Read Plautdietsch (Low German) – De Bibel 1. Korinta 16 Bible Online

1. Korinta 16 - Plautdietsch (Low German) – De Bibel bible

1. Korinta 16

¹Waut de Kollakjt fa de heilje aunbelangt, doot soo aus ekj de galatische Jemeenten aunordnen deed to doonen.

²Aun jieda ieeschten Dach en de Wäakj saul een jiedra eene bestemde Somm auntsied lajen un saumlen, doano aus siene Ennom es, daut wie nich noch kollakjten motten, wan ekj kom.

³Wiels wan ekj kom, well ekj de Mana, dee jie vetruen, met Breew vesorjen un met june Gow no Jerusalem schekjen.

⁴Un wan mie daut rodsom sitt, daut ekj selfst uk reis, dan sellen see met mie reisen.

⁵Ekj well äwa Mazedonien no junt komen. Derch Mazedonien well ekj mau derchreisen.

⁶Wan daut jeit, woa ekj een stootje bie junt bliewen, veleicht soogoa dän Winta äwa. Jie kjennen mie dan opp de wiedre Reis halpen, wua ekj dan han well.

⁷Ekj well junt nich bloos biem vebiegonen besieekjen. Wan de Har daut toolat, well ekj lenjre Tiet met junt toobrinjen.

⁸Oba ekj woa bat Pinjsten en Efesus bliewen,

⁹wiels mie doa eene Däa opjegonen es fa eene vespräakjende Oabeit. Oba doa sent uk väle, dee jäajen mie sent.

¹⁰Wan Timotäus kjemt, dan sorcht doafäa, daut hee nuscht bie junt to ferchten haft. Hee oabeit fa dän Harn jrod soo aus ekj.

¹¹Kjeena saul am veachten. Stot am bie un halpt am en Fräd opp dän Wajch, daut hee no mie komen kaun. Ekj wacht fa am, toop met de aundre Breeda.

¹²Wäajen onsen Brooda Apollos sell jie weeten, daut ekj am foaken oppjemuntat hab, met aundre Breeda no junt to komen. Hee wull oba nich nu komen. Hee woat oba komen wan am daut paust.

¹³Siet waka, stot faust em Gloowen, siet mootich un siet stoakj!

¹⁴Aules saul en Leew jedonen woaren.

¹⁵Jie weeten, daut Stefanas un siene Famielje en Achaja de ieeschte wieren, dee toom Gloowen aun Jesus kjeemen, un daut see sikj fa de heilje em Deenst jestalt haben. Breeda, ekj froag junt iernstlich,

¹⁶daut jie junt soone unjaordnen, un aule, dee metoabeiden un sikj bemieejen.

¹⁷Ekj wia froo aus Stefanas, Fortunatus un Achaikus aunkjeemen. Dee deeden aun june Städ waut needich wia, wiels jie nich hia wieren.

¹⁸Dee haben mienen un junen Jeist oppjefrescht. Soone Menschen sullen jeacht un aunerkjant woaren!

¹⁹De Jemeenten en Asien bestalen junt to jreessen. Aquilla un Priszilla un äare Husjemeent schekjen junt eenen sea woamen Gruss em Harn.

²⁰Aule Breeda hia bestalen junt to jreessen. Jreest junt unjarenaunda met däm heiljen Kuss.

²¹Ekj, Paulus, schriew junt disen Gruss met miene ieejne Haunt.

²²Wäa onsen Harn nich goot es, stalt sikj unja eenen Fluch. Komm, ons Har!

²³Mucht de Jnod von onsem Harn Jesus met junt sennen!

²⁴Ekj sie junt en Christus Jesus aula goot!