Read Plautdietsch (Low German) – De Bibel Galata 3 Bible Online

Galata 3 - Plautdietsch (Low German) – De Bibel bible

Galata 3

¹Oo Galata, woo hab jie soo weinich Venunft? Wäa haft junt bezeibat, daut jie nich no de Woarheit horchen? Junt es Jesus Christus väajemolt worden, daut jie am schia aum Kjriez seenen kunnen.

²Dit eene well ekj doch von junt weeten: Hab jie dän Jeist jekjräajen doaderch daut jie daut Jesaz hilden, ooda derch de Prädicht vom Gloowen?

³Sent jie soo vedreit? Em Jeist hab jie aunjefongen, un räakjen jie nu em Fleesch foadich to moaken?

⁴Es daut mäajlich, daut jie soo väl fa nuscht jeläden haben? Daut es, wan doa werkjlich nuscht doarhinja es!

⁵Dee, dee junt dän Jeist hanrieekjt un Wunda mank junt wirkjt, deit dee daut derch daut Jesaz hoolen ooda derch de Prädicht, dee vom Gloowen kjemt?

⁶Soo wia daut met Abraham, “dee jleewd Gott un daut wort am aus Jerajchtichkjeit aunjeräakjent”.

⁷Doaraun kjenn wie seenen, Abraham siene Kjinja wieren dee, dee jleewden.

⁸De Schreft säd daut aul em verut, daut Gott de Velkja derch dän Gloowen jerajcht moaken wudd, un prädijd doawäajen aul to Abraham un säd: “Derch die sellen aule Velkja jesäajent woaren.”

⁹Un doawäajen kjrieen dee, dee doa jleewen, dän selwjen Säajen aus Abraham, dee doa Gloowen haud.

¹⁰Wäa sikj opp Woakjen ut däm Jesaz velat es unja eenen Fluch, wäajen de Schreft sajcht: “Veflucht es jieda eena, dee nich aules helt un deit, waut em Jesaz jeschräwen steit!”

¹¹Daut es kloa, daut derch daut Jesaz kjeen Mensch ver Gott jerajcht es, wiels “wäa derch dän Gloowen jerajcht es, saul läwen”.

¹²Daut Jesaz oba jeft sikj met däm Gloowen nich auf. Doa heet daut “wäa doa deit waut daut sajcht, woat läwen”.

¹³Christus haft ons loosjekoft von däm Fluch, dän daut Jesaz äwa ons brocht, doaderch daut hee dän Fluch opp sikj neem, wiels daut steit jeschräwen: “Wäa aum Kjriez henjt, es veflucht”,

¹⁴soo daut Abraham sien Säajen derch Christus Jesus opp de Velkja komen deed. Un soo hab wie dän Jeist jekjräajen dee ons vesproaken wia, wan wie jleewen wudden.

¹⁵Leewe Breeda, ekj jäw junt een menschlichet Biespel. Wan Menschen een Tastament moaken, woat daut nich jeendat, wan daut ieescht unjaschräwen es. Doa woat dan nich mea toojesat uk nich wajchjenomen.

¹⁶Waut Abraham vesproaken wia, wia fa am un sien Nokomen. Daut sajcht nich: “un siene Nokomen”, nich aun väle, bloos aun eenem. Un dee eena es Christus.

¹⁷Dit es waut ekj meen: Daut Jesaz, daut 430 Joa nohäa kjeem, häft een Tastament nich opp, daut Gott verhäa goot jeheeten haft. Daut kunn sien Vespräakjen nich onjeltich moaken.

¹⁸Wan daut Oafgoot derch daut hoolen vom Jesaz kjemt, dan es daut nich doaderch, daut Gott daut vesproaken haft. Oba Gott jeef Abraham daut, wiels hee am daut vesproaken haud.

¹⁹Wuarom dan daut Jesaz? Daut Jesaz wort bowenenn jejäft, daut wie doaraun seenen kunnen waut Sind es, bat dee komen wudd, dee ons vesproaken wia. Daut Jesaz wort derch Enjel bekaunt jemoakt un ons derch een Vemedla jejäft

²⁰Een Vemedla oba es nich needich, wan sikj daut mau om eenen haundelt. Un Gott es mau eena.

²¹Es daut Jesaz dan jäajen daut, waut Gott vesproaken haft? Nä, derchut nich! Wiels, wan doa wia een Jesaz jejäft worden, daut doa Läwen brinjen kunn, dan wia derch daut Jesaz de Jerajchtichkjeit jekomen.

²²De Schreft oba sajcht, daut de gaunze Menschheit von de Sind beharscht woat, daut et derch Gloowen kunn jejäft woaren, waut dee vesproaken wia, dee aun Jesus Christus jleewen wudden.

²³Ea de Gloowen kjeem, haud daut Jesaz de Haunt äwa ons, bat ons de Gloowen sull väajestalt woaren.

²⁴Daut Jesaz wia doa, ons to belieren bat Christus kjeem, daut wie derch dän Gloowen kunnen jerajchtfoadicht woaren.

²⁵Nu oba daut de Gloowen jekomen es, sto wie nich mea unja eenen Oppsechta, dee ons belieren mott.

²⁶Nu sent jie derch dän Gloowen aun Christus Jesus aula Gott siene Kjinja.

²⁷Wiels wäaemma en Christus nenjedeept es, haft Christus aunjetrocken.

²⁸Doa es nu kjeen Unjascheet mea tweschen Juden un Griechen, tweschen Sklowen ooda Friee, Maun ooda Fru. Wie sent aula eent en Christus Jesus.

²⁹Un wan wie Christus aunjehieren, dan sent wie Abraham siene Nokomen un Oawen, soo aus Gott vesproaken haft.