Read Plautdietsch (Low German) – De Bibel Reema 8 Bible Online

Reema 8 - Plautdietsch (Low German) – De Bibel bible

Reema 8

¹Dan es nu nuscht mea to vedaumen aun dee, dee en Christus Jesus sent, dee nich soo läwen aus daut Fleesch velangt, oba soo aus de Jeist daut velangt.

²De Jeist dee derch Christus Jesus Läwen jeft, haft mie derch sien Jesaz von de Sind un dän Doot sien Jesaz friejemoakt.

³Waut daut Jesaz nich doonen kunn, wiels daut derch daut Fleesch jeschwakjt wia, daut deed Gott. Hee schekjt sienen Sän en Menschenjestault aus een Opfa [4] fa de Sind un vedaumd de Sind em Fleesch,

⁴daut et en ons kunn foadich jebrocht woaren, waut daut Jesaz velangd, dee wie nich soo läwen aus daut Fleesch velangt, oba soo aus de Jeist daut velangt.

⁵Dee, dee noch fleeschlich sent, beschaftjen sikj met daut, daut toom Fleesch jehieet; dee oba, dee dän Jeist haben, met Dinja, dee vom Jeist komen.

⁶Wäa sikj bloos met daut Fleesch beschafticht, fa däm meent daut de Doot. Wäa oba dän Jeist haft, fa däm meent daut Läwen un Fräd.

⁷Wäa fleeschlich jesonnen es, dee es fientlich jäajen Gott, wiels daut Fleesch nich Gott unjadon es, un uk nich kunn, wan daut uk noch wull.

⁸Dee, dee noch em Fleesch sent, kjennen Gott nich jefaulen.

⁹Oba jie sent nich em Fleesch, jie sent em Jeist, wan Gott sien Jeist werkjlich en junt wont. Wan oba irjentwäa nich Christus sienen Jeist haft, dee es dan uk nich eena von de sienje.

¹⁰Un wan Christus en junt es, un de Kjarpa dan uk derch de Sind doot es, soo läft jun Jeist om de Jerajchtichkjeit haulwen.

¹¹Oba wan däm sien Jeist en junt wont, dee Jesus vom Doot oppwuak, dan woat dee, dee Christus Jesus vom Doot oppwuak, june stoafliche Kjarpasch uk wada toom Läwen brinjen derch sienen Jeist, dee en junt wont.

¹²Breeda, dan es daut nu soo: Schildna sent wie, oba nich aum Fleesch, daut wie doano läwen motten.

¹³Wan jie soo läwen aus daut Fleesch velangt, mott jie stoawen. Oba wan jie derch dän Jeist daut Sintelje en junt doot moaken, woa jie läwen.

¹⁴Dee, dee von Gott sienen Jeist jeleit woaren, sent Gott siene Kjinja.

¹⁵Jie haben nich een Sklowenjeist jekjräajen, daut jie junt ferchten motten. Jie haben een Jeist jekjräajen derch dän Gott junt aunnemt aus siene Kjinja, un jie am aunroopen aus Voda, leewa Voda.

¹⁶De Jeist selfst jeft onsen Jeist daut Zeichnis, daut wie Gott siene Kjinja sent.

¹⁷Sent wie oba Kjinja, dan sent wie uk Gott siene Oawen un Christus siene Metoawen, daut es, wan wie met am toop lieden, daut wie uk met am toop veharlicht woaren.

¹⁸Fa mie to beseenen, sent dise lieden nich wieet met de Harlichkjeit to vejlikjen, dee ons saul openboat woaren.

¹⁹Aules waut jemoakt es, luat ut ojjedult, daut Gott siene Kjinja verendach komen.

²⁰De Kjreatua wort jäajen äaren Wellen, von Gott bestemt to vegonen, wiels Gott daut soo wull, en de Hopninj,

²¹daut de Kjreatua selfst von äare Sklowarie, dee daut vedoawen äwa an brinjt, wudd looskomen, un en de Gotteskjinja äare Frieheit un Harlichkjeit nenn komen.

²²Wie weeten daut de gaunze Kjreatua noch emma stänent en Jeburtsweedoag lieden deit.

²³Un nich bloos de Kjreatua, oba wie selfst, dee Gott aul sienen Jeist jeschonken haft, luaren doano, daut Gott ons aus siene Säns oppnämen un von onsen vejenjklichen Kjarpa friemoaken saul.

²⁴En Hopninj word wie jerat. Oba eene Hopninj dee eena seenen kaun, es kjeene Hopninj. Wuarom sull eena opp waut hopen, daut eena sitt?

²⁵Oba wan wie opp waut hopen, daut wie nich seenen, dan lua wie jeduldich doano.

²⁶Un jrod soo halpt de Jeist ons en onse Schwakheiten, wiels wie weeten nich emol, woo wie soorajcht bäden sullen. Oba de Jeist bät fa ons met soone Jefeelen, daut wie nich Wieed doafäa haben.

²⁷Un hee, dee onse Hoaten unjasieekjt, weet waut de Jeist em Senn haft; wiels de Jeist bät fa de heilje, doano aus Gott daut jefelt.

²⁸Wie weeten, daut Gott en aule Dinja emma daut baste wirkjt fa dee, dee am [5] goot sent: Daut sent dee, dee hee jeroopt haft, soo aus hee daut wull.

²⁹Dee, dee hee verhäa jewält haud, haud hee bestemt sienen Sän to likjnen, daut dee von väle Breeda mucht de Ieeschtjebuarna sennen.

³⁰Un dee, dee hee em verut bestemt haud, dee haft hee uk jeroopt; un dee, dee hee jeroopt haft, haft hee uk jerajchtfoadicht; un wäm hee rajchtfoadijd, dee veholp hee daut see harlich worden.

³¹Waut sell wie hiatoo sajen? Wan Gott opp onse Sied es, wäa kaun dan jäajen ons sennen?

³²Wudd dee, dee sienen ieejnen Sän fa ons aula hanjeef, ons dan nich aules met am schenkjen?

³³Wäa well Gott siene utjewälde beschuljen? Gott es daut dee an jerajcht moakt.

³⁴Wäa well vedaumen? Christus Jesus es hia, dee jestorwen es. Un mea aus daut, hee wort vom Doot oppjewakjt, un es nu bie Gott to rajchte Haunt un bät fa ons.

³⁵Waut kaun ons Christus siene Leew wajchnämen? Sullen Lieden ooda Angst ooda Vefoljunk ooda Hunga ooda Oamoot ooda Jefoa ooda daut Schwieet?

³⁶Soo aus jeschräwen steit: “Om dient haulwen woa wie dän dachäwa hanjeschlacht. Wie woaren aus Schlachtschop aunjeseenen.”

³⁷Oba en aul dit hab wie de äwahaunt, om däm sient haulwen, dee ons goot es.

³⁸Ekj sie mie secha, daut nich Doot ooda daut Läwen, nich Enjel ooda Jewaulten, nich Jäajenwuat ooda Tookunft,

³⁹nich de Welt äwa ons, ooda de Welt unja ons, ooda irjent eene aundre Kjreatua ons von Gott siene Leew scheeden kaun, dee en Christus Jesus, onsen Harn es.