Read Plautdietsch (Low German) – De Bibel 1. Korinta 12 Bible Online

1. Korinta 12 - Plautdietsch (Low German) – De Bibel bible

1. Korinta 12

¹Waut jeistliche Gowen [10] aunbelangt, Breeda, doaräwa well ekj junt nich em onkloaren loten.

²Jie weeten, aus jie Gott noch nich kjanden, word jie sea stoakj no de stomme Jetta hanjetrocken.

³Doawäajen saj ekj junt, kjeena woat jäajen Jesus fluchen, dee derch Gott sienen Jeist rät, un kjeena woat Jesus aus Harn aunerkjanen, buta derch dän Heiljen Jeist.

⁴Doa sent veschiedne Gowen, oba doa es een Jeist.

⁵Doa sent veschiedne Deensten, oba doa es een Har.

⁶Doa sent veschiedne Sorten von Krauft, oba doa es een Gott, dee aules en aulen wirkjt.

⁷Daut waut de Jeist en jiedrem wirkjt, es doatoo jejäft, daut daut aulen toom nutzen deenen saul.

⁸Eenem woat daut derch dän Jeist jejäft, en Weisheit to räden. Eenem aundren woat daut derch dän selwjen Jeist jejäft, Erkjantnis verendach to brinjen.

⁹Eenem aundren es de Gloowen jejäft, derch dän selwjen Jeist. Eenem aundren es de Gow jejäft, to heelen derch dän selwjen Jeist.

¹⁰Eenem aundren es de Krauft jejäft, Wunda to doonen. Eenem aundren es jejäft, profeetisch to räden; eenem aundren, Jeista to unjascheeden; eenem aundren, veschiedne Sproaken to räden; un eenem aundren, de Sproaken uttolajen.

¹¹Oba aul dit wirkjt een un deeselwja Jeist, un deelt eenem jiedren doano too, aus hee daut well.

¹²Soo aus een Kjarpa een gaunzet es, wan dee uk väl Jläda haft, un aul dee Jläda, soo väl aus daut uk sent, een Kjarpa sent, soo es daut uk met Christus.

¹³Wie sent aula derch eenen Jeist en eenen Kjarpa nenn jedeept, auf Juden ooda Griechen, auf Sklowen ooda Friee, un wie haben aula dän selwjen Jeist to drinkjen jekjräajen.

¹⁴Een Kjarpa es nich met een Jlett jemoakt, oba met väle.

¹⁵Wan de Foot sajen wudd: Wiels ekj nich eene Haunt sie, sie ekj nich een Poat aum Kjarpa, doawäajen wudd dee emma noch een Poat aum Kjarpa sennen.

¹⁶Un wan daut Ua sajen wudd: Wiels ekj nich een Uag sie, sie ekj nich een Poat aum Kjarpa, doawäajen wudd daut noch emma een Poat aum Kjarpa sennen.

¹⁷Wan de gaunze Kjarpa een Uag wia, wua wudd daut hieren bliewen? Wan de gaunze Kjarpa Ua wia, woo sull eena rikjen kjennen?

¹⁸Oba nu haft Gott daut met de Jläda aum Kjarpa soo toopjestalt aus hee daut fa goot befungen haft.

¹⁹Wan dee aula een Organ wieren, woo kunn daut dan een Kjarpa jäwen?

²⁰Oba nu sent doa väl Jläda, oba mau een Kjarpa.

²¹Daut Uag kaun nich to de Haunt sajen: Ekj bruck die nich. Un de Kopp kaun nich to de Feet sajen: Ekj bruck junt nich.

²²Daut es jrod aundasch: Dee Jläda aum Kjarpa, dee ons aum schwaksten väakomen, sent de needichste.

²³Un dee Jläda aum Kjarpa, dee no onse Meenunk weinja Iea traft, iea wie aum mieeschten. Un fa dee Jläda, dee wie nich jieren seenen loten, sorj wie besondasch,

²⁴wiels de aundre brucken daut nich soo. Oba Gott haft de Jläda aum Kjarpa soo toopjestalt, un haft de jerinjere, dee daut brucken, mea Iea jejäft.

²⁵Doaräwa saul nich eene Spoolunk em Kjarpa sennen, de Jläda sellen aula jlikj eena fa dän aundren sorjen.

²⁶Wan een Jlett litt, lieden aule Jläda met. Un wan een Jlett jeieet woat, freien de aundre sikj aula met.

²⁷Jie sent nu Christus sien Kjarpa, un een jiedra es een Jlett aun am.

²⁸En de Jemeent haft Gott ieeschtens Apostel enjesat, tweedens Profeeten, dreddens Lierasch, dan Wundawirkja, dan soone, dee de Gow haben, to heelen, Helpa, Vewaulta, un soone, dee en veschiedne Sproaken räden.

²⁹Sent daut aules Apostel? Sent daut aules Profeeten? Sent daut aules Lierasch? Kjennen dee aula Wunda doonen?

³⁰Haben dee aula de Gow to heelen? Kjennen dee aula veschiedne Sproaken räden? Kjennen dee aula utlajen?

³¹Sträft iernstlich no de hechre Gowen! Un ekj woa junt noch eenen bätren Wajch wiesen.