenet denkjen, Dinja to doonen, dee nich jescheit sent.

²⁹Dee sent aula ojjerajcht, schlajcht, onjehuarsom un jiezich, voll Aufgonst un Mort, Strieden un Aunschmäaren un Jemeenheit, Pludren un Läajes.

³⁰See bieten hinjarigjsch, kjennen Gott nich lieden, sent frajch, prauzich un puchen sikj. See finjen emma mea schlajchtet ut, un jehorchen äare Elren nich.

³¹See haben kjeen Vestentnis un sent nich to truen. See sent aundre Menschen nich goot, sent nich wellens to vejäwen, un haben kjeen Metleet.

³²Un wan see uk weeten, daut Gott daut Doodesuadeel äwa dee bestemt haft, dee soowaut doonen, doonen see daut nich mau selfst, oba unjastetten aundre, dee daut uk doonen.