Read Plautdietsch (Low German) – De Bibel Reema 14 Bible Online

Reema 14 - Plautdietsch (Low German) – De Bibel bible

Reema 14

¹Nämt dee opp, dee noch schwak em Gloowen sent, oba nich, om äwa äare Meenungen to uadeelen.

²Eena jleeft hee kaun irjentwaut äten, wäarent de schwaka bloos Jemies at.

³Wäa doa äten deit, saul dän nich veachten, dee nich at. Un wäa nich äten deit, saul dän nich rechten, dee doa at, wiels Gott haft an beid aunjenomen.

⁴Wäa best du, een aundren sien Kjnajcht to rechten? Daut es ver sienen ieejnen Harn, daut hee steit ooda felt, wiels sien Har kaun am opprajcht hoolen.

⁵Een Mensch helt eenen Dach hecha aus dän aundren. Aundre meenen de Doag sent aula äwareen. En dit mott sikj een jiedra en siene Meenunk secha sennen.

⁶Wäa sikj aun veschiedne Doag helt, deit daut om Gott to ieren; un wäa äten deit, at Gott to ieren, wiels hee dankt Gott; wäarent dee, dee nich äten deit, uk Gott dankt un am to ieren nich at.

⁷Kjeena läft fa sikj selfst, un kjeena stoaft fa sikj selfst.

⁸Wan wie läwen, läw wie fa dän Harn; ooda wan wie stoawen, stoaw wie fa dän Harn. Auf wie läwen ooda stoawen, wie jehieren dän Harn.

⁹Daut es wuatoo Christus storf un wada toom läwen kjeem, daut hee äwa beid, Doodje uk Läwendje, Har sennen kunn.

¹⁰Oba du, wuarom rechst du dienen Brooda? Ooda du, wuarom veachst du dienen Brooda? Wie motten aula ver Gott sienen Rechtastool stonen.

¹¹Doa steit jeschräwen: “Soo secha aus ekj läw, sajcht de Har, ver mie woaren sikj aule Kjneeen bieejen, un aule Tungen woaren bekjanen daut ekj Gott sie.”

¹²Doawäajen mott een jiedra von sikj selfst ver Gott Räakjenschoft jäwen.

¹³Well wie dan nich mea eena dän aundren rechten; oba ons leewa väanämen däm näakjsten nich een Hindanis en sienen Wajch to sennen.

¹⁴Ekj weet, un derch dän Harn Jesus sie ekj mie doarenn secha, daut nuscht fa sikj selfst orrein es; oba wäa sikj waut orrein denkjt, fa däm es daut orrein.

¹⁵Oba wan du dienen Brooda statst derch daut, waut du atst, dan es dien Waundel nich en Leew. Brinj däm nich en de Grunt derch dien äten, fa däm Christus jestorwen es.

¹⁶Lot daut nich soo wiet komen, daut doaräwa jelastat woat, waut fa die goot es.

¹⁷Daut Gottesrikj es nich äten un drinkjen. Daut es Jerajchtichkjeit un Fräd un Freid em Heiljen Jeist.

¹⁸Wäa Christus doarenn deent, aun däm haft Gott een Jefaulen, un kaun ver Menschen bestonen.

¹⁹Well wie sträwen to doonen, waut toom Fräd deent, un wuaderch wie eena dän aundren halpen.

²⁰Doo wäajen dien äten nich Gott sien Woakj en de Grunt brinjen. Daut es aula rein, oba daut es nich rajcht, waut to äten, wuaderch een aundra tofaul kjemt.

²¹Daut es bäta nich Fleesch to äten ooda Wien to drinkjen ooda irjent sest waut to doonen, wuaraun dien Brooda sikj stat. [11]

²²Hool dienen Gloowen äwa soone Dinja tweschen die un Gott. Jlekjlich es dee Mensch, dee sikj nich schuldich feelt äwa daut, waut hee jleeft rajcht to sennen.

²³Wäa oba em Twiewel at, moakt sikj schuldich, wiels daut kjemt nich utem Gloowen. Waut nich utem Gloowen kjemt, es Sind. [12]