Read Plautdietsch (Low German) – De Bibel Reema 12 Bible Online

Reema 12 - Plautdietsch (Low German) – De Bibel bible

Reema 12

¹Breeda, wiels Gott soo väl Jnod un Metleet aun junt bewäsen haft, ermon ekj junt, uk junen Kjarpa Gott to jäwen aus een heiljet, läwendjet Opfa, daut Gott aunnämen kaun. Lot daut jun jeistlicha Gottesdeenst sennen.

²Un stalt junt nich soo han aus dise Welt deit. [9] Jie sellen derch june niee Jesennunk veendat woaren, daut jie weeten kjennen, waut Gott sien Wellen, waut goot, aunjenäm un volkomen es. [10]

³Derch de Jnod, dee mie jejäft es, saj ekj junt, een jieda eenem, denkjt von junt nich mea aus jie werkjlich sent, oba schazt junt doano auf, aus Gott junt Gloowen jeschonken haft.

⁴Soo aus wie aun eenen Kjarpa väl Jläda haben, un dee Jläda oba nich aula daut selwje to doonen haben,

⁵soo sent wie väle, een Kjarpa en Christus, un uk unjarenaunda sent wie Jläda aun eenen Kjarpa.

⁶Un wiels onse Gowen sikj doano unjascheeden aus ons Jnod jeschonken es, well wie dee een jiedra doano brucken: wan daut prädjen es, dan doano aus ons doatoo Gloowen jeschonken es;

⁷wan deenen, dan doano deenen; wan lieren dan doano lieren;

⁸wan ermonen, dan doano ermonen; wan jäwen, dan rikjlich; wan aundre väastonen, dan flietich; wäa doa eeft metliedent to sennen, saul daut met Freid doonen.

⁹Doot june Leew nich heichlen. Habt een Aufschu fa daut, waut schlajcht es, un hoolt faust, waut goot es.

¹⁰Aus Breeda sell jie junt unjarenaunda von Hoaten goot sennen. Moakt emma Rum fa dän näakjsten siene Iea.

¹¹Siet nich ful. Wan daut kjemt to doonen waut jie doonen sellen, siet drinjent em Jeist, däm Harn to deenen.

¹²Siet froo en june Hopninj, jeduldich wan jie lieden, aunhoolent em Jebäd.

¹³Halpt jieren wua de heilje daut fält. Siet gaustfrie un oppnäment.

¹⁴Säajent dee, dee junt vefoljen. Säajent, un lajcht nich een Fluch opp an.

¹⁵Freit junt met dee met, dee doa froo sent, un hielt met dee met, dee doa hielen.

¹⁶Läft en Eenichkjeit unjarenaunda. Denkjt von junt selfst nich huach rut. Jäft junt uk met dee auf dee doa läach stonen un hoolt junt nich selfst fa kluak.

¹⁷Woat junt schlajchtet aunjedonen? Tolt daut nich met schlajchtet trigj. Sträft to doonen waut ierenhauft es un aule Menschen toom gooden deent.

¹⁸Doot aules waut jie kjennen, wan daut mäajlich es, met aule Menschen Fräd to haben.

¹⁹Doot niemols Rach eewen, leewe Frind. Jäft Gott sienen Oaja Rum doatoo; wiels daut steit jeschräwen: “Rach eewen es miene Sach. Ekj woa trigjtolen, sajcht de Har.”

²⁰“Wan dienen Fient hungat, jeff am to äten. Wan am darscht, jeff am to drinkjen. Wan du daut soo deist, woascht du am doaderch jlieejende Kolen opp däm Kopp lajen”.

²¹Lot junt nich von daut beese unjakjrieen. Doot goodet, om daut beese unjatokjrieen.