Read Plautdietsch (Low German) – De Bibel 1. Korinta 5 Bible Online

1. Korinta 5 - Plautdietsch (Low German) – De Bibel bible

1. Korinta 5

¹Doa jeit een Jeräd om, daut bie junt Onmoral es, soo aus daut nich emol mank dee to finjen es, waut Gott nich kjanen, daut doa eena met de Fru von sienem Voda toop läft.

²Un jie billen junt noch waut en! Sull jie nich leewa truarich jeworden sennen un dän ut june Jemeenschoft jedonen haben, dee daut deed?

³Wan ekj perseenlich uk nich doa sie, em Jeist sie ekj doa. Un ekj hab mien Uadeel aul reed äwa dän, dee daut jedonen haft, jrod soo aus wan ekj doa wia.

⁴Wan jie junt en Jesus Christus sienen Nomen vesaumlen woaren, un mien Jeist toop met Jesus Christus un siene Krauft uk bie junt sennen woaren,

⁵dan saul dee Maun däm Soton äwajäft woaren toom vedoawen von sienem Kjarpa, daut sien Jeist noch jerat woaren kaun aun däm Harn Jesus [4] sienen Dach.

⁶Jun grootsch doonen es nich goot. Weet jie nich, daut een kjlienet beskje Häw dän gaunzen Dieech sua moakt?

⁷Schauft dän oolen Suadieech wajch, daut jie een niea Dieech sent. Jie sent doch Broot onen Suadieech. Wiels wie haben Christus aus ons Passalaum, daut aul fa ons jeopfat es.

⁸Well wie doch rechtich fieren, nich met oolen Suadieech, uk nich met Dieech von Sind un schlajchtem vesuat, oba met Broot von Reinheit un Woarheit.

⁹Ekj schreef junt en mienem Breef, daut jie nich met onmoralische Menschen vekjieren sullen.

¹⁰Un ekj meen doamet nich dee waut en dise Welt huaren ooda jiezich sent ooda stälen ooda Jetta deenen, wiels dan must jie dise Welt veloten.

¹¹Väl mea hab ekj junt jeschräwen, daut jie nich sellen Jemeenschoft haben met eenem, dee sikj een Brooda nant, un oba huat ooda jiezich es ooda Jetta deent ooda drinkjt ooda lastat ooda stält. Met soonem sell jie nich emol toop äten.

¹²Waut hab ekj doamet to doonen, dee to rechten, dee butre Jemeent sent? Sell jie nich dee rechten, dee bennen sent?

¹³Dee, waut buten sent, dee woat Gott rechten. Oba dän beesen Maun mank junt, dän sell jie rut saten!