Read Plautdietsch (Low German) – De Bibel 2. Korinta 6 Bible Online

2. Korinta 6 - Plautdietsch (Low German) – De Bibel bible

2. Korinta 6

¹Aus Gott siene Metoabeida moak wie junt Moot, soo to läwen, daut Gott siene Jnod fa junt nich vejäfs es.

²Hee sajcht: “Aus de Tiet kjeem, junt jnädich to sennen, hieed ekj junt, un aus de Dach kjeem, junt to raden, holp ekj junt.” Horcht emol, dee aunjenäme Tiet es nu. De Dach, junt to raden, es nu hia!

³Wie jäwen kjeenem de Jeläajenheit, sikj aun waut en onsem Deenst to steeten, daut doavon nich schlajcht jerät woat.

⁴Wie bewiesen en aules waut wie doonen, daut wie Gott siene Deena sent. En Trubbel, Noot un Angst bliew wie staunthauft un jeduldich.

⁵Wie woaren jeschloagen, enjestopt un vefolcht. Wie motten schwoa oabeiden, wie komen weinich toom schlopen un toom äten.

⁶Wie bliewen jeduldich un leeftolich, vestendich un frintlich. Wie bliewen em Heiljen Jeist un sent aundre werkjlich goot.

⁷En Gott siene Krauft räd wie de Woarheit. Onse Jewäaren sent rajchtsch un linkjsch jerajcht haundlen.

⁸Wie woaren jeieet un uk jespott. Von ons woat goodet un schlajchtet jerät. Wie woaren aus soone, dee lieejen, hanjestalt, un räden doch de Woarheit.

⁹Wie woaren aus framde behaundelt, un sent doch bekaunt. Wie sent aus soone waut stoawen, un doch läw wie. Wie woaren jeschloagen, oba wie komen nich om.

¹⁰Wie woaren truarich jemoakt, oba sent emma froo. Wie sent oam, un doch woaren väle derch ons rikj. Wie haben nuscht, un doch jehieet ons aules.

¹¹Wie haben to junt Korinta sea frie jerät un ons Hoat fa junt wiet opjemoakt.

¹²Daut es nich, daut jie en ons weinich Rum haben. Oba jie haben en june Hoaten fa ons nich Rum.

¹³Ekj räd met junt soo aus ekj met miene Kjinja räden wudd. Doot to mie doch uk soo un moakt june Hoaten wiet op.

¹⁴Lot junt nich toopspaunen met soone waut nich jleewen. Wiels waut kaun Jerajchtichkjeit met Ojjerajchtichkjeit to doonen haben? Ooda woo kaun Licht met daut diestre Jemeenschoft haben?

¹⁵Kaun Christus met Soton stemmen? Waut haben dee waut jleewen toop met dee waut nich jleewen?

¹⁶Waut haft Gott sien Tempel met Jetta to doonen? Wie sent doch däm läwendjen Gott sien Tempel, soo aus Gott sajcht: “Ekj well mank an läwen un waundlen. Ekj well äa Gott sennen, un see sellen mien Volkj sennen.”

¹⁷Un wieda: “Velot an un sondat junt auf. Habt nuscht met orreinet to doonen, dan well ekj junt aunnämen.

¹⁸Ekj well jun Voda sennen, un jie sellen miene Säns un Dajchta sennen”, sajcht de aulmajchtja Har.