Read Plautdietsch (Low German) – De Bibel 1. Korinta 9 Bible Online

1. Korinta 9 - Plautdietsch (Low German) – De Bibel bible

1. Korinta 9

¹Sie ekj nich frie? Sie ekj nich een Apostel? Hab ekj nich Jesus onsen Harn jeseenen? Sent jie nich de Bewies fa miene Oabeit em Harn?

²Un wan aundre mie dan uk nich fa een Apostel aunerkjanen, jie oba doonen. Daut jie Christen jeworden sent, es een Bewies, daut ekj een Apostel sie.

³Dit es woo ekj dee, dee mie veuadeelen, auntwuaten doo:

⁴Hab wie nich daut rajcht, to äten un to drinkjen?

⁵Hab wie nich daut rajcht, eene christelje Fru met to haben, soo aus de aundre Apostel un däm Harn siene Breeda un Kefas?

⁶Ooda sent daut bloos Barnabas un ekj, dee fa äa Läwen oabeiden motten?

⁷Wäa woat opp siene ieejne Kosten aus Soldot deenen? Wäa plaunt eenen Wiengoaden un at nich von de Frucht? Wua es een Hoad, dee nich von de Malkj von siene ieejne Häad drinkjt?

⁸Saj ekj dit bloos, wiels Menschen soo denkjen? Sajcht daut Jesaz nich uk soo?

⁹En Moses sien Jesaz steit jeschräwen: “Du saust däm Oss, dee daut Jeträajd utdrascht, nich een Mulkorf oppsaten.” Wia Gott daut om de Ossen to doonen?

¹⁰Secha säd hee daut wäajen ons, nich soo? Un bestemt es wäajen ons jeschräwen, wäa doa plieecht, saul en Hopninj plieejen, un wäa doa drascht, saul en de Hopninj draschen, een Poat von de Arnt to kjrieen.

¹¹Wan wie jeistlichet Sot en junt jeseit haben, es daut dan too väl velangt, von junt to arnten, waut wie toom Läwen brucken?

¹²Wan aundre dit rajcht aun junt haben, sull wie daut nich ea haben? Oba wie haben ons rajcht nich utjenuzt. Wie nämen dit aules leewa opp ons, om däm Evangelium von Jesus Christus nich een Hindanis to sennen.

¹³Weet jie nich, daut dee, dee em Tempel deenen, äa äten vom Tempel kjrieen, un daut dee, dee aum Aultoa deenen, äa Poat vom Opfa kjrieen?

¹⁴Jrod soo haft Gott daut aunjeordent, daut dee, dee daut Evangelium prädjen, derch de Oabeit kjrieen, waut see toom läwen brucken.

¹⁵Oba ekj hab von dit Rajcht kjeenmol Jebruck jemoakt. Un ekj schriew dit uk nich met de Aufsecht, daut jie daut fa mie doonen sellen. Ekj wudd leewa stoawen, aus mie daut nämen loten, waut ekj mie to goot hoolen kaun.

¹⁶Un doch, daut ekj daut Evangelium prädj, doamet doaf ekj mie nich waut meenen. Daut prädjen es mie aus een Jeboot jejäft worden. Un woo wudd mie daut doch gonen, wan ekj daut Evangelium nich prädjen wudd!

¹⁷Wan ekj daut friewellich doo, kjrie ekj mienen Loon. Wan ekj daut nich jieren doo, doo ekj daut doch, wiels mie daut es oppjedroacht worden.

¹⁸Waut es dan nu mien Loon? Jrod dit: Daut ekj daut Evangelium prädj un daut emsonst doo, un daut ekj nich von mien Rajcht Jebruck moak, vom Evangelium betolt to nämen.

¹⁹Un wan ekj uk von aule Menschen frie sie, ekj hab mie doch fa aule toom Deena jemoakt, daut ekj soo väl aus mäajlich jewennen mucht.

²⁰Fa de Juden wort ekj aus een Jud, daut ekj de Juden jewennen kunn. Fa dee, dee unja daut Jesaz sent, wort ekj aus eena, dee unja daut Jesaz es, — wan ekj selfst uk nich unja daut Jesaz sie, — daut ekj dee jewennen kunn, dee unja daut Jesaz sent.

²¹Fa dee, dee daut Jesaz nich haben, wort ekj aus eena, dee daut Jesaz nich haft, — wan ekj ver Gott uk nich onen Jesaz sie, ekj sie unja Christus sien Jesaz, — daut ekj dee jewennen kunn, dee nich een Jesaz haben.

²²Fa de schwake wort ekj schwak, daut ekj de schwake jewennen kunn. Ekj wort eenem jiedren soo aus hee wia, om opp aule Oat un Wies eenje to raden.

²³Dit doo ekj oba aules fa daut Evangelium, un doaderch hab ekj een Aundeel doaraun.

²⁴Weet jie nich, daut dee, dee en de Wad ranen, aula ranen, oba mau eena jewent dän Pries? Rant soo, daut jie dän kjrieen!

²⁵Wäa en eenen Rees rant, lat aules onneedje biesied. Jane doonen daut, om eenen Kraunz to kjrieen, dee doch nich blift. Oba wie doonen daut, om eene Kroon to kjrieen, dee eewich blift.

²⁶Doawäajen ran ekj nich aus eena, dee nich weet, wua hee han well. Ekj kjamf uk nich met de Fust, om Lajcha enne Loft to schlonen.

²⁷Ekj bedwinj mienen Kjarpa, daut dee mie jehorcht, daut ekj nich aundre prädjen doo un selfst nich to brucken sie.