Read Plautdietsch (Low German) – De Bibel Reema 15 Bible Online

Reema 15 - Plautdietsch (Low German) – De Bibel bible

Reema 15

¹Wie, dee doa stoakj sent, sellen de schwake äare Schwakheit droagen halpen, un nich ons selfst toom Jefaulen läwen.

²Well wie aula onsen näakjsten toom Jefaulen läwen, daut am daut toom gooden un toom oppbuen deenen kaun.

³Soogoa Christus läwd sikj nich selfst toom Jefaulen, oba soo aus jeschräwen steit: “Daut, wuamet see die beleidjen wullen, es opp mie jefollen.”

⁴Wautemma verhäa jeschräwen wia, wia jeschräwen, daut wie doarut lieren sullen, daut wie derch de Jedult un dän Troost en de Schreft wudden Hopninj haben.

⁵Un mucht dee Gott, von däm Jedult un Troost kjemt, junt daut schenkjen, daut jie junt en Christus Jesus eenich sent,

⁶daut jie aula toop eenstemmich onsen Harn Jesus Christus sienen Gott un Voda lowen.

⁷Nämt junt unjarenaunda soo opp aus Christus junt, Gott to Ieren, oppjenomen haft.

⁸Ekj saj junt, daut Jesus Christus de Juden deend om Gott siene Woarheit fausttostalen, daut hee daut derchfieed, waut hee äare Vodasch vesproaken haud;

⁹un daut de Velkja Gott fa siene Jnod lowen muchten, soo aus jeschräwen steit: “Doawäajen well ekj die manke Velkja lowen un von dienen Nomen sinjen.”

¹⁰Un noch eemol sajcht daut: “Oo Velkja, freit junt met sien Volkj met!”

¹¹Un noch eemol: “Aul jie Velkja, loft dän Harn. Sinjt, aule Velkja, am to lowen.”

¹²Un noch eemol sajcht Jesaja: “Doa woat von Isai eene Wartel komen, dee doa rut komen woat, äwa de Velkja to harschen. Opp däm woaren de Velkja äare Hopninj saten.”

¹³Mucht dee Gott, von däm aule Hopninj kjemt, junt derch junen Gloowen en am, vollopp Freid un Fräd schenkjen, daut june Hopninj derch dän Heiljen Jeist siene Krauft, en junt waussen mucht.

¹⁴Miene Breeda, ekj selfst weet sea goot, daut jie daut goode en junt haben, un von aules jenuach weeten, soo daut jie junt unjarenaunda belieren kjennen.

¹⁵Oba ekj hab junt doch äwa välet gaunz driest jeschräwen, om junt denkjentohalpen, wiels Gott mie de Jnod jeschonken haft,

¹⁶Christus Jesus sien Deena aun de Velkja to sennen, an aus een Priesta, Gott sien Evangelium to prädjen, soo daut de Velkja fa Gott een aunjenämet Opfa sent, daut derch dän Heiljen Jeist jeheilicht es.

¹⁷Wiels ekj en Jesus Christus sie, kaun ekj met mienen Deenst fa Gott stolt sennen.

¹⁸Ekj wudd daut nich woagen, von irjent sestwaut to räden, aus daut waut Jesus Christus derch mie derch Wuat un Woakjen,

¹⁹derch Tieekjens un Wunda, un de Krauft von Gott sienen Jeist jewirkjt haft, de Velkja bat doa to brinjen, daut see Gott jehorchen. Un soo hab ekj von Jerusalem bat Illierien aulawäajen daut Evangelium von Christus jeprädicht.

²⁰Ekj sie emma doano utjewast, daut Evangelium doa to prädjen, wua see von Christus noch nuscht wisten, soo daut ekj nich opp een aundren sien Grunt bud.

²¹Leewa, soo aus jeschräwen steit: “Dee, dee noch nuscht von am jesajcht es, woaren seenen, un dee noch nich jehieet haben, woaren vestonen.”

²²Dit es wuarom ekj soo foaken sie vehindat worden, no junt to komen.

²³Oba nu, daut fa mie en dise Jäajenden kjeen Rum mea es to oabeiden, un wiels ekj aul väl Joaren daut velangen hab, junt to seenen,

²⁴plon ekj daut to doonen, wan ekj no Spanien reis. Ekj räakjen junt to besieekjen, wan ekj doa derch kom, un daut jie mie dan wieda opp miene Reis halpen, wan ekj ieescht de Freid jehaut hab, met junt toop to sennen.

²⁵Nu oba sie ekj opp däm Wajch no Jerusalem, de heilje doa to deenen.

²⁶Dee en Mazedonien un Achaja haben jieren waut toopjelajcht, de oame mank de heilje en Jerusalem to halpen.

²⁷Dee freiden sikj, daut to doonen, un secha sent see an daut schuldich. Wan de Velkja derch de Juden äaren jeistlichen Säajen, Jenotten jehaut haben, sent see uk schuldich an mettodeelen, waut see toom Läwen brucken.

²⁸Wan ekj dit nu verecht hab, un doano jeseenen hab, daut see daut kjrieen waut jejäft es worden, [13] well ekj opp mienen Wajch no Spanien, bie junt aunhoolen.

²⁹Un ekj weet, wan ekj hankom, brinj ekj Christus sienen Säajen [14] en volle Mot met.

³⁰Leewe Breeda, ekj sporn junt aun, om onsen Harn Jesus Christus sient haulwen, un derch de Jeistesleew, daut jie mie en Jebäd to Gott biestonen en waut mie väalicht.

³¹Bät doarom, daut ekj en Judäa fa dee bewoat bliew, dee nich jleewen, un daut sikj mien Deenst aun de heilje en Jerusalem, goot oppjenomen mucht woaren,

³²daut ekj derch Gott sienen Wellen, met Freiden hankomen kaun un mie met junt toop vereiwen.

³³Mucht de Frädensgott met junt aula sennen! Amen.