Read Plautdietsch (Low German) – De Bibel 2. Korinta 4 Bible Online

2. Korinta 4 - Plautdietsch (Low German) – De Bibel bible

2. Korinta 4

¹Wiels wie disen Deenst derch Gott siene Jnod jekjräajen haben, woa wie nich mootloos.

²Met aules waut jeheem un schaundhauft es hab wie nuscht to doonen. Wie haundlen nich hinjarigjsch. Wie loten Gott sien Wuat aus Woarheit stonen. Un jrod wiels wie de Woarheit en Gott siene Jäajenwuat kloa verendach brinjen, kjenn wie doamet ver Gott un däm Jewessen von Menschen bestonen.

³Wan ons Evangelium noch toojedakjt schient, dan es daut mau bie dee, dee veloaren gonen.

⁴Dee haft Soton, de Gott äwa dise Welt, met Blintheit jeschloagen, daut see daut dache Licht vom Evangelium, von Christus siene Harlichkjeit, nich seenen kjennen. Christus siene Harlichkjeit likjent gaunz jeneiw Gott.

⁵Wie prädjen nich ons selfst, oba daut Jesus Christus Har es, un wäajen am sent wie june Deena.

⁶Deeselwja Gott, dee doa säd: Licht saul utem diestren rutdachen, haft sien Licht en onse Hoaten oppdachen loten, daut wie en Christus sien Jesecht seenen woo harlich Gott es.

⁷Wie haben disen Schauz oba en ieedne Jefässa. Daut moakt daut kloa, daut dise jeistliche Krauft von Gott kjemt, un nich von ons.

⁸Wie woaren von aule Sieden hoat bedrenjt, oba wie sent nich aum enj. Wie komen en Veläajenheit, oba wie vezoagen nich.

⁹Wie woaren vefolcht, oba niemols veloten. Wie woaren unjadrekjt, oba komen nich om.

¹⁰Wie droagen Jesus sienen Doot emma aun onsem Kjarpa met ons, soo daut Jesus sien Läwen aun onsem Kjarpa uk verendach komen kaun.

¹¹Wie, dee doa läwen, sent om Jesus sient haulwen emma en Doodesjefoa, daut Jesus sien Läwen uk aun onsem stoaflichen Kjarpa verendach kjemt.

¹²Daut meent dan, daut de Doot en ons wirkjen deit, un en junt daut Läwen.

¹³Oba wiels wie em Gloowen dän selwjen Jeist haben, soo aus jeschräwen steit: “Ekj jleewd, un doawäajen hab ekj jerät”, soo jleew wie uk, un doawäajen räd wie uk.

¹⁴Wie weeten, daut dee, dee dän Harn Jesus vom Doot oppwuak, dee woat ons uk met Jesus toop oppwakjen, un ons met junt toop ver sienen Troon stalen.

¹⁵Dit passieet aula om junt haulwen. Gott siene Jnod saul emma mea Menschen raden, un de Dank doafäa von väle woat Gott noch rikjelja veharlichen.

¹⁶Doawäajen woa wie nich mootloos. Wan ons Kjarpa uk langsom vefelt, aum ennalichen Mensch woa wie aule Dach nie.

¹⁷Ons schwoaret, waut wie hia derchmoaken motten, es bejrenst un leicht. Daut veschauft ons waut, waut äwa aule Moten harlich sennen woat un fa emma bliewen.

¹⁸Wie trachten nich no daut, waut to seenen es, oba no daut, waut nich to seenen es. Wiels waut to seenen es, es fa dise Tiet. Waut oba nich to seenen es, es eewich.