Read Plautdietsch (Low German) – De Bibel 1. Korinta 11 Bible Online

1. Korinta 11 - Plautdietsch (Low German) – De Bibel bible

1. Korinta 11

¹Nämt mie toom Biespel, soo aus ekj Christus toom Biespel näm!

²Ekj low junt doafäa, daut jie aun mie denkjen, un daut jie junt aun de Lia hoolen, soo aus ekj junt dee jeef.

³Oba ekj mucht, daut jie vestonen, daut Christus de Kopp (daut Haupt) es vom Maun, de Maun es de Kopp von de Fru, un Gott es de Kopp von Christus.

⁴Wan een Maun bät ooda profeetisch rät un haft sienen Kopp bedakjt, entieet hee sienen Kopp.

⁵Oba wan eene Fru bät ooda profeetisch rät un haft äaren Kopp nich bedakjt, entieet see äaren Kopp. Daut wudd jrod soo sennen, aus wan see kol jeschoaren wia.

⁶Wan eene Fru sikj nich dän Kopp bedakjen well, dan kunn see sikj uk de Hoa aufschnieden. Daut es fa eene Fru eene Schaund, sikj de Hoa auftoschnieden ooda dän Kopp kol to schäaren, un doawäajen sull see sikj dän Kopp bedakjen.

⁷Een Maun sull sienen Kopp nich bedakjt haben, wiels hee Gott sien Bilt un Aufglaunz wadaspieejelt. De Fru oba spieejelt däm Maun sien Bilt wada.

⁸De Maun kjeem nich von de Fru häa, oba de Fru vom Maun.

⁹De Maun wort nich wäajen de Fru jeschaufen, oba de Fru wäajen däm Maun.

¹⁰Wäajen de Enjel äat haulwen saul de Fru een Tieekjen von Ordnunk opp däm Kopp droagen.

¹¹Un äwajens, em Harn es nich de Maun waut onen de Fru, un nich de Fru waut onen dän Maun.

¹²Soo aus de Fru vom Maun kjemt, soo kjemt uk de Maun derch de Fru, oba aules kjemt von Gott.

¹³Beuadeelt fa junt selfst, auf daut fa eene Fru aunstendich es, Gott auntobäden onen dän Kopp bedakjt to haben.

¹⁴Lieet de Natua selfst junt nich, daut daut fa eenen Maun kjeene Iea es, wan hee lange Hoa haft?

¹⁵Eene Fru oba woat derch äare lange Hoa jeieet, dee sent ar aus een Bedakjunk jejäft.

¹⁶Oba wan wäa ut es no strieden, saul hee weeten, wie haben dee Jewanheit nich, un Gott siene Jemeenten uk nich.

¹⁷Waut ekj junt noch wieda to sajen hab, doarenn kaun ekj junt nich lowen, wiels soo aus jie toopkomen, daut es mea toom Schoden aus toom nutzen.

¹⁸Aus ieeschtet hia ekj, daut mank junt Spoolungen sent wan jie aus Jemeent toopkomen, un toom Deel jleew ekj daut.

¹⁹Daut mott uk to Spoolungen mank junt komen, daut et verendach kjemt, wäa ver Gott rajchtschaufen es.

²⁰Wan jie dan toopkomen, hool jie nich werkjlich dän Harn sien Owentmol.

²¹Wäajen bie junem äten at een jiedra ieescht daut sienje ut, un eena es hungrich jebläwen un de aundra es bedrunken.

²²Waut es soont? Kjenn jie nich tus äten un drinkjen? Ooda veacht jie Gott siene Jemeent un beschämen dee, dee nuscht haben? Waut saul ekj doatoo sajen? En dit woa ekj junt nich lowen!

²³Waut ekj junt jejäft hab, hab ekj vom Harn jekjräajen: En de Nacht, aus de Har Jesus veroden wort, neem hee Broot,

²⁴un aus hee doafäa jedankt haud, bruak hee daut un säd: Dit es mien Kjarpa, dee fa junt jebroaken woat; [8] nämt un ät, om aun mie to denkjen.

²⁵Jrod soo neem hee nom äten uk daut Kuffel un säd: Dit Kuffel es de niea Bunt en mienem Bloot; wan jie daut drinkjen, doot daut, om aun mie to denkjen.

²⁶Jiedatsmol aulsoo, wan jie dit Broot äten un von dit Kuffel drinkjen, saj jie doamet, daut de Har jestorwen es, un daut, soo lang bat hee wada kjemt.

²⁷Wäa von dit Broot at un von däm Harn sien Kuffel drinkjt, un läft nich soo aus sikj daut jehieet, veschulcht sikj doaderch aum Harn sien Bloot un Kjarpa.

²⁸Doawäajen lot jieda Mensch sikj selfst unjasieekjen, un dan von daut Broot äten un von daut Kuffel drinkjen.

²⁹Wiels wäa soo äten un drinkjen deit, daut hee Christus sienen Kjarpa un sien Bloot nich achten deit, dee brinjt doaderch daut Jerecht äwa sikj.

³⁰Daut es wuawäajen jie soo väl schwake un kranke mank junt haben, un een Schoof sent jestorwen.[9]

³¹Wan wie ons selfst rechten wudden, wudd wie nich jerecht woaren.

³²Wan wie oba vom Harn jerecht woaren, woa wie doaderch trajcht jeholpen, daut wie nich met de Welt toop vedaumt woaren.

³³Doawäajen miene Breeda, wan jie toopkomen toom äten, dan wacht bat jie aula toop sent.

³⁴Wäa hungrich es, däm lot tus äten, soo daut sikj daut toopkomen nich toom Jerecht entwekjelt. Daut äwaje woa ekj ordnen, wan ekj hankom.