Read Plautdietsch (Low German) – De Bibel Reema 4 Bible Online

Reema 4 - Plautdietsch (Low German) – De Bibel bible

Reema 4

¹Waut sell wie von Abraham, onsen Staumvoda, sajen? Woo wia daut met am?

²Wan Abraham derch siene Woakjen jerajchtfoadicht wort, dan haft hee waut wuaropp hee groot räden kunn, oba nich ver Gott.

³De Schreft sajcht: “Un Abraham jleewd, un daut wort am aus siene Jerajchtichkjeit aunjeräakjent.”

⁴Een Oabeida sien Loon woat nich aus een Jeschenkj aunjeseenen, oba aus waut, daut hee vedeent haft.

⁵Oba fa däm, dee nich met Woakjen omjeit, oba aun dän jleeft, dee de gottloose jerajcht moakt, däm woat sien Gloowen aus siene Jerajchtichkjeit aunjeräakjent.

⁶Soo aus David aul von dän Säajen räd, dee äwa soonen Mensch kjeem, dän Gott onen siene Woakjen jerajcht spräakjen deed:

⁷“Seelich sent dee, dee äare ojjerajchte Sachen vejäft sent, un dee äare Sinden bedakjt sent!

⁸Seelich es dee Maun, däm de Har siene Sinden nich aunräakjent!”

⁹Es dise Seelichkjeit dan bloos fa dee, dee beschnäden sent ooda uk fa dee, dee nich beschnäden sent? Wie sajen, daut “Abraham sien Gloowen aus siene Jerajchtichkjeit aunjeräakjent wort.”

¹⁰Wanea wort am sien Gloowen aus siene Jerajchtichkjeit aunjeräakjent? Aus hee beschnäden wia ooda aus hee noch nich beschnäden wia? Nich aus beschnäden, oba aus hee noch nich beschnäden wia.

¹¹Un hee kjrieech de Beschniedunk aus een Tieekjen fa siene Jerajchtichkjeit derch däm Gloowen, dän hee haud ea hee beschnäden wia. Soo sull hee een Voda äwa aul dee sennen, dee doa jleewen wudden, onen beschnäden to woaren, daut an de Jerajchtichkjeit kaun aunjeräakjent woaren.

¹²Un jrod soo sull hee uk een Voda sennen fa de beschnädne, dee nich von beschnädne komen un oba en onsen Voda Abraham sienen Gloowen waundlen, dän hee haud ea hee beschnäden wia.

¹³Gott vespruak Abraham un siene Nokomen nich, daut see de Welt oawen wudden, wiels see daut Jesaz hilden, oba wiels äare Jerajchtichkjeit derch däm Gloowen kjeem.

¹⁴Wan dee, dee daut met daut Jesaz hoolen, de Oawen sent, dan es daut met dän Gloowen nuscht, un waut Gott vesproaken haft, haft dan de Krauft veloaren,

¹⁵wiels daut Jesaz foddat Rach. Wua oba kjeen Jesaz es, doa es uk kjeen äwaträden.

¹⁶Doawäajen henjt de Jerajchtichkjeit bie ons gaunz un goa vom Gloowen auf, daut et ut Jnoden komen kaun, un daut sien Vespräakjen fa aule Nokomen faust bestonen bleef, nich bloos fa dee, dee daut met daut Jesaz hoolen, oba uk aul dee, dee derch dän Gloowen to Abraham siene Famielje jehieren. Dee es een Voda äwa ons aula,

¹⁷soo aus daut jeschräwen steit: “Ekj hab die een Voda äwa väl Velkja jemoakt” en de Jäajenwuat von Gott, aun dän du jleewsd un dee de Doodje daut Läwen jeft un daut verendach brinjt, waut noch nich doa es.

¹⁸Abraham hopt noch, aus aul nuscht to hopen wia, daut hee noch een Voda äwa väl Velkja woaren wudd, soo aus am wia jesajcht worden: “Soo väl sellen diene Nokomen sennen.”

¹⁹Hee leet doawäajen nich no em Gloowen, wan hee doaraun docht, daut sien Kjarpa soo goot aus doot wia, wiels hee wia bie 100 Joa oolt, un daut Sara äare Muttalief kjeen Läwen mea haud.

²⁰Oba en sienen Gloowen twieweld hee nich aun daut waut Gott am vesproaken haud. Hee wort em Gloowen emma stoakja un jeef Gott de Iea.

²¹Un hee wia sikj gaunz secha daut Gott am daut jäwen kunn, waut hee am vesproaken haud.

²²Doawäajen wort am daut “aus Jerajchtichkjeit aunjeräakjent”.

²³Daut wort äwent nich bloos om sient haulwen jeschräwen, daut am daut wia aunjeräakjent worden,

²⁴oba uk om ons haulwen, wiels wie jleewen aun dän, dee Jesus vom Doot oppwuak,

²⁵dee doa hanjejäft wort fa onse Sinden to stoawen un vom Doot oppjewakjt wort, daut wie kunnen jerajchtfoadicht woaren.