Read Plautdietsch (Low German) – De Bibel Reema 3 Bible Online

Reema 3 - Plautdietsch (Low German) – De Bibel bible

Reema 3

¹Waut haben de Juden dan fa een Väarajcht, ooda waut nuzt an de Beschniedunk?

²Daut haft een grooten Wieet. Ieeschtens, an wia daut aunvetrut, waut Gott jerät haud.

³Waut oba, wan doa soone wieren dee nich jleewden? Sull Gott wäajen äaren Ongloowen ontru woaren?

⁴Soont jeft daut niemols! Un wan aule Menschen Läajna sent, Gott es woa, soo aus jeschräwen steit: “Daut du derch diene Wieed jerajchtfoadicht woascht, un toom rajchten kjemst, wan du jerecht woascht.”

⁵Oba wan Gott derch onse Ojjerajchtichkjeit siene Jerajchtichkjeit bewiesen kaun, waut sell wie doatoo sajen? Daut Gott ojjerajcht es, wan hee ons stroft? Ekj räd nu soo aus Menschen räden wudden.

⁶Soont jeft daut nich! Woo sull Gott sest de Welt rechten?

⁷Wan Gott siene Woarheit un Harlichkjeit derch miene Läajes verendach komen, wuarom sull hee mie dan noch aus een Sinda strofen?

⁸Wuarom dan nich sajen, soo aus wie lastalich beschulcht woaren, daut wie räden: Well wie schlajchtet doonen, daut doarut goodet komen kaun? Dee soo sajen, dän traft äa Jerecht met rajcht.

⁹Waut saj wie nu? Sent wie Juden bäta auf? Nä, opp kjeenen Wajch. Wiels wie haben daut aul kloa bewäsen, daut beid, Juden uk Griechen, Sinda sent,

¹⁰soo aus daut jeschräwen steit: “Doa es kjeena dee jerajcht es, uk nich eena.

¹¹Doa es kjeena, dee een Vestentnis fa Gott haft, ooda no am sieekjen deit.

¹²See haben aula Gott sienen Wajch veloten un sent nuzloos jeworden. Doa es nich eena, dee noch deit waut goot es.”

¹³“Äare Kjäl es aus een opnet Grauf; äare Tung rät hinjat Licht fierende Läajes.” “Unja äare Leppen es Schlangenjeft.”

¹⁴“Äa Mul es voll flieekjen un Bettanis.”

¹⁵“See sent plazlich opp de Feet, wan daut doaropp aunkjemt, Bloot to vejeeten.

¹⁶Opp äare Wäaj es sest nuscht aus Trua, wiels see aules en de Grunt brinjen.

¹⁷Un see kjanen dän Wajch nich, opp dän doa Fräd es.”!

¹⁸“See seenen nich, daut Gott to ferchten es.”

¹⁹Wie weeten, daut waut daut Jesaz to sajen haft, sajcht daut to dee, dee unja daut Jesaz sent, soo daut kjeena jäajenaun räden kaun, un de gaunze Welt seenen mott, daut see ver Gott veauntwuatlich sent.

²⁰Wiels derch Jesazeswoakjen, woat kjeen Mensch ver Gott jerajcht woaren, wiels doaderch es daut bloos to seenen, waut Sind es.

²¹Oba nu es Gott met siene Jerajchtichkjeit verendach jekomen, onen daut Jesaz, wan uk daut Jesaz selfst un de Profeeten aul doavon räden deeden.

²²Daut es Gott siene Jerajchtichkjeit, dee hee aul dee jäwen deit, dee aun Jesus Christus jleewen.

²³Doa es kjeen Unjascheet: Aulemaun haft jesindicht un kjemt doarenn too kort, waut hee bie Gott sennen saul,

²⁴schenkjt Gott an de Rajchtfoadjunk ut Jnoden, derch de Radunk, dee en Christus Jesus es.

²⁵Dän haft Gott rut jewält aus een Jnodenstool, wua, derch Christus sien Bloot, Vejäwunk fa onse Sinden to haben es, wan wie aun Christus jleewen. Gott siene Jerajchtichkjeit sull doaderch verendach komen, daut hee de Sinden vejäwen deed, dee unja siene Jedult jebläwen wieren.

²⁶Daut sull nu bewiesen daut Gott jerajcht es, un daut hee dee jerajcht moakt, dee aun Jesus jleewen.

²⁷Waut woat dan von aul ons grooträden? Daut es ut doamet. Derch waut fa een Jesaz? Derch Woakjen? Nä! Derch een Jesaz, daut utem Gloowen kjemt!

²⁸Wie stonen doaropp, daut een Mensch derch dän Gloowen jerajcht woat, un nich derch Woakjen, dee daut Jesaz velangt.

²⁹Ooda es Gott bloos de Juden äa Gott? Es hee nich uk de Velkja äa Gott? Jo, uk de Velkja äa Gott.

³⁰Gott es mau eena. Hee woat de beschnädne rajchtfoadjen, wiels see jleewen, un jrod soo uk de onbeschnädne, derch äaren Gloowen.

³¹Moak wie derch dän Gloowen dan daut Jesaz to nuscht? Opp kjeenen Wajch! Jrod em Jäajendeel, wie saten daut Jesaz en Krauft.