Read Plautdietsch (Low German) – De Bibel Galata 1 Bible Online

Galata 1 - Plautdietsch (Low German) – De Bibel bible

Galata 1

¹Ekj Paulus, een Apostel nich von Menschen doatoo jewält, uk derch kjeen Mensch, oba derch Jesus Christus un Gott, dän Voda, dee am vom Doot oppjewakjt haft,

²un aule Breeda, dee hia bie mie sent, schriewen dit no de Jemeenten en Galatien:

³Mucht Jnod un Fräd von Gott, dän Voda, un dän Harn Jesus Christus, met junt sennen.

⁴Hee storf fa onse Sinden, jrod soo aus Gott de Voda daut jeplont haud, ons doaderch ut dise beese Welt rut to raden.

⁵Am traft aule Iea derch aule Eewichkjeit! Amen.

⁶Mie wundat daut, daut jie dän soo schwind veloten haben, dee junt derch Jesus Christus siene Jnod beroopen haft, un een aundret Evangelium aunjenomen haben.

⁷Doa es en Werkjlichkjeit kjeen aundret Evangelium. Jie woaren vedreit un aunjeschmäat von dee, dee Christus sien Evangelium vedreien.

⁸Un wan wie ooda soogoa een Enjel vom Himmel junt een aundret Evangelium prädjen sullen, aus daut, waut wie junt jeprädicht haben, däm lot veflucht sennen.

⁹Soo aus wie verhäa jesajcht haben, saj ekj noch eemol: Wan junt irjentwäa een Evangelium prädicht daut nich met daut stemt, waut wie junt jeprädicht haben, dee saul veflucht sennen.

¹⁰Hieet sikj daut soo aus wan ekj proow Menschen to jefaulen, ooda Gott to jefaulen? Wan ekj de Menschen noch toom Jefaulen läwd, dan kunn ekj nich Christus sien Deena sennen.

¹¹Dit sell jie weeten, Breeda, daut daut Evangelium, daut ekj junt prädijd, nich von Menschen kjeem.

¹²Daut hab ekj von kjeenem Menschen jekjräajen un daut haft mie uk kjeena jelieet. Jesus Christus haft mie daut selfst jeopenboat.

¹³Jie haben doch von mien väajet Läwen em Judentum jehieet, woo schrakjlich ekj Gott siene Jemeent vefoljd un proowd to nuscht to moaken.

¹⁴Ekj jinkj em Judentum wieda aus väle aundre en miene Tiet, soo strenjd ekj mie aun miene Vodasch äa Jesaz to hoolen.

¹⁵Oba aus däm, dee mie derch siene Jnod to waut besondret beroopen haud ea ekj jebuaren wort,

¹⁶daut jefaulen deed, mie sienen Sän to openboaren, daut ekj von am mank de Velkja prädjen sull, jinkj ekj nich ieescht met Menschen räden.

¹⁷Ekj jinkj uk nich no Jerusalem no dee, dee aul ea Apostel wieren aus ekj. Ekj jinkj no Arabien un kjeem wada trigj no Damaskus.

¹⁸Dan om dree Joa reisd ekj no Jerusalem, Petrus to besieekjen, un wia feftieen Doag met am toop.

¹⁹Oba ekj hab von de aundre Apostel kjeenem jeseenen buta Jakobus, dän Harn sienen Brooda.

²⁰Un waut ekj junt hia ver Gott schriew, sent nich Läajes!

²¹Doaropp reisd ekj dan no Sierien un Zilizien.

²²Un Christus siene Jemeenten en Judäa kjanden mie don noch nich.

²³Dee hauden daut bloos sajen hieet, daut dee, dee an ieescht vefolcht haud, prädijd nu dän Gloowen, dän hee ieescht haud prooft to vestieren.

²⁴Un see lowden Gott, daut et met mie soo jeworden wia.