Read Plautdietsch (Low German) – De Bibel Reema 10 Bible Online

Reema 10 - Plautdietsch (Low German) – De Bibel bible

Reema 10

¹Breeda, ekj wensch von Hoaten, daut Israel seelich woaren mucht, un ekj bäd fa an to Gott.

²Ekj jäw an daut Zeichnis, daut see fa Gott iewren, oba see weeten nich om waut.

³See kjanden Gott siene Jerajchtichkjeit nich un vesochten äare ieejne häatostalen, un soo stalden see sikj uk nich unja Gott siene Jerajchtichkjeit.

⁴Christus haft met daut Jerajchtichkjeits Jesaz een Enj jemoakt. Wäa aun am jleeft, dee es jerajcht.

⁵Moses schrift von de Jerajchtichkjeit, dee derch daut Jesaz kjemt: “De Mensch, dee daut deit, woat doaderch läwen.”

⁶Oba de Jerajchtichkjeit dee derch däm Gloowen kjemt, sajcht soo: “Saj nich to die selfst: Wäa woat nopp foaren nom Himmel?” (Daut meent Christus rauf holen.)

⁷ooda: “Wäa woat rauf foaren no de Doodes?” (Daut heet Christus von doa rut holen),

⁸oba waut sajcht dee? “Daut Wuat es dicht bie die, du hast daut em Mul uk em Hoaten.” Daut es daut Wuat vom Gloowen daut wie prädjen.

⁹Wan du met daut Mul Jesus aus Harn bekjanst, un jleefst, daut Gott am vom Doot oppjewoakt haft, woascht du seelich.

¹⁰Wäa von Hoaten jleeft, woat jerajcht, un wäa met däm Mul bekjant, woat seelich.

¹¹De Schreft sajcht: “Wäaemma aun am jleeft, woat nich toschaund woaren.”

¹²Doa es kjeen Unjascheet tweschen Juden un Griechen, wiels deeselwja Har es Har äwa aule, rikj jenuach aule daut to jäwen, no waut see bäden.

¹³Wiels “wäaemma dän Harn en sien Nomen aunroopt, woat seelich woaren”.

¹⁴Oba woo sellen see dän aunroopen, aun dän see nich jejleeft haben? Ooda woo sellen see aun dän jleewen, von däm see nie jehieet haben? Un woo sellen see hieren, wan doa kjeen Prädja es?

¹⁵Un woo sellen see prädjen, wan see nich jeschekjt woaren? Soo aus jeschräwen steit: “Woo wundascheen es daut wan dee komen, dee ons dän Fräd prädjen, dee ons daut goode to sajen haben!”

¹⁶Oba see haben nich aula doaropp jeacht, waut daut Evangelium säd. Jesaja säd: “Har, wäa jleeft, waut wie prädjen?”

¹⁷Soo kjemt de Gloowen derch de Prädicht un de Prädicht von Christus sien Wuat.

¹⁸Ekj froag oba: Dee haben daut secha noch niemols jehieet, haben see? Secha haben see! “Äare Stemm es äwa de gaunze Ieed jegonen un äare Wieed soo wiet aus de Welt rieekjt”.

¹⁹Ekj froag oba: Israel haft oba secha nich jewist, deeden see? Moses säd aul: “Ekj well en junt een Aufgonst wakjen derch dee, daut nich een Volkj es; un junt toom Oaja reizen derch een Volkj daut von nuscht weet.”

²⁰Un Jesaja woacht sikj to sajen: “Ekj wort von dee jefungen, dee nich no mie sochten. Ekj wort met soone bekaunt, dee nich no mie fruagen.”

²¹Oba von Israel sajcht hee: “Ekj hool miene Henj dän dachäwa utjestrakjt no een wadaspanstjet Volkj, daut nich horchen well.”