Read Plautdietsch (Low German) – De Bibel Reema 16 Bible Online

Reema 16 - Plautdietsch (Low German) – De Bibel bible

Reema 16

¹Ekj laj noch een goodet Wuat en fa onse Sesta Feebe, dee en de Jemeent en Kenchreä deent,

²daut jie ar em Harn oppnämen, soo aus daut de heilje tookjemt, un daut jie ar en aul äare Jeschaften biestonen, wua ar daut fält. See haft väl aundre, un mie selfst uk, jeholpen.

³Jreest Priszilla un Aquilla, miene Metoabeida en Christus Jesus.

⁴Dee saden äa Läwen fa mie opp Spell. Nich bloos ekj, oba aule nichjudsche Jemeenten sent an sea dankboa.

⁵Jreest uk de Jemeent, dee sikj bie an em Hus vesaumelt. Jreest mien leewen Frint, Epänetus, dee sikj en Asien daut ieeschte to Christus bekjieed.

⁶Jreest Maria, dee sea schwoa fa junt jeoabeit haft.

⁷Jreest mien Frintschoft, Andronikus un Junias, dee met mie toop ensetten musten. Dee tieekjnen ut mank de Apostel, un dee wieren en Christus ea aus ekj.

⁸Jreest Ampliatus, dän ekj em Harn goot sie.

⁹Jreest Urbanus, onsen Metoabeida en Christus, un uk mien leewen Frint, Stachies.

¹⁰Jreest Apelles, dee sikj aus Christ bewäsen haft. Jreest uk dee, dee met Aristobul toop sent.

¹¹Jreest Herodion, mien Frintschoft. Jreest uk dee, von Narzissus siene Famielje, dee em Harn sent.

¹²Jreest Trifäna un Trifosa, dee schwoa fa dän Harn oabeiden. Jreest uk de leewe Persis, dee sea schwoa fa dän Harn jeoabeit haft.

¹³Jreest Rufus, dän de Har jewält haft, un uk siene Mutta, dee uk fa mie eene Mutta jeworden es.

¹⁴Jreest Asinkritus, Flegon, Hermas, Patrobas, Hermes un de Breeda bie an.

¹⁵Jreest Filologus un Julia, Nereus un siene Sesta un Oliempas, un aul de heilje, dee bie an sent.

¹⁶Jreest junt unjarenaunda met een heiljen Kuss. Aule christelje Jemeenten bestalen junt to jreessen.

¹⁷Breeda, wäat junt fa dee, dee Striet un Spoolungen aunstalen, un jäajen de Lia gonen dee jie jelieet haben. Jäft junt nich auf met dee.

¹⁸Soone Menschen sent nich aun Christus onsen Harn, oba aun sikj selfst [15] veskloft; un derch glaute Wieed un Schmeichelräden veleiden see oschuldje Hoaten.

¹⁹Woo jehuarsom jie sent, haft aulemaun jehieet. Doawäajen frei ekj mie äwa junt, oba ekj mucht, daut jie weis sent daut goode to seenen, un oschuldich to bliewen, wan daut to daut schlajchte kjemt.

²⁰De Frädensgott woat dän Soton boolt toopkjnedren, daut jie dän unja de Feet haben. Onsen Harn Jesus Christus siene Jnod met junt! [16]

²¹Timotäus, mien Metoabeida, schekjt junt uk sien Gruss, soo uk Luzius, Jason un Sosipater, mien Frintschoft.

²²Ekj, Tertius, dee disen Breef schreef, jrees junt em christeljen Senn.

²³Gajus, to däm siene Oppnom ekj un de gaunze Jemeent ons freien, schekjt junt sien Gruss. Erastus, de Stautskaussenfiera, un ons Brooda Kwartus bestalen junt uk to jreessen.

²⁴(Mucht onsen Harn Jesus Christus siene Jnod met junt aula sennen!) [17]

²⁵Däm, dee junt bat doa brinjen kaun, daut jie secha stonen, soo aus daut Evangelium un de Prädicht von Jesus Christus lieet, wuaderch daut Jeheemnis openboat es, daut doa wia steljehoolen worden, soolang aus dise Welt jestonen haft,

²⁶daut nu oba jeopenboat un derch de Profeeten Schreften verendach jekomen es, soo aus de eewja Gott daut befolen haud, soo daut aule Velkja aun am jleewen un jehorchen kunnen,

²⁷am, de eensich weisa Gott, saul en Eewichkjeit derch Jesus Christus jeieet woaren! Amen.