Read Plautdietsch (Low German) – De Bibel 2. Korinta 10 Bible Online

2. Korinta 10 - Plautdietsch (Low German) – De Bibel bible

2. Korinta 10

¹Ekj, Paulus, munta junt opp, un doo daut soo leeftolich un frintlich aus Christus es. Jie meenen, daut ekj schwak schien, wan ekj bie junt sie, oba brow un jlikjtoo, wan ekj wiet auf sie.

²Ekj froag junt opp iernst, lot daut nich bat doa komen, daut ekj woa motten gaunz driest sennen wan ekj kom. Ekj räakjen sea direkjt to dee to sennen, dee doa meenen, daut wie bloos menschlich jesonnen sent.

³Wan wie uk en dise Welt läwen, kjamf wie doch nich soo aus dise Welt daut deit.

⁴Daut Jereetschoft daut wie toom kjamfen brucken, staumt nich von dise Welt. Daut staumt von Gott, un doawäajen haft daut eene Gotteskrauft en sikj. Daut kaun jeistlichet Denkjen, daut faulsch un sea faust es, to nuscht moaken.

⁵Met daut waut Gott ons toom kjamfen reed stalt, moak wie aule Jedanken to nuscht, un aules waut huach un fromm utlat, oba ons hindat, Gott emma bäta kjanen to lieren. Wie nämen aule Jedanken faust, daut dee Christus jehorchen motten.

⁶Wie sent reed, aules waut onjehuarsom es to strofen, wan jie ieescht gaunz jehuarsom jeworden sent.

⁷Seet de Sachen soo aus dee werkjlich sent. Wan sikj irjentwäa secha es, daut hee Christus aunjehieet, dan lot am doaraun denkjen, daut wie jrod soo goot Christus aunjehieren aus hee.

⁸Ekj kunn noch zimlich mea von de Volmacht räden, dee de Har ons jejäft haft, junt opptobuen, un nich junt kaputt to moaken. Doamet wudd ekj noch nich too väl sajen.

⁹Dit saj ekj to junt, daut jie nich meenen, daut ekj junt met miene Breew enjsten wull.

¹⁰Eenje sajen, siene Breew sent strenj un schwoa, oba wan hee selfst doa es, sitt hee schwak ut un sien räden meent nich väl.

¹¹Lot soone Menschen doamet räakjnen, waut wie en onse Breew sent, doano woa wie uk haundlen, wan wie ieescht doa sent.

¹²Wie wudden daut nich woagen, ons met dee to vejlikjen, dee sikj selfst lowen. Dee weeten nich, waut see doonen wan see sikj aun sikj selfst mäten un sikj met sikj selfst vejlikjen.

¹³Wie woaren met ons nich äwa de Moten stolt sennen. Wie woaren en de Jrensen bliewen, dee Gott ons jestalt haft, om uk bat junt to komen.

¹⁴Daut es nich soo daut wie too väl jesajcht haben, aus wan wie nich bat junt jekomen wieren. Wie sent werkjlich met däm Evangelium von Christus bat junt jekomen.

¹⁵Un wie stieen uk nich äwa onse Jrensen un meenen ons waut met Oabeit, dee aundre jedonen haben. Wie hopen doaropp, daut onse Oabeit mank junt doano woat aunerkjant woaren, aus jun Gloowen toonämen woat.

¹⁶Wie wellen daut Evangelium noch en Lenda prädjen, dee wieda auf sent aus jie. Un wie wellen ons nich doamet lowen, waut aundre opp äare Oat jedonen haben.

¹⁷“Wäa sikj lowen well, saul sikj met däm Harn lowen.”

¹⁸Aunjenäm es nich dee, dee sikj selfst loft, oba dee, dän de Har loft.