Read Plautdietsch (Low German) – De Bibel Reema 13 Bible Online

Reema 13 - Plautdietsch (Low German) – De Bibel bible

Reema 13

¹Lot aulemaun de Rejierunk unjadon sennen, dee Jewault äwa am haft. Wiels wan daut nich von Gott kjeem, wia kjeene Rejierunk; wiels Gott haft de Rejierungen aunjeordent.

²Dan es deejanja jäajen Gott siene Ordnunk, dee jäajen de Rejierunk es. Dee waut jäajenaun sent, woaren een Uadeel äwa sikj kjrieen.

³Wäa sikj goot benemt brukt sikj fa de rejierende nich ferchten. Daut motten mau dee, dee schlajchtet doonen. Wan du die fa de Rejierunk nich ferchten west, dan doo goodet, un dee woaren die soogoa doafäa lowen.

⁴Wiels daut es Gott sien Deena, die toom gooden. Oba wan du deist waut schlajcht es, dan fercht die, wiels dee drajcht daut Schwieet nich fa nuscht. Daut es Gott sien Deena, Rach to eewen äwa dee, dee beeset doonen.

⁵Doawäajen es daut needich, unjadon to sennen, nich bloos ut Forcht fa de Strof, oba om daut Jewessen sient haulwen.

⁶Dit es uk wuarom jie Taks tolen; Rejierungs Beaumten sent Gott siene Deena, dee sikj doatoo hanjäwen.

⁷Tolt aulem, waut jie an schuldich sent: Taks, dän jie Taks schulden; Zoll dän jie Zoll schulden; fercht wäm to ferchten es. Un ieet dee, dee daut traft.

⁸Siet kjeenem irjentwaut schuldich, buta de Leew enna toom aundren; wiels wäa sienen näakjsten goot es, haft jedonen waut daut Jesaz velangt.

⁹Wiels jrod dit: “Du saust nich ehebräakjen; du saust nich morden; du saust nich stälen; du saust die nich jankren loten”, un wan doa sest noch Jebooten sent, dee sent aula en dit eene enjeschloten: “Du saust dienen näakjsten soo goot sennen aus die selfst.”

¹⁰Wäa dän näakjsten goot es, woat däm nuscht orrajchtet doonen; met Leew helt eena daut gaunze Jesaz.

¹¹Dan doot dit, wiels wie seenen aun dee Tiet, daut de Stund hia es, wua daut fa junt Tiet es, utem Schlop opptowakjen, wiels onse Radunk es nu noda, aus don, aus wie toom Gloowen kjeemen.

¹²De Nacht es meist vebie un de Dach es hia. Dan well wie nu daut auflajen waut toom diestren jehieet, un ons doamet kjleeden waut toom Licht jehieet.

¹³Dan well wie ons soo benämen aus ons daut em Licht tookomen wudd; nich en een willet Läwen un supen, un uk nich onse Fleescheslost dän Wellen loten, uk nich en Striedarie un Aufgonst.

¹⁴Lot dän Harn Jesus Christus gaunz de Kontroll äwa junt haben, un sieekjt nich no eene Jeläajenheit daut Fleesch dän Wellen to loten.