Read Plautdietsch (Low German) – De Bibel Reema 7 Bible Online

Reema 7 - Plautdietsch (Low German) – De Bibel bible

Reema 7

¹Ooda weet jie nich Breeda (wiels ekj räd to soone dee daut Jesaz kjanen), daut daut Jesaz mau soo lang äwa een Mensch to jebeeden haft, aus de Mensch läft.

²Wiels eene befriede Fru es aun äaren Maun mau soo lang jebungen, aus dee Maun läft. Oba wan äa Maun stoaft, es see von daut Jesaz loos, daut ar aun äaren Maun bunk.

³Wan see sikj aun een aundren Maun binjen lat, wäarent äa Maun noch läft, es see de Ehebräakjarin; oba wan äa Maun stoaft es see von daut Jesaz loos, soo daut see nich de Ehebräakjarin es, wan see sikj aun een aundren Maun binjt.

⁴Miene Breeda, jrod soo wia daut uk, daut jie derch Christus sienen Doot fa daut Jesaz storwen, daut jie aun een aundren kunnen jebungen woaren, daut es aun dän, dee vom Doot oppstunt, daut jie fa Gott Frucht droagen.

⁵Soolang aus wie onbekjieet em Fleesch wieren, wieren de sintelje Liedenschoften, derch daut Jesaz jereizt, un onse Jläda aun de Oabeit Frucht to droagen, dee toom Doot fieed.

⁶Oba nu sent wie von daut Jesaz loos un doot fa daut, aun daut wie jebungen wieren. Wie haben nu een nieen Deenst em Jeist un nich mea en de oole Buakstow vom Jesaz.

⁷Waut sell wie dan sajen? Es daut Jesaz Sind? Oba niemols! Ekj wudd niemols jewist haben waut Sind wia, wan daut Jesaz nich jekomen wia. Ekj wudd nich weeten waut Lost meend, wan daut Jesaz nich säd: “Lot die nich jankren.”

⁸Oba de Sind brukt daut Jesaz, aulahaunt Lost en mie to wakjen. Wua kjeen Jesaz es, doa es de Sind doot.

⁹Ekj läwd to eene Tiet onen daut Jesaz. Oba aus daut Jesaz kjeem, läwd de Sind opp un ekj storf.

¹⁰Un daut kjeem soo rom, daut daut Jesaz, daut mie haud sult Läwen brinjen, mie dän Doot brocht.

¹¹De Sind neem de Jeläajenheit mie derch daut Jesaz auntoschmäaren un derch daut selwje Jesaz doottomoaken.

¹²Un doch es daut Jesaz heilich un daut Jeboot es heilich, rajcht, un goot.

¹³Wort daut waut goot es, fa mie eene Uasoak toom Doot? Opp kjeenen Wajch! Daut wia de Sind, daut et verendach komen sull, daut et de Sind wia, dee mie dän Doot brocht, un daut et verendach kjeem woo sindhauft de Sind es.

¹⁴Wie weeten, daut daut Jesaz jeistlich es, oba ekj sie fleeschlich, een Sklow aun de Sind vekoft.

¹⁵Ekj kaun mie selfst nich vestonen, wiels ekj doo nich waut ekj doonen well, oba doo jrod daut waut mie jäajenaun es.

¹⁶Oba wan ekj jrod daut doo, waut ekj wensch nich to doonen, dan stemm ekj met daut Jesaz un sto too, daut daut Jesaz goot es.

¹⁷Dan sie ekj daut nich mea, dee daut deit. Dan es daut de Sind dee en mie wont.

¹⁸Wiels ekj weet, daut en mie, daut es en mien Fleesch, wont nuscht goodet. Dän Wellen goodet to doonen hab ekj, oba ekj brinj daut nich foadich.

¹⁹Daut goode, daut ekj doonen mucht, doo ekj nich. Daut beese oba, daut ekj nich doonen mucht, doo ekj.

²⁰Oba wan ekj jrod daut doo, waut ekj nich doonen mucht, dan sie ekj daut nich mea, dee daut deit. Dan es daut de Sind, dee en mie wont.

²¹Daut es dan nu aul eemol soo: Ekj mucht daut goode doonen oba daut beese es noch en mie.

²²Ennalich stemm ekj met Freiden met Gott sien Jesaz.

²³Oba en miene Jläda see ekj een aundret Jesaz, daut jäajen daut Jesaz stritt, daut ekj doonen well, un mie aun daut sintelje Jesaz veskloft, daut noch en mie es.

²⁴Wäa woat mie älendjet Wrak von dän doodjen Kjarpa friemoaken?

²⁵Gott dank wie doafäa, derch Jesus Christus, onsen Harn! Dan es daut nu soo: Ekj selfst met mienen Wellen deen Gott sien Jesaz, oba mien Fleesch de Sind äa Jesaz.